الموضوع: زيارة اتوماك و البحث عن سيارة مناسبة لصاحبى

واحد صاحبى طوله ما شاء الله حوالى 2م عاوز يشترى عربية زيرو ، رحنا زيارة لأتو ماك نشوف الصنى و التيدا وباقى العربيات الموجودة فى السوق.

صاحبى جرب النيو صنى و التيدا و قال ان ما فيش فرق فى الوسع و احنا كنا ركبين وراه و الدنيا زى الفل كمان. طبعا تقفيل التيدا أعلى من النيو صنى .

رحنا قسم كيا و صاحبى اتبسط جدا من ركوبة الكارنز لأن الكرسى عالى و مساحة السائق و اسعة جدا و الشنطة كبيرة جدا و عالية و كمان عاملين شغل فى الأرضية و مقسمنها بشكل ذكى و جميل. المشكلة بقى ان أول فئة بدون ايرباجز أو ABS بكاااااااام 140 ألف بلبل يا رجالة و الفئة الأعلى بقى اللى فيها الايرباجز و ال ABS بكام بقى يا جدعاااااااان 157 ألف
بصراحة اترحمت على الليفينا اللى اللى كانت محتاجة شوية دلع و حملة تسويق محترمة و كانت ها تخد شريحة محترمة من السوق و ترحم الشعب من الافترا بتاع كارنز .

طبعا ما عرفناش نحشر صاحبى فى الريو و لما رجعنا الكرسى للأخر كان الفرق بينه و بين الكنبة الخلفية قبضة ايد بالظبط.

لما بقى شفت السيراتو الجديدة و الالنترا اللى عديت 170 الف ( Fully Loaded) اكتشفت ان الواحد لو معاه 150 الف جنيه مش ها تفرق معاه اى حاجة الا شوية اوبشنز زيادة مش متأكد انى هاستخدمهم كلهم. هنا بقى اترحمت على البلوبيرد سيلفى اللى كانت حاجة ملوكى من جوه و سابقة كل الموديلات دى و مش عارف برضو ليه ما كمليتش فى السوق المصرى العجيب !!!!!!

ركبت القشقاى ، خامات محترمة و مساحة سائق جميلة بس ضيقة حبتين فى الكنبة الخلفية ، بس السقف البانوراما تحفة ، و طبعا مش ها تستمتع بيه الا اذا كنت راكب ورا و مش سايق

رينو بقى كان معرضه يسد نفسك لأن البنات اللى مفروض يساعدوك و يعرفوك على العربيات كانو قاتحين العربيات و قاعدين جواها و مكبرين دماغاتهم من الزوار .......
بس أحل حاجة عجبتنى هناك الفلونس من بره بس أنا كنت شفتها زمان من جوه و معجبنيش مستوى الفنيش ....مش عارف اذا كان اتحسن و لا لأ .

البيجو بقى عاملين شغل عالى فى العربيات بس من جوه حاطين حتة كونسول بين الكرسين فيه حاجات كتييييييير قوى بس ضخم جدا بشكل يضايق

العربية اللى خطفت قلبى و عقلى بصراحة كانت الرانج روفر ....... ربنا يكرمنا و نركبها فى الجنة بقى

المشاركة الأصلية كتبت بواسطة abu3aly

بكرم ربنا و فضله ها نركب بساط اريح فى الجنة كمان مش العربيات التعبانة بتاعتنا دى ..... ربنا يجازيك خير و يكرمك فى الدنيا و الآخرة

الف شكر على الدعوة دى انت ما تعرفشى بسطتنى قد ايه

ربنا يكرمك و يظلك بظله فى يوم لا ظل فيه الا ظله

تحياتى