عرفت ميكانيكي حكاية

**mahmoud_anwar** · 23-01-2013 02:22 AM

السلام عليكم ورحمة الله وبركاته
انا كنت في مرة طلبت من اخوة هنا عن ميكانيكي كويس ورد عليا عضو هنا في المنتدي وصفلي ميكانيكي جامد جدآآ بصراحة والله نفسي اشكرة بس مش قادر اجيب اسمة بي الظبط هنا بس هو اكيد لو شاف الموضوع هيعرفني لي اني اتصلت بيه من عند الميكانيكي ربنا يكرمة يارب ويفرج همة يارب ويشفي ولدتة
ياجماعة بجد الي عايز ميكانيكي من الاخر مافيش غير استا ياسر ومكانه في الوراق راجل عندة زمة وضمير وبيعرف ربنا ومحترم وسعرة كويس جدآآآ ومش استغلالي خالص ويكفي هو الي بيشتغل بي ايدة
وكمان حطلي العربية علي الكمبيوتر وظبطهالي وكل ده وكان سعرة حنين جدآآ بجد ربنا يبارك له ويرزقة يارب

**E_medo77** · 23-01-2013 04:22 AM

المشاركة الأصلية كتبت بواسطة mahmoud_anwar

السلام عليكم ورحمة الله وبركاته
انا كنت في مرة طلبت من اخوة هنا عن ميكانيكي كويس ورد عليا عضو هنا في المنتدي وصفلي ميكانيكي جامد جدآآ بصراحة والله نفسي اشكرة بس مش قادر اجيب اسمة بي الظبط هنا بس هو اكيد لو شاف الموضوع هيعرفني لي اني اتصلت بيه من عند الميكانيكي ربنا يكرمة يارب ويفرج همة يارب ويشفي ولدتة
ياجماعة بجد الي عايز ميكانيكي من الاخر مافيش غير استا ياسر ومكانه في الوراق راجل عندة زمة وضمير وبيعرف ربنا ومحترم وسعرة كويس جدآآآ ومش استغلالي خالص ويكفي هو الي بيشتغل بي ايدة
وكمان حطلي العربية علي الكمبيوتر وظبطهالي وكل ده وكان سعرة حنين جدآآ بجد ربنا يبارك له ويرزقة يارب

باشا مش ده اللى عند شركه الغاز؟؟؟

**alaamousa** · 23-01-2013 04:35 AM

مكانه فين بالظبط يا كبير في الوراق عند الغاز ولا فين بالظبط

**mahmoud_anwar** · 23-01-2013 10:06 AM

المشاركة الأصلية كتبت بواسطة E_medo77

باشا مش ده اللى عند شركه الغاز؟؟؟

فعلآ

**mahmoud_anwar** · 23-01-2013 10:10 AM

المشاركة الأصلية كتبت بواسطة alaamousa

مكانه فين بالظبط يا كبير في الوراق عند الغاز ولا فين بالظبط

بص ياباشا هو امام شركة الغاز وانتا داخل من الكورنيش هيبقا علي ايدك الشمال هتلقي سوبر مركت علي نصيتة وكمان ميكانيكي علي اول النصية برضة انتا لو دخلت الشارع الضيق دة جوة هتلقي استا ياسر بجد راجل قمة الاحترام والزوق واحسن حاجة فيه وشهادة امام الله مش زي الصنيعية الي بتهول وتقولك ايه وايه انا رحت لي ميكانيكي هنا في المنتدي من غير ذكر اسامي الميكانيكي الي شغال عنده قالي كوستبنات عندك رحت لي استا ياسر قالي العربية زي الفل بس هيا عايزة ظبطة وفعلآ العربية بسم الله ماشاء الله عليها دلوقتي فقت بي نسبة 100 في 100

**Ahmed_Ramadan** · 23-01-2013 10:36 AM

متابع

**misho2008** · 23-01-2013 11:02 AM

الف شكر يا استاذ محمود على ذوقك انا هشام اللى كلمتنى فى التليفون
الحمد لله رب العالمين انو وفقنى فى خدمتك
مهندس ياسر صديقى ربنا يباركلو استاذ وعن شهادة حضرتك وضميرة صاحى مش زى اللى بيحصل اليومين دول
اعرفة بقالى 13 سنة ياسر بيشتغل فى كل الكورى وخبرتو كبيرة ما شاء الله علية

مش عايز احط رقم تليفون عشان مبيقاش اعلان عنة
انا فى خدمة اى حد لو عايزين رقم التليفون رقمى فى الملف الشخصى
وربنا يكرمك تانى

**a7mous** · 23-01-2013 11:10 AM

بارك الله فيكم وياريت اى حد عنده تجربه مع صنايعى كويس يكتبلنا عنه عشان الفائده تعم ونحارب حزب الفتايين والمستغلين وده نعمموا ويكون فى قطع الغيار والفنيين واستأذن حضرتك فى رقم تليفونه ولو على الخاص

**mahmoud_anwar** · 23-01-2013 11:13 AM

المشاركة الأصلية كتبت بواسطة mado83

ده بيشتغل فى الدايو بس ولا فى كل العربيات
وياريت لو رقم تليفونه او العنوان بالتفصيل
مع ذكر انته عملت ايه فى عربيتك والتكلفه كانت كام

هو شغال في الدايو واليباني لي اني شفت عربية هوندا وقفة عنده وميتسوبيشي وشغال كمان في البيجو وكمان الراجل ده مش شغال من دماغة الراجل ده بيشتغل بي الكمبيوتر والاعطال يعني مابيعملش شغل ويفتح شغل وخلاص

انا عملت عنده الاتي اول مرة
غيرت قعدة ماتور
تغير اورسية عقربة
وتغير اورسية بتاع الفتيس دة
واورسية علبة الدركسيون
وجبت زيت وفلتر زيت وفلاش وهو الي عملهم
وفكلي البوابة ونظفها بي البنزين تنظيف كامل
وغيرت بوجيهات وخد 120
وبعدين هو قالي ان العربية محتاجة تغير بقية القواعد وحكيتلة علي ان الفتيس بيعض معايه وهو قالي هنفك الكرتيرة ونظفة وهات 2 لتر زيت فتيس وجوان وحصل الاتي
رحت اشتريت جوان وزيت فتيس واتين قعدة البقين وتغير زيت البور وتنظيف علبة البور
وخد مصنعية 60 جنية
علي فكرة انتم هتقولة ليه هو ليه من الاول مطلبش منك الحاجة مرة وحده هقولكم لي اني رحت لي ميكانيكي في الاول وصدقت كلامة واشتريت القطع الي هو عايزها المهم بحكي لي خالي بيقولي ان العربية فيها كوستبنات وانه هيفتح الماتور ويشوف لو فيه كوستبان بايظ هيغيرة وكده المهم خالي قالي كوستبنات ايه وهبل ايه روح لي اي ميكانيكي تاني يبص علي العربية رحت لي استا ياسر بصراحة لقيت الراجل لا جاب سيرة كوستبنات ولاقالي حاجة داخل الماتور راجل محترم ويكفي انه مبيقولش لحد سبلي العربية دي الي لحظتها فيه واحد جالة قالة عندي مشكلة في الدبرياج قالي انا معايه كام عربية ومش هعرف اشتغلك فيها دلوقتي قالة ممكن تجيلي مش عارف الساعة كام قالة خلاص هسيب العربية وابقا اجيلك رد عليه رد عجبني اوووي قالة افترضنا عايز قطعة غيار لزم تكون قاعد معايه بجد انا بحب الميكانيكية الي كده الي عندهم زمة تقعد جمب عربيتك علشان يبقا علي عينك ياتاجر
والي عايز رقم تيلفون استا ياسر

01005297571

ولما تيجي تروحلة قولي وانا اتصلك بيه