الموضوع: سيتروين اليزية يا مهاب باشا

المشاركة الأصلية كتبت بواسطة m_am

انا رايح المعرض النهاره ان شاء الله و في دماغي اساسا يا دي يا 301 بس الأثنين بالنسبه ليا بديلين للعربيه اللي وهماني سي3 بيكاسو , يا ريت يا جماعه بالله عليكم لو حد ليه اتصال قوي بالناس في عز العرب يعرفلي البيكاسو هيبقي سعرها كام انا هحاول اعرف و انا في المعرض بس مظنش انها معروضه السنه دي , بس لو مفيش نصيب في البيكاسو اليزيه و 301 هما اللي عليهم الأختيار ان شاء الله حاسسهم اشيك من الفلونس

الحقيقة أنا لم أرى السى اليزيه أو 301 على الطبيعة، ولكن من الصور خاصة من الداخل أعتقد أن السيتروين أشيك و خاماتها أنظف بمراحل
صور سيتروين سي إليزي 2013 | Egy Speed
ممكن الفلوانس أوسع و أفخم من الداخل بس عمرى ما حبيت تصميمها الخارجى السخيف و طبعا دى مسألة أذواق :-)

انا شوفت العربية فى المعرض انهارده العربية الوحيدة الى شدتنى فعلا رغم العربيات الاكثر من رائعه و الى تعقد الواحد فى عيشته

و قابلت الاستاذ جورج اسكندر و راجل قمه فى الذوق و الاخلاق و خنقته من كتر الاسئله و امشى و افتكر حاجات و ارجع اسئله تانى اكتر من مره لاكتر من ساعه تقريبا

و الى طلعت بيه ان
العربية نازله 3 فئات اتنين زى بعض كومفورت ( مانيوال / اوتو ) و فئة اكسكلوسف اوتو

اسعارها 105 و 115 و 125 بالترتيب و الكلام ده خلال فتره المعرض و لسه مش عارفين هتزيد بعد المعرض ولا لا بس الاستاذ جورج قالى انها مش هتزيد دلوقتى على طول

مواصفات الفئة الكومفورت
ايرباج للسائق - التحكم فى ارتفاع كرسى قياده السائق - tungstene trim - مقابض داخلية كروم - مقاعد خلفية 2/3-1/3 - closed glove box - مصابيح ضباب امامية - ريموت كنترول - تكيف هواء بكر - radio with integrated screen ( 2 speakers) - abs - جنوط 15 بوصه حديد و معاها طاسات و استبن 15 - المرايات و المقابض الخارجية بلون السياره - 4 زجاج كهرباء - interior mistral birdy cloth

الفئة الاكسكلوسيف تزيد عن العادية
ايرباج للراكب الامامى - مسند يد - جرابات خلف المقاعد الامامية - عجلة قياده من الجلد - تكيف اوتوماتيك - جنوط 15 اسبور - بلوتوث - chrome look pack ( windows trim) - radio with deported screen + connecting box ( 4 speaker ) - sensor park - ولاعه سجائر

و العربية المعروضه هناك شوفت فيها زرار ال esp و سألت الاستاذ جورج قالى ان الفئات كلها فيها
abs - ebd - esp - eps و ان الماتور بتاعها هوه هوه بتاع السيتروين c4 مع زياده العزم و القدرة الحصانية

تقييم عام للعربية

العربية بجد واسعه جدا جدا و قاعد فيها مستريح جدا ( الكروز مكانتش مريحانى زيها ) انا من اصحاب الوزن الثقيل يعنى طول بعرض بارتفاع و كنت قاعد فى العربية و مرجع الكرسى على الاخر و فى تقريبا حوالى 15 سم او اكتر ورايا - العربية على عكس النظره الخارجية بانها ضيقة الا انها اوسع من الار بى و الالنترا و شنطتها بحر بكل ما تحتويه الكلمة من معانى مش عارف جايبين المساحات الداخلية دى منين 506 ليتر

العربية الفئه الاعلى الخامات الداخليه عجبتنى اكتر من الفئة الى قبلها خصوصا التابلوه على الرغم من انه بيلمع بس احسن من الفئة الى قبلها

تقفيل العربية حلو جدا و تقفيل الماتور حلو برضه على الرغم من شكل الهيدر بتاع الشكمان معجبنيش حاسه مش بتاع عربيه جديده شكله مصدى و قديم و سألت المبيعات قالى عشان ده حديد زهر مصدقتش بس بلعتها عادى

العربية دى لو استمرت بالسعر ده و بالمواصفات دى و خصوصا abs - ebd - esp - eps هتاكل عربيات كتير جدا فى السوق و خصوصا الاوبترا الى بقت ب 112 و الار بى و الالنترا مسألتش على سعرها عشان متعصبش على حد من الى فى هيونداى - الريو و السيراتو الى بقت ب 186 الف :) يعنى بتمن ال ds4 ان مكانش اكتر :) و اللينا الجميله و البونتو العظيمه الى رفعوا سعرهم جامد جدا واحده بماتور 1600 للاوتو و 1400 للمانيوال و التانية 1400 و 77 حصان على ايه الله اعلم و ده كان رأى اكتر من 2:3 من الى ركبوا العربية هناك لانى قعدت عند العربية دى حوالى ساعه و نص او ساعتين و لفيت المعرض كله و رجعت لها تانى عشان اكمل استطلاعاتى عليها و الخوف كله كان من توكيلها و صياناتها و قطع غيارها و اعاده البيع