الموضوع: طريقة تعديل الشارك ل gt وعيش مع الوحش الياباني

والله العظيم انتا نجم والعربيه دي اكتر عربيه مظلومه في مصر
وباذن الله يوم مشتريها والمكنه تبتدي تتعب اعمل فيها كد بس يارب ارزقنا بيها يارب

الله ينور هو ده الشغل ولا بالاش
انا عندى استفسار بأه مدوخنى وعمال الف شمال ويمين ومحدش وجهنى
انا عايز اغير الطنابير الخلفيه الى ديسكات ينفع ولا لا ولو ينفع ايه اللى هيتغر بالظبط ولو حضرتك تعرف التكلفه ايه بالمره
وده علشان الطنابير كل شويه تترجلش والفرامل الى حد ما بتخف منى فى وقت قصير اكون شاكرررر ليك

المشاركة الأصلية كتبت بواسطة khaledmekawy2008

السلام عليكم ورحمة الله وبركاته

هكتبلكوا عن طريقة تعديل الشارك ل جي تي زي اللي كانت معايا للي هاوي يركب حاجة من الاخر ويقتني عربية ابسط كلمة تتقال عليها انها جبارة

اولا انا كان معايا شارك 1500 سي سي كويتي بالصب والزينون وكل الكماليات.من كتر حبي فالعربية قلت اعليها في كل حاجة بس بالطريقة الصح وهقولكوا باالتفصيل

1-تنزل الحرفين وتروح عند اي حد عنده حاجة الشارك زي ملك اللانسر او السعدني ودول من اكتر الناس اللي عندهم حاجة الشارك بس غالين واحيانا بيبقي في عدم مصداقية فخد بالك وانا بنصح تروح لعادل وجدي راجل محترم جدا وشغله نضيف جدا

2-هتدخل موتور عربيتك في موتور 2000 سي سي وده هيكلفك 7 الاف جنيه بالحاجة بتاعته كلها زي الفتيس وعلبة الدركسيون والكبالن والكمبيوتر والضفيره الخارجية مع فرامل سكاكين خلفية وهات معاها الطنابير الكبيرة عشان بتفرق جامد وتاكد ان لقمة التيل موجود منها لان في منها انواع مش موجود عندنا وبتختلف من طنابير للتانية وافضلك انك تقولوا يشيل المساعدين اللي عندك ويديك العفشة بتاعت العربية اللي متاخد منها الموتور لان المساعدين بيبقوا اقوي لكن محدش يعرف الموضوع ده وهيقولولك العفشة واحدة هي هي بالظبط لكن الحقيقة ان المساعد نفسه بيبقي مختلف ومبيبانش

3-متنساش تقولوا علي عمود الاتزان الخلفي وانك لازم تاخده مع الموتور عشان في ناس مبتطلعوش الا بفلوس

4-paddle shifters بتركب علي عصاية فتيس معينة عشان في عصاية فتيس بتنزل مع المواتير ال 2000 من غير + او _ ودي مكنتش عندي لما ركبت الموتور وطلبتها بعد كده واتكلفت 1000 جنيه بعصاية الفتيس

5-نيجي للجنوط ال18 ودي حاجة ترجعلك عايز تركبها مفيش مشاكل بس عايزة انك تحافظ عليها لابعد درجة وتتحمل تكلفة الكاوتش لانه بيبقي غالي جدا الفردة بتعمل 850 جنيه للكومهو الكوري والبريدجستون الياباني الفردة بتعمل 1500 جنيه فرق رهيب هتحسه فالثبات وعالملفات

سعر الجنوط 5 الاف جنيه وومكن تدخلهم في جنوط عربيتك وتدفع فرق الف جنيه متخليش حد يضحك عليك لان سعر جنوط عربيتك ب 4 الاف جنيه لو حالتهم تمام

6-نيجي للاهم بعد تركيب الموتور وملحقاته هينورلك فالتابلوه لمبة ال check engine w abs w sterring wheel وده راجع لان الباور بقي زيت مش كهرباء والعربية الضفيره الداخلية بتاعتها متعرفه علي الباور الكهرباء فيظهرلك الخطأ ده لكنه عادي جدا

لمبة abs w check بتروح التوكيل وتدخلها علي الكمبيوتر وفي 5 دقايق كله هييطفي

في حاجة كمان الجنوط ال 18 فيها حساس للضغط وده هيشتغل لو انت مركب الضفيره الداخلية للنص اللي انت واخد منه الموتور والافضل انك متركبهاش لانها بتلعب في اساسيات العربية وسيب الضفيره الداخلية زي ما هي لانها روح العربية

7-اكشف علي موتور عربيتك وشوف الكبس نظامه ايه واتفق مع البائع علي انه لازم ميقلش عن 82 % ويديك حاجة نضيفة وتقوله ان ليك ضمان عالاقل اسبوعين تجرب فيه الدنيا لان لو فيه اي حاجة بترجعله وهو اللي يتحمل اي حاجة

8-بتغير زيت للموتور وزيت الفتيس بيبقي الاحمر لانه فتيس سي في تي زي بتاع البوما معاه تيبترونيك + و _

9-بتحط فالكاوتش نيتروجين وتظبطه علي 30 وتظبط زواياك وترصص

10- الافضل بالمره انك تغير فلتر بنزين وفلتر الهواء



نيجي للتغيرات اللي هتحس بيها ::

الموتور ما شاء الله قوة رهيبة جدا وعزم لا يضاهي حتي في اي 2000 سي سي شد مع اي حد 2000 ستوك وهتعلم عليه مستريح جدا جدا تجميعه من صفر ل 100 في 8 ثواني بالظبط
الموتور بيسرح يعني ممكن تكون دايس دوسة عادية وفجاة تلاقي نفسك 170 180 وانت مش حاسس

استهلاك البنزين مش هيزيد و عايز اقولكوا ان استهلاكه زيه زي اي عربية 1600 بتعمل 7 لتر كل 100 كيلو في المشي الهادي علي سرعة 100 فعلا المايفيك من احسن المواتير في استهلاك البنزين

الثبات هيختلف تماما هتحس انك راكب عربية سباق عمرك ما هتحس بفرق عن الالماني في اي حاجة وخد الملفات بسهولة جدا من غير تعويم ولا انحراف عن المسار

التكييف هيبقي اقوي وهيسقعلك اكتر لان الكباس بقي اكبر

الباور هيبقي لا هو خفيف اوي ولا هو تقيل لكن عالسرعات العالية هيتقل معاك جدا وده عشان يزود الثبات

هيبقي معاك مثبت سرعة وبلوتوث وتليفون ولو هتركب البلوتوث ليه سعر لوحده الف جنيه بالمايك بتاعه

من الاخر لو ركبت lancer ex gt هتحس يعني اي عربية sport بمعني الكلمة بس لازم تكون دقيق جدا فالكلام اللي انا قولته وتكون متابع عربيتك كويس وتكشف عليها صح

ولو عايز تكمل الليلة اشتري كبوت كاربون فيبر بتاع الايفو وسعره 3500 جنيه بس شكله حكاية عالعربية

والف مبروك علي الوحش الياباني اللي كنت بحسد نفسي اني كنت من ملاكه زمان وحاسس بشئ من الندم اني فرطت فيه :oc_sun1[1]:

ولو في حد عنده اي استفسار انا تحت امره..
وكل سنة وانتوا طيبين

كلام حضرتك رائع جدا وجميل بس وقت التركيب وتجميع الكلام ده كله هيظهرلك مشاكل ده لو افترضنا حاله الماتور كويسه جدا ثم من غير كل الكلام ده ممكن تركب تربو على ماتور ال 1500 وهيجيبلك نفس التوقيت والتسارع بس تركبه عند واحد بيفهم اما الفرامل فممكن تجيب كيت كامل اجهزه وطنابير ورا وقدام بالسيرفو بتاعه اسبور وطبعا خزنه الفرامل اللي بكلم عليها ديه قد بتاع الانسر عاديه مرتين تلاته في الحجم ياعني فرامل انسى من غير توجع دماغك فك وتركيب وحل ماتور وترخيص جديد ودفع ضريبه اكبر واستهلاك بنزين اعلى والعربيه فابريكه يعتبر ده رأيي الشخصي