زيادة سعر نيسان صنى 2013

**MELKASHEF** · 31-01-2013 01:51 PM

السلام عليكم

أولاً: أنا بأحب أولا أشكر كل الناس اللى بتشارك فى المنتدى وبتحب تفيد الناس التانية لانى اتعلمت منهم يعنى إيه إنك تفيد غيرك وتكون سبب فى إنو ما يقعش فى مشاكل وقعت انت فيها فتخليه أسعد بشك أو بآخر.

ثانياً: أنا آسف على الخبر اللى بأنقلهولكوا ده بس حبيت أشارك بأى معلومة أكون عرفتها.

ثالثاً: أنا إمبارح روحت علشان أحجز الصنى 2013 من أوتو إيجيبت مدينة نصر. هناك قابلت الأستاذ أحمد حسن - كان ذوق جدا سواء معايا أو مع غيرى اللى اتعامل معاهم قدامى - وقبل ما أحجز قالى إنه الصنى سعرها حيزيد من 2000 ل 3000 جنيه مع بداية فبراير. وقالى أنا بقولك كده علشان تبقى عارف قبل ما تحجز.

ده معناه إن سعر الصنى حيبقى من 106000 ل 107000.

أنا سألته إن كان فيه زيادة حتكون بعد كده وهوا قالى إنه إن شاء الله مش حيكون فيه لو الدولار استقر عند الزيادة الأخيرة.

أخيرا الاستلام لسه فى خلال 3 شهور والحجز كان بلونين - رغبة أولى ورغبة تانية - وسعر الشراء هوا السعر عند الاستلام.

ربنا يوفقنا كلنا يا جماعة ويارب الصنى ماتغلاش تانى.