ليه الشركات مبتحترمش الايجبشن عميل ؟
السلام عليكم
ليه الشركات في مصر و طبعا على قمة الهرم توكيلات السيارات مبتحترمش العميل المصري ؟
شوفنا شركات كتير زي فودافون و شركات الاتصالات مثلا بتغلي على مزاجها و تفرض ضرائب من وحي خيالها على العميل .
شوفنا شركة تسويق اليكتروني اسمها " جوميا او Jumia " بتعمل مسابقات وهمية و بتغلي في اسعار المنتجات و بتوصلك طلبك بعد ما توصل لارزل العمر برغم ان اعلانتها مالية الدنيا !! .
و الامثلة كتير حتى بياعين المحلات و السوبر ماركت معاملتهم احيانا زي قفاهم .
و اخيرا توكيلات السيارات و الصراحة الشتيمة واقفة في زوري و الصراحة محدش يقولي كل الغلط على الحكومة و الجهات الرقابية ، ايوة عليهم طبعا مسئولية كبيرة لكن احنا كعملاء لاي شركة ليه مبنعرفش نضغط عليهم علشان يتظبطوا شوية
ليه الناس كلها بتشتكي من التوكيلات و المعاملة الغير ادمية و برغم كدا بنرضخ و بنسكت زي ما بنسكت على حاجات كتير و الاحتجاجات لا تتعدى الحالات الفردية ؟
فين الجماعات و الروابط - جمع رابطة - و الاتحادات علشان يوجهوا مثل هذه المشاكل الي ممكن تتحل في يومين ضغط و يفضل تأثيرها مدى العمر ؟
مش لازم تكون متضرر علشان تقف جنب اخوك المتضرر لان ببساطة شديدة ممكن يجي يوم عليك و تبقى مكانه و محدش هيقف جنبك
اظن وسائل الاتصالات دلوقت مفيش اسهل منها فيا ريت تتفعل المواضيع دي و نجيب حقنا بنفسنا و بمنتهى الادب و الاخلاق و الاحترام .
و ان شاء الله الي جاي احسن و الناس الي بتاخد فلوسنا تدينا خدمات و معاملة محترمة .
وشكرا