حادث عنيف بالرينو فلوانس 2012

**ahmadm** · 18-01-2013 09:57 PM

السلام عليكم
أول امبارح الصبح حوالى الساعة 10 الصبح كلمت اخويا اتطمن علية و اشوفة وصل الشغل ولا لسة المهم كلة تمام و زى الفل.

على الساعة 1 كدة لقيتة بيكلمنى و بيقولى انت مشغول ؟ قلتلة لية ؟ فية اية ؟ قاللى انا عملت حادثة جامدة بالفلوانس فى نفق الازهر طبعا اعصابى باظت وبدأت ما اتلمش على نفسي و ساألتة انت كويس ؟ سليم ؟ قاللى ربنة ستر جدا جدا جدا انا تمام طيب ازاى ؟ و امتة ؟

وهو ماشي فى نفق الازهر و النفق كان فاضي و ماشي على 130 (صباح التخلف العقلى) و بنفس السرعة دخل الملف و مش رابط الحزام و ماسك الطارة بإستهتار (ما ينفعش حد يدخل ملف سريع و مايكنشي متبت بإدية الاتنين) المهم بيكسر يمين عشان الملف و طبعا ماسك الطارة بإستهتار فلتت من ايدة فراحت العربية حدفة لبرة و رزع فى الرصيف الشمال و فضل يرد فى رصيف النفق يمين وشمال ترزيع لحد ما العربية وقفت.

المهم انا قلتلة طيب يا ابنى ما عرفتش تمسك الدركسيون تانى ؟ قالى انا كنت بتغربل فى العربية و مش فاهم اية اللى بيحصل و ستر ربنة ان ولا حد وراة ولا جمبة و العربية ولا لفت ولا اتقلبت.

اتصل برينو و الونش بتاعهم (شركة متعاقدين معاها العميل اللى بيحاسب ) جة خد العربية بعد ساعة ووداها التوكيل فى العبور المهم التقييم المبدئي 30 الف جنية !! المهم قالهم متشكر و خد العربية و طلع بيها على واحد فى الوايلى.

انا كل دة ما منتش شفت العربية وكنت فاكر اننا هانرميها بس اهم حاجة ان هوة سليم ور بنة ستر المهم رحت شفتها
المقص اليمين و الشمال متني بس اليمين اكتر مع وجود عوجة فى الشاسية نتيجة انحناء المقص على فكرة المقص مفتخر شبة مقص الاوكتافيا.
الاكصدام سليم من الخارج تماما
مصفحة الاكصدام مدمرة من تحت
المساعد و الكبالن و البيض و بارات الدركسيون كلة سليم
الكاوتش اليمين مقطوع
الجنط على الدعك اللى حصل فية اطرافة فقط معوجة خفيف و مخربشة فعلا الجنط محترم جدا انا كنت فاكر انة متدمر
الكارتيرة يمين و شمال اتكسرو
الرفارف سليمة و العتب بة خبطة
العربية من برة ماتقلش ان حصل فيها حاجة العجن كلة من تحت

المهم انا قلتلة نوديها الحرفيين عند الحج سمير على عشان هو معرفة و عندة زرجينة كمبيوتر و كدة
بس المشكلة كان لازم نشتري مقصات جداد عشان نعرف نطلع العربية على الونش و نوديها الحرفيين

محل فى شارع جسر السويس قالى المقص ب 450 جنية و واحد تانى قاللى 350 بس هابعت اجيبهولك المهم رحنا شفناة طلع تركي و مش الاصلى كلمنا مركز معتمد فى الرحاب طلع عندهم الاصلى و بصراحة العربية لسة جديدة و قلنا نجيب الاصلى و خلاص و جبنا الاتنين ب 1650 جنية بس بجد بعد ما شفتهم حسيت انهم ما يفرقوش عن التركي.

بس النهاردة خدنا العربية ودناها الحرفيين و هي على فكرة بتمشي بس طبعا مكان تركيب المقص اليمين معوج شوية بس بكرة انشاء الله الناس هاتشتغل فيها و هاوافيكم باللأخبار الجديدة و التكلفة و لو فية حاجة بايظة تانى

انا حبيت انقلكم اللى حصل عشان لو فية افادة و ارجوكم بلاش سرعة زايدة الحادث بيحصل فى ثانية ربنة يحفظكم جميعا.

**V!PER** · 18-01-2013 10:06 PM

يا ساتر يا رب ... و حمداََ للة على سلامة اخوك فداة مليون عربية و ان شاء اللة هترجع زيرو زي ما كانت و احسن كمان

**mahmoud_afifi** · 18-01-2013 11:07 PM

معلش قدر الله وما شاء فعل وحمدلله على سلامة اخوك.
الطيش ده فينا كلنا بس الشاطر الي يبطل طيش قبل ما تقلب بزعل.
بس واضح ان ماشاء الله العربيه محترمه انها اخدت الخبط ده على السرعه دي وفي حاجات الحمدلله طلعت سليمه.
ربنا يعوضكم خير وتتصلح وترجع زي الاول

**ahmed_hanafi** · 18-01-2013 11:35 PM

الحمد لله ربنا ستر وقدر الله وماشاء فعل.
ولو عايز أي مساعدة قولنا

**بيبرس** · 18-01-2013 11:52 PM

ربنا يسترها علينا وعليكم

**Elkordy2000** · 19-01-2013 12:04 AM

حمدا لله علي سلامة اخوك , نفق الازهر اصلا المنحنيات اللي فيه مرعوبه من غير سرعه , ده غير انه نازل بالاضافه ألي قلة مقاومة الهواء داخل النفق وكل ده بيدي دافعه للعربيه اصلا من غير ما تدوس بنزين , المهم أنه هو سليم , بس بصراحه الفلوانس طلعت وحش جامد وتستاهل الفلوس اللي الدفعت فيها

**iaibrahim** · 19-01-2013 12:30 AM

اولا نحمد الله على سلامة اخيك ثانيا شكرا على عرض الموضوع عشان الناس تاخد عبره ثالثا وهو مهم لو كان خبط فى عربيه تانيه مفيهاش عوامل الآمان وكان هناك ناس حصل لها حاجه .....حتكون مشكله كبيره وربنا يسترها معانا ومع اولادنا ومع الجميع

**Ahmed Selim** · 19-01-2013 12:37 AM

الحمد لله على سلامة أخوك و فداه 100 عربية

للأسف التوكيل بيتعامل بمبدأ غير كل اللى فيه مشاكل و غير الحاجات اللى جنبها لو شاكك فيها.

عموماً واضح من كلامك أن العربية بسم الله ما شاء الله محترمة لأن الخبطة على السرعة دي ممكن تعمل قلق أكتر من اللى حصل.....و كويس برضه أن مفيش أيرباج فتحت.