الموضوع: تقرير نيسان صنى 2013 سوبر صالون

مبدئيا انا لسة عامل صيانة الألف (المجانية) وكنت مأجل التقرير دة بعد ما اعملها علشان اقدر احكم عليها صح نسبيا
نبتدي على بركة الله

1-الشكل الخارجى :
هو مش عاجب ناس كتير بس ده اذواق لكن بالنسبالى الشكل كويس جدا بالذات السوبر صالون مع الاسبويلر الخلفى والجنوط والفاميه الخلفى

2-الشكل الداخلى :
تعتبر فقيرة شوية من جوة او (مش شبابية اوى) لكن مش وحش لكن التقفيل كويس جدا

3-الراحة فى الجلوس والوسع الداخلى :
طبعا مش هتكلم فيها كتير غير انها اوسع عربية ممكن تشوفها والكراسى قعدتها كويسة جدا بس لسة محتاج اعملها فرش جلد علشان تظبط اكتر

4-الموتور والسحب :
الموتور صوته هادى على ار بى ام 2 بعد كدة بيبقى صوته مسموع لكن مش مزعج والسحب ما شاء الله عاجبنى جدا واستجابة دواسة البنزين ممتازة جبت بيها 150 بسهولة وكانت عايزة تسحب اكتر بس الطريق ما كانش مساعدنى

5-الثبات :
أقصى سرعة جبتها بيها 150 زى ما قولت وكنت مسيطر عليها جدا ومش حاسس انها خفيفة خالص وكانت ثابتة جدا معايا (بس على فكره موضوع الثبات ده نسبى من واحد للتانى على حسب هو متعود على ايه لكن بالنسبالى كانت ثابتة جدا)

6-العفشة :
الصراحة مش عجبانى وتعتبر هى الحاجة الوحيدة اللى مديقانى فى العربية حاسسها ناشفة مش ناعمة زى مالناس بتقول انا معايا شاهين ومش حاسس بفرق تقريبا اولو فى يبقى يسيط جدا ومش ملحوظ وقولتلهم يكشفو عليها فى الصيانة وطلع مافيهاش حاجة (وممكن برده يكون الموضوع نسبى للناس بس لو عفشة الصنى كده ناعمة ومتحسسكش بالمطبات يبقى كدة الشاهين ناعمة برده)

7-عجلة القياده :
عاجبنى اوى الباور الكهربا بتاعها هو خفيف اوى فى السرعات الواطية وبيتقل مع السرعة وسهل اوى انك تتعود عليه ده و المالتى فانكشن والبلوتوث شغال زى الفل الحمد لله مفيش مشكلة

8- الفرامل :
انا مجربتش اقفش مرة واحدة الصراحة بس انا بحس بالأمان من ناحية الفرامل ولما بدوس عليها بحس بالقوة وانها ممكن تلحقنى لو حاجة حصلت فجأة لا قدر الله (اه صحيح مرة سمعت صوت صفارة خفيفة وانا بفرمل بس ما اتكررتش تانى ولما رحت الصيانة قلتلهم المهندس قالى لو اتكررت معاك تانى كتير والصوت كان عالى يبقى هيركبولها صاجة التيل الخلفى فى الضمان وقالى ده تعديل نزل للعربية لو المشكلة دى ظهرت بوضوح)

9-الكاوتش :
لامؤاخذة فى الكلمة زباااااالة بيلم زلط بطريقة بشششششعة وينطرها جوة الكارتيرة دة غير ان فى ناس قالتلى ان الكاوتش محتاج يتعرض عن كدة و قالولى هو اللى مدينى الاحساس بنشوفية العفشة دى ولو اتغير هيفرق جامد (يا ريت لو حد غير الكاوتش وعرضه يقوللى ايه اخباره معاه)

10-استهلاك البنزين :
ممتاز ولسة الاستهلاك بيقل كمان بس بصراحة محسبتوش لكن اول ما جبتها كان العداد مدينى متوسط استهلاك 13.5 دلوقتى وصل 8.6 بس انا مابثقش اوى فى القراءات دى لأنها بتتغير كل شوية على حسب طريقة سواقتك

11-الكاسيت والصوت :
الكاسيت انا عارف انه ممتاز وهو اللى بينزل فى التيدا والجوك والقشقاي والسماعات كويسة لكن لو اتغيرت هيبقى احسن بكتيير مع الكاسيت ده وبالمناسبة هو فيه aux بس مفيهوش usb

12-اماكن التخزين :
من نقط ضعف العربية ومفيهاش غير درج التابلوه الصغير والحته الفاضية اللى فوقيها والحته الصغيره قوى اللى جنب فرامل اليد ومفيش طفاية سجائر (أنا ما بدخنش بس الطفاية ممكن تحط فيها عملة او اي حاجة صغيرة) لكن فى حوامل الأكواب قدام وورا ممكن تستفيد منهم وتحط اى حاجة

13-التكييف :
ما جربتوش غير وانا بستلمها ومرتين كمان لمدة لا تزيد عن 5 دقائق وكنا دخلنا فى الشتا فسقعت جدا والمروحة كانت على 1 عشان كدة مقدرش احكم عليه مظبوط لكن الأعضاء اللى جربوه فى عز الحر بيقولو عليه ثلاجة

14-الدلايات :
مش عارف ليه مش منزلينها بدلايات (الحتة البلاستيك اللى بتبقا ورا الكاوتش عشان التراب والميه) ومش موجودة فى التوكيل لكن انا شايف انها مهمه جدا ومش عارف لو جبتها من اى حد بتاع اكسسوارات هتبقى مظبوطة ولا لأ ؟؟ التوكيل بيقولى مينفعش !!

تقرير مفصل وممتاز

ربنا يمتعك بيها ويكفيك شر الطريق وشرها