الموضوع: تقرير مصور عن تركيب ليدات لدرج اللانوس

بسم الله الرحمن الرحيم

من فترة كبيرة كنت بفكر أني أعمل نور للدرج بتاع العربية وبالذات عشان بالليل لما مبشوفش خالص لما أكون عايز أجيب حاجة منو، حتى لما بكون مشغل نور السقف بردو نوره بيكون ضعيف ومش مبين حاجة..

نزلت التوفيقية اتفرج على الليدات الموجودة وكنت حاطط في دماغي اننا هجيب شريط ليدات 30سم أبيض في أزرق أو أبيض بس، وبالفعل قولت للراجل يديني واحد أبيض في أزرق واشتريته بــ 4 جنيه الشريط بالدبل فيس بتاعه.

ودي شوية صور لليدات:







ودا اللزق الدبل فيس بتاعها:



لما روحت البيت أجربه لقيته أزرق بس اتدايقت شوية بس قولت مش مشكلة أكيد هيبقى شكله جميل بالليل

المشكلة عندي في الوصلة بتاعة النور كنت بفكر هاخدها منين, وهعمل للنور زرار مستقل ولا اخليه يشتغل مع نور الطابلوه الصغير على طول, وكمان كنت بفكر آخد الوصلة من النور الفيراني بتاع الفانوس اليمين قدام بس المشكلة هعدي السلك ازاي وهحتاج كام متر سلك وشغلانة كدا

افتكرت النور بتاع طفاية السجاير كنت ناسي اللمبة دي خاااااااالص وبالذات انها كانت محروقة عندي وأنا مكنتش اعرف إن اللانوس فيها نور للطفاية أصلا لولا طارق باشا منسق القسم هو اللي عرفني

قولت تمام أوي..بدأت أفك الفبرة اللي حوالين الكاسيت..وبعديها فكيت الكاسيت من المسمارين اللي مثبتينه وفكيت فيشة الكهربا بتاعته وكابل الأريل..وفكيت العلبة الصغيرة السودا اللي بتبقى تحتيه..وفكيت حامل الأكواب كمان عشان أعرف اشتغل براحتي ومبقاش مزنوق وانا بشتغل..لحد ما اللمبة بقت قدامي..

هتفتح الدرج وتشيل الورقة اللي بتغطي اللزق بتاع الليدات وتلزقها بالشكل دا:




وبعد ما تلزق الليدات كويس هتعدي السلك من جوا الدرج ناحية لمبة الطفاية وتقشر السلكيتن بتوع الليدات وتمد اديك بالراحة تقشر السلكتين بتوع لمبة الطفاية من النص عشان ميتقطعوش منك ولو اتقطعو صعب توصلهم تاني لأني المكان ضيق أوي ورخم..المهم بعد ما تقشر السلكتين بتوع لمبة الطفاية نور نور الطابلوه الصغير ووصل سلكيتن الليدات بسلكتين نور لمبة الطفاية ولو مشتغلوش اعكس الطرفين بتوع الليدات لأن الليدات ليها موجب وسالب..أهم حاجة انك تتأكد ان الليدات شغالة قبل ما تقفل..ولو كلو تمام لف حتتين شريط لحام عليهم:






بعد ما تلف شريط اللحام وتتأكد من عزل كل حاجة كويس عشان ميحصلش قفلة ابدأ قفل كل حاجة تاني حامل الأكواب والفبرة اللي تحت الكاسيت ووصلت وصلات الكاسيت(وصلة الإريال والكهربا) وركب الفبرة اللي حوالين الكاسيت..

مبروك كدا انت ركب الليدات..ودا الشكل النهائي :







ميزة الليدات دي إن نورها قوي بيخليك تشوف كل حاجة جوا الدرج والأهم من كدا ان منظرها جامد جدا بالليل لما تفتح الدرج، وكمان بتشتغلها وتقفلها مع نور التابلوه بدون زرار مستقل.

التكفلة الإجمالية:

7 جنيه (4 جنيه الليدات + 3 جنيه شريط لحام فقط)

ها إيه رأيكو؟