الموضوع: خطوات ترخيص عربية نيسان زيرو بالتفصيل

السلام عليكم ورحمة الله وبركاته

النهاردة الحمد لله رخصت العربية .. نيو صني 2013 سوبر صالون ..

أنا كنت مرور الشروق .. لأني القاهرة الجديدة

1 - لازم تروح ويكون معاك الورق إللي أخدته من المعرض الخاص بالمبايعة .. ويكون معاك صورة من بطاقتك الشخصية وطبعاً البطاقة نفسها.

2 - أول متروح .. تشتري ورق الفحص .. كان بـ 15 جنيه .. وتشتري ملف وبيديك معاه كام ورقة كدة لزوم الترخيص ودول كانوا بـ 3.5

3 - تروح تجيب الطفاية وتختمها بالشاسيه بتاعة هي سعرها 130 جنيه تقريباً

4 - تروح تدفع التأمين الإجباري .. 3 سنين بحوالي 320 جنيه

5 - تجيب الراجل إللي بياخد بصمة العربية .. بصمة العربية دي ببساطة هي رقم الشاسية والموتور.. هو بيجي يحط ورقة كدة ويشخبط عليها بقلم رصاص وهو حاطتها على رقم الشاسية والموتور فتعمل كأنها بصمة كدة.

6 - تجيب المهندس عشان الفحص .. بيفحص العربية وتأكد عليه إنه يكتبلك إن العربية زجاج ملون فابريقة

7 - المهندس ده بيتأكد إن رقم الشاسية والموتور وصلوا المرور بالفعل .. وبيختملك ويعمل شوية حاجات على نفس الورق إللي معاك

8 - تروح تسلم الورق ده كله .. هديك مكانه ورقة الضريبة .. تصورها نسختين .. وتروح على الخزنة أولاً تدفع الضريبة .. انا رخصت 3 سنين .. بـ 821 بالدمغات بكل حاجة

9 - بعد كدة ترجع على الشباك تاني تديله النسخ والإيصال بتاع الدفع

10 - تستنى الرخصة .. ولما تستلمها اتأكد من كل بياناتك .. وأهم حاجة تتأكد من حتة زجاج ملون .. ومن أرقام الشاسيه والموتور

11 - تروح للراجل بتاع اللوح .. تديله الرخصه .. هيديك اللوح والمسامير .. وهتلاقي هناك واحد يركبلك الحاجات دي .. إديته 20 جنيه

12 - بعد الترخيص .. ترجع البيت وتستريح .. وتكلم 16244 ... عشان تفعل الضمان مع شركة نيسان .. هيطلبوا منك شوية بيانات من الرخصة ..

13 - هيدوك كود تفعيل كدة .. تكتبه على كتيب الضمان وتخليه معاك لأن ده إللي هيطلبوه منك في التوكيل بعد كدة لما تيجي تعمل صيانات

14 - في أوتو إيجيبت مدينة نصر طلبوا مني لما أخد الرقم ده أبلغهم بيه بالتليفون وفعلاً كلمتهم

كدة ألف مبروك .. الرخص طلعت ..

تقريباً إجمالي المبلغ بالتقريب .. 1300 جنيه بالبقشيش والذي منه .. 3 سنين .. بالسلطات بالباباغنوج .. :d

مسألونيش على شنطة الإسعاف وتقريباً مركزوش أوي على المثلث ..

أنا كنت رايح بالطفاية والمثلث وبس ..

جزاكم الله خيراً

الف مبروك ربنا يديك خيرها و يكفيك شرها

تحياتى