الموضوع: حادث عنيف بالرينو فلوانس 2012

السلام عليكم
أول امبارح الصبح حوالى الساعة 10 الصبح كلمت اخويا اتطمن علية و اشوفة وصل الشغل ولا لسة المهم كلة تمام و زى الفل.

على الساعة 1 كدة لقيتة بيكلمنى و بيقولى انت مشغول ؟ قلتلة لية ؟ فية اية ؟ قاللى انا عملت حادثة جامدة بالفلوانس فى نفق الازهر طبعا اعصابى باظت وبدأت ما اتلمش على نفسي و ساألتة انت كويس ؟ سليم ؟ قاللى ربنة ستر جدا جدا جدا انا تمام طيب ازاى ؟ و امتة ؟

وهو ماشي فى نفق الازهر و النفق كان فاضي و ماشي على 130 (صباح التخلف العقلى) و بنفس السرعة دخل الملف و مش رابط الحزام و ماسك الطارة بإستهتار (ما ينفعش حد يدخل ملف سريع و مايكنشي متبت بإدية الاتنين) المهم بيكسر يمين عشان الملف و طبعا ماسك الطارة بإستهتار فلتت من ايدة فراحت العربية حدفة لبرة و رزع فى الرصيف الشمال و فضل يرد فى رصيف النفق يمين وشمال ترزيع لحد ما العربية وقفت.

المهم انا قلتلة طيب يا ابنى ما عرفتش تمسك الدركسيون تانى ؟ قالى انا كنت بتغربل فى العربية و مش فاهم اية اللى بيحصل و ستر ربنة ان ولا حد وراة ولا جمبة و العربية ولا لفت ولا اتقلبت.


اتصل برينو و الونش بتاعهم (شركة متعاقدين معاها العميل اللى بيحاسب ) جة خد العربية بعد ساعة ووداها التوكيل فى العبور المهم التقييم المبدئي 30 الف جنية !! المهم قالهم متشكر و خد العربية و طلع بيها على واحد فى الوايلى.

انا كل دة ما منتش شفت العربية وكنت فاكر اننا هانرميها بس اهم حاجة ان هوة سليم ور بنة ستر المهم رحت شفتها
المقص اليمين و الشمال متني بس اليمين اكتر مع وجود عوجة فى الشاسية نتيجة انحناء المقص على فكرة المقص مفتخر شبة مقص الاوكتافيا.
الاكصدام سليم من الخارج تماما
مصفحة الاكصدام مدمرة من تحت
المساعد و الكبالن و البيض و بارات الدركسيون كلة سليم
الكاوتش اليمين مقطوع
الجنط على الدعك اللى حصل فية اطرافة فقط معوجة خفيف و مخربشة فعلا الجنط محترم جدا انا كنت فاكر انة متدمر
الكارتيرة يمين و شمال اتكسرو
الرفارف سليمة و العتب بة خبطة
العربية من برة ماتقلش ان حصل فيها حاجة العجن كلة من تحت

المهم انا قلتلة نوديها الحرفيين عند الحج سمير على عشان هو معرفة و عندة زرجينة كمبيوتر و كدة
بس المشكلة كان لازم نشتري مقصات جداد عشان نعرف نطلع العربية على الونش و نوديها الحرفيين

محل فى شارع جسر السويس قالى المقص ب 450 جنية و واحد تانى قاللى 350 بس هابعت اجيبهولك المهم رحنا شفناة طلع تركي و مش الاصلى كلمنا مركز معتمد فى الرحاب طلع عندهم الاصلى و بصراحة العربية لسة جديدة و قلنا نجيب الاصلى و خلاص و جبنا الاتنين ب 1650 جنية بس بجد بعد ما شفتهم حسيت انهم ما يفرقوش عن التركي.

بس النهاردة خدنا العربية ودناها الحرفيين و هي على فكرة بتمشي بس طبعا مكان تركيب المقص اليمين معوج شوية بس بكرة انشاء الله الناس هاتشتغل فيها و هاوافيكم باللأخبار الجديدة و التكلفة و لو فية حاجة بايظة تانى

انا حبيت انقلكم اللى حصل عشان لو فية افادة و ارجوكم بلاش سرعة زايدة الحادث بيحصل فى ثانية ربنة يحفظكم جميعا.

المشاركة الأصلية كتبت بواسطة v!per

يا ساتر يا رب ... و حمداََ لله على سلامة اخوك فداة مليون عربية و ان شاء الله هترجع زيرو زي ما كانت و احسن كمان

جزاك الله خيرا شكرا جزيلاا

المشاركة الأصلية كتبت بواسطة mahmoud_afifi

معلش قدر الله وما شاء فعل وحمدلله على سلامة اخوك.
الطيش ده فينا كلنا بس الشاطر الي يبطل طيش قبل ما تقلب بزعل.
بس واضح ان ماشاء الله العربيه محترمه انها اخدت الخبط ده على السرعه دي وفي حاجات الحمدلله طلعت سليمه.
ربنا يعوضكم خير وتتصلح وترجع زي الاول

جزاك الله خيرا شكرا جزيلا فعلا ربنة اللى بيستر

المشاركة الأصلية كتبت بواسطة ahsd2000

الف سلامه على اخوك وفداه الف عربيه بس عندي تعليق لو تسمحلي ....
بعد ستر ربنا وحفظه الحالات اللي زي دي هي اللي تفرق في سعر عربيه عن التانيه ... الناس بتقارن اوبشنز وسعه موتور وفتيس وكلام فارغ وبينسوا اهم حاجه ...... عوامل الامان الحقيقيه .
الحمد لله على سلامه اخوك واعتقد انك مقتنع تماما باهميه كل قرش دفعته في العربيه لما تشوف اخوك طالع سليم وتشوف نسبه التلفيات في حادثه زي دي .

جزاك الله خيرا شكرا جزيلا و فعلا انت بتدفع ثمن سلامتك و الستار هو الله

المشاركة الأصلية كتبت بواسطة ahmed_hanafi

الحمد لله ربنا ستر وقدر الله وماشاء فعل.
ولو عايز أي مساعدة قولنا

جزاك الله خيرا شكرا جزيلا الحمد لله انة طلع سليم ربنة يكرمك