السلام عليكم يا هونداوية

الموضوع ده عامله عشان تجربة في الجيل الثامن و حابب افيد بيها اصحاب الجيل الثامن

و هي بخصوص تيل الفرامل

انا جيبت العربية في شهر 9 اللي فات و على شهر 10 كده احتاجت تيل فرامل امامي

طبعا بصيت عالمواضيع اللي بتتكلم عن التيل بتاع الجيل الثامن و لقيت ناس بتقول ان الاصلي بيقعد تقريبا 10000 كم و بعدين بيخلص و سألت عليه لقيته كان بمبلغ 580 تقريبا و 10000 دول مش حيمشوني 3 4 شهور

المهم توكلت على الله و قلت يا واد انزل دعبس كدا شوف ايه الانواع الموجودة , نزلت جمب مني في المعادي شارع اسمه احمد زكي فيه ناس بتوع قطع غيار دورت لحاد ما لقيت واحد من بتوع الياباني
سالته قالي عندي نوع كوري بس مضمون قلتله وريهولي بصيت لقيته خامته معقولة , بكام يا عم 175 اخدته و رحت ركبته عند عصام و انا بقول يا صابت يا خابت و حاطت في دماغي حسمع صفير و حشم ريحة و فرامل اقل كفاءة و طبعا حيقعد شوية عشان الاصلي بتبقى خامته نضيفة فبيتاكل عشان يحمي الطنابير

و كانت النتيجة

اول ما ركبت التيل طبعا مدوستش فرامل جامد سيبته ياخد راحته في التطبيع لمسافة 30 كم مثلا بعد كده ابتديت احمل اكتر و اكتر لحاد مشميت ريحه قلت ياد اديله فرصته اليوم اللي بعديه ريحة بس اقل اللي بعديه مش باينة اللي بعديه مفيش اي روائح و جربت ازود عليه الحمل و اجري و ادوس كذا مره عشان اشوف لما بسخن بيستهبل ولا ايه بس الحمد لله كان كويس

مفيش اي نوع من انواع الصفير نهائي

والمفاجئة انه خلص بعد 10000 كم في 3 شهور يعني خامة نضيقة و بتتاكل و دي حاجة كويسة عشان الطنابير ميجرلهاش حاجة

ملحوظة : انا سواقتي نوعا ما رياضية مابين ا 3 و 4 ار بي ام و بستعمل فرامل كتير و طريقي دائري على صلاح سالم و سافرت كذه مره في الفترة دي

المشكلة بقى معرفتش اسم التيل ايه و رميت العلبة
بس الحمد لله النهاردة و انا بجيب من واحد بتاع قطع غيار في الحرفيين قالي في نوع ماليزي و نوع اسباني قولتله مش في نوع كوري باين قالي اه صح تصدق و دخل جابهولي قفشت فيه و قلتله هوا دا

اسمه hi tech و ركبته و رجللشت فرامل ورا و غيرت زيت الفرامل بالكامل و الدنيا تمام الحمد لله

بالمناسبة الاصلي في توشكا ب 770 جنيهااااااا

اسف عالاطالة بس حبيت اشرح كل التفاصيل