السلام عليكم
الحمد لله ... بعد جهد جهيد ، وصراع عنيف مريع ، وجهاد طويل ، ولأول مرة فى العمر اشتريت عربية امبارح
وتخيلو كانت ابيزا
ابيزا 2000 فضي عاملة 107500 كيلو راشة بره ،كشفت عليها فى محطة مصر عباس العقاد - واخدلها خبطتين فى الشنطة وواحدة قدام "اللي قدام أثرت على صباع الشاسيه الشمال تنيه خفيفة خالص - الراجل أكد أنها مش مؤثرة" وكبس الموتور 70 فى الميه
حاله العربية كويسة وخلصت على 45 ألف -وكاوتشات أربعة ألاف كيلو طبعا فيه عشرات الصغائر فيها لكن مش مشكلة
انا شايف انه سعر كويس هوا مش لقطة كان ممكن تنزل ألف كمان بس انا مبحبش أموت الحاجة قوي لما أشتريها "رحم الله رجلا سمحا إذا باع، سمحا إذا اشترى، سمحا إذا اقتضى"
استخرت كتير لحد ما جبتها
انا اللي عاوزه منها أني أتقن السواقة وتقضي غرض لحد ما الواحد ينقل على أحسن بإذن الله

عندي يجي 34 سؤال معلش هزعجكم بيهم بس ربنا يكرم اللي هيجاوب ويفك كربه - واللي مش هيجاوب كمان

1- مبدأيا تقييم العربية والسعر ايه ؟ "للتعلم والاستفادة لكن انا راضي"
2- انا محتاج أبص على ايه زيت موتور وفتيس وفرامل ومية وتبديل كاوتشات ومساعدين وأشياء أخري ؟ وأماكنهم فين ؟ ويتغيرو كل أد ايه ؟ واعرف ازاي اذا كان المفروض أغيرهم ولا لأ لأن اللى انا واخد منه العربية مش فاكر أي حاجة منهم عملها امتى؟

3- لو حد عنده أي معلومات عن العربية دي أو مانيوال أو كاتلوج صيانة أو أي موقع أو موضوع فى المنتدى ده أو غيره بالعربي او الانجليزي ياريت ممكن يقول عليه أو يبعته ميل أو أقابله أصوره مفيش مشكلة لأني تايه جدا جدا جدا

4- عندي شاشة سوداء فى نص التابلوه فيها شوية لمض بتنور مع التشغيل وتطفي وفيه لمض مش واضحة فى النص ما بتنورش خالص انا مش فاهم منهم غير الايرباج وفرامل اليد والبطارية
الباقي بتوع ايه واللي مبينوروش دول معناهم مشكلة ولا لأ

انا عارف ان كتير من الكلام ده ممكن يكون اتناقش فى المنتدى قبل كده بس ياريت توضحولي اللينكات للمواضيع أو حتى اسماء المواضيع وانا أدور عليها لأني مش عارف ألاقيها

وجزاكم الله خيرا
محمد