السلام عليكم

معايا سكودا 96 كانت ماشية معايا زى الفل أول ما جبتها، لحد ما كنت مسافر إسكندرية بيها و مؤشر الحرارة كان معلق، وكالعادة إنتهى الحوار بضرب وش السلندر، ومن ساعتها و العربية عمرها ما رجعت زى الأول تانى

المهم، دلوقتى العربية عمالة تقطع و السبب إن البوجيهات بتعرق زيت، كل ما أجيب طقم جديد يمشى خطوتين يقوم معرق تقوم العربية منتشة، ةكل ميكانيكى بعد ما يقولى غير كذا وكذا يقولى هاتلى العربية أفكلك الموتور ونشوب السبب ولو فى مشكلة تغيره، وانا عشان عارف إن المكنة خفيفة أصلا قررت إنى أغير المكنة و أريح دماغى.

عشان كدا بطلب من خبراء المنتدى يدلونى على حوار تغيير الموتور دا، انا مش بتاع جرى ولعب عشان كدا غالبا حجيب موتور 1300 برضو مش حعلى يعنى عشان مالهاش لازمة، حد يساعدنى و يقولى أحسن ناس فى الحرفيين أجيب منهم، و التكلفة الإجمالية حتكون فى حدود كام تقريبا، وهل أغير المكنة بس ولا أغير معاها أى حاجه تانى بالمرة

وعربيتى مفيهاش تكييف - نازلة من غيره أصلا - فهل الأحسن أجيب سعة موتور أكبر و أركب تكييف ولا التكييف حيقعد شويه و يبوز ؟؟

معلش أسئلتى كتير شوية وشكرا على المساعدة مقدما