الموضوع: فوجات البي واي دي ... دراع النور لتشغيل الفوجات

المشاركة الأصلية كتبت بواسطة ehabpopo

شكرا يا بيتر على المعلومة القيمة .... ممكن تقولنا على اسعار التركيب ... ده اولا
ثانيا : انت لية ماصورتش تركيب الشبورة ... علشان الناس بردة تتأكد ان فيش الفوانيس موجودة وواصلة للاكصدام ... احنا عارفين كدة بس زيادت تأكيد برده للناس اللى عايزة تتأكد ... واحكيلنا هو عمل اية بالظبط فك الاكصدام كلة ولا فك الكرتيرة من تحت الاكصدام فقط ولا عمل اية بالظبط ... وشكرا ليك يا باشا

بص يا استاذ ايهاب
بالنسبة لسعر التركيب هو خد 30 جنية حق تركيب و 20 كتاوت لزرار الشبورة التاتش علشان يحافظ علية و قالى كدة يعش معاك عمر طويل
بصراحة حكاية الصور دى مجتش فى بالى لان استاذ ابو جينى قال انة ركبهم و حضرتك اشتريت الكشافات فقلت يعنى انا مضفتش اى جديد و بعدين انا رحت بالليل و هو راجل كبير فى السن و كنت بساعدة شوية فجاش فى بالى ان اصور
انا هنزل ابص على حاجة بالنسبة لنور الاكصدام الخلفى علشان انا شوفت افكار و عايز اشوفها فهصور الشبورة و ارفعها كمان شوية
بالنسبة للتركيب
فك مسمرين بس اللى فى اخر الكرتيرة و فك مسمار الماكيت اللى منظر و شد الفيشة و ركب الجديد و ربط تانى كل حاجة و بعدين قعد يظبط مفتاح الشبورة و بعدين راح مركب الشبورة التانى و بقى تمام
بس انا اخدت وقت علشان هعدنا نتكلم على السيارة و التوكيل
على فكرة الراجل دة بيصلح الامبوليزر بتاع العربية و لحد ما ساب التوكيل بمشكلة بيبعتولو تصليح لحد دلوقتى على كلامة و ساعات بيبعتلوة شغل من فرع الشرابية و كان عامل اختراع امان للعربية حلو لدرجة انك لو نسيت المفتاح فى العربية و نزلت منها و مشيت لو حد حب يشغلها و يمشى تعمل انذار و متتحركش و قالى دى برأة اختراع وورانى جرنان كان عامل معاة حديث على الانذار الجديد
و بيصلح اى اعطال كهربا فى العربية وورانى قطع الغيار
بأمانة راجل عفريت و زى العسل -- الراجل دة بالنسبالى كنز علشان انا كنت سألت كتير و عرفت من مش اى حد يعرف يتعامل مع كهربائ العربية
فكنت عمال ادور على حد جرب كهربائى كويس و الحمد للة وصلت و قلت افيد اللى بيدور بردو

المشاركة الأصلية كتبت بواسطة bassem.naguib

ألف مبروك يا بيتر باشا .. ومستنيين المزيد من الانطابعات عنها وعن تركيبها .

وبالنسبة لقوة الفوجات .. مسألتش ليه إذا كان ممكن يركب عليهم حاجة أقوى من غير ما تأثر أو يحصل ضرر في حاجة .

ها يا شباب حد ليه تعليق أو إضافة تتقال .

اللة يبارك فيك يا استاذ باسم
بالنسبة للتركيب انا لسة كاتبة لاستاذ ايهاب
قوة الاضائة ضعيفة -- انا كنت هجيب لبمات فيلبس رالى 55w - h3
بس لما لفيت على النت لقيتها قليلة فى السوق ول ما سألتة قالى هات واحدة من اى واحد بتاع كماليات سيارات ملقتش غير 100 وات و دة كتير على الكشاف
و بصراحة انا كنت فرحان و مستعجل انى اركبهم و خصوصا لما عرفت انهم هيركبو على مفتاح الشبورة دة
بالنسبة للضر على المفتاح
هو ركبلى كتاوت للمفتاح نفسة مش للكشافات علشان تحمى المفتاح
و فى نفس الوقت قالى انة شغل الكشافات نفسها على الكتاوت بتعات العربية و قالى انها 55 وات
و ممكن اجيب اى لمض عايزها و ابقى مطمن و بقى يسمعنى كل ما يشغل و يقفل فى صوت طالع من الجزء اليمين من التبلوة قالى دة صوت الكتاوت الاصلى اللى شغالة علية الكشافات
انا شارح كل حاجة و اى استفسار انا موجود --
و ياريت لو فى مقابلة يا استاذ باسم ابقى نبهنى برسالة خاصة لانى مش بدخل كل يوم و بنسى اصلا - معلش هتعبك معايا

المشاركة الأصلية كتبت بواسطة ابوجنى2112

مبروك يابيتر........ بس خلى بالك..... ( كلام اخوك الكبير يصير ياحسنين ) اقرأها بالصعيدى....ههههههههه.
مفتاح الشبورة الخلفى ..فيه احتمال.. انا بقول اهه..فيه احتمال ...
لما تغير اللمبات ...وتجيبها 55 .. نوع نضيف... زى فليبس رالى مثلا.... انه يبوظ..
طيب مادام هو عدل فيها أصلا ..كان ركبها على النور الصغير اللى هو فى الدراع الاصلى.. وبدون اى تعديلات منه...
اللهم بلغت.... اللهم فاشهد......ومبروك مرة تانية ياحبيبنا.... وارجو يكون توقعى مش فى محله...وكتاوت الشبورة الخلفى هو
الحكم...
وفليبس رالى تباع عند توكيل هاشم باص... ولكن اسف انا مش فاكر العنوان حاليا...اصلية ونور 100/100

اللة يبارك فى حضرتك
انتم السابقون و نحن الاحقون -- جول يا كبير
بص حضرتك يا باشا
هو خيرنى انى اشغلة مع النور الصغير فعلا يعنى اول ما اشغل نور التبلوة ( اللى هيا اللمبة اللى زى السهارى ) الفوجات تشتغل
بس انا مردتش لان نور الشبورة معروف انة بيتحرق كل شوية و بيسخن و كلة مشاكل
فقلتلة انا عايز اتحكم فية منفصل سواء مع العالى او الواطى او السهارى اطفية و اشغلة زى ما احب
بالنسبة لزرار النور هو زى ما ذكرت ركب كتاوت امبير عالى مخصوص للزرار علشان يحافظ علية و فى نفس الوقت شغل الكشافات على الكتاوت الاصلية للعربية و لما سألتة قالى هات اى لمض 55 واط و ابقى مطمن من الزرار و من الكتاوت
و هستأذنك لو افتكرت فين مكان التوكيل او تيلفونة قولى لان حضرتك ركبت الفوجات و شوفت نورها عامل ازاى
تحس انة عايز زقة علشان يقوم هو منظر فقط
بس عايز اقولك ان حضرتك اللى شجعتنى على نور الشبورة
شكرا