يا سواقبنك يا مصر....؟

**Mido80** · 28-07-2008 06:20 PM

السلام عليكم ورحمة الله وبركاتة. طبعا انتم عارفين انا بقالي اسبوعين نازل اجازة من قطر لمصر بعربية. انا ساكن في الجيزة وطبعا انا جايب العربية معايا عشان اتنقل بيها. انا طبعا كنت فاكر الحياة وردية وقلت ان قانون المرور الجديد هايخلي الناس تحترم المرور بس للاسف حدث ما لم اتوقعة. السواقة في مصر غشم وتخلف واستهبال لاقصي درجة ممكنة. دة غير الزحمة والناس اللي بتعدي الشارع بدون ما تبص شمال ولا يمين. اتحرق دمي خلال الاسبوعين دول ومش عارف اعمل ايةلدرجة اني في مرة ركنت العربية واستعملت المواصلات العادية بس طبعا كان الوضع اسوء حالا لان سواقين الميكروباص عندنا عندهم مهارت عالية جدا في السواقة وتخبيط الناس في الشارع دة غير الالفاظ المحترمة اللي بيستعملوها طول الوقت. المصيبة الكبري بقي في شرايط الكاسيت لمطربين (قصدي مطرشين) اللي دايما بيشغلوها ويسمعوها للركاب غصب عنهم. قرفت وتعبت ورجعت اتحرك بالعربية بتاعتي تاني بس المشكلة اللي حارقة دمي هي المكان اللي اركن فية العربية. كل ما اروح مكان لازم اخد معايا حد اسيبة في العربية لانها ممكن تتخبط او تتسرق او يجري لها اي حاجة. ربنا يرحمنا

**MTAK** · 28-07-2008 06:57 PM

هدى اعصابك يا باشا
ده لازم يحصللك علشان تحلف بالغربه و سنينها
للأسف

**MoToRiZeR** · 28-07-2008 07:56 PM

ده إحساسي اليومي ..

**OlaOsman** · 28-07-2008 08:04 PM

زي ما موتوريزر قال لك بالظبط.. كل اللي بتشتكي منه ده هو روتين حياتنا اليومية في مصر.. و ده أهون حاجة كمان بالمقارنة باللي يحصل في المواصلات العامة.. النهاردة لسه سامعة خبر ان مترو حلوان بقاله 6 ساعات واقف عطلان في محطة الملك الصالح و الناس كسرت إزاز العربيات بتاعة المترو و نزلوا مشيوا على القبضان

**Mido80** · 28-07-2008 11:27 PM

طب الحال الازرق دة مالوش حل ولا هانفضل عايشين كدة في غابة ؟؟؟؟

**MoToRiZeR** · 28-07-2008 11:32 PM

ليه حل طبعا .. حضرتك ترجع قطر و احنا كل واحد يشوفله حتة يروحها

**CBR** · 29-07-2008 12:44 AM

السواقه مش وحشه اوي كده في مصر انا كنت فاكرها مقرفه وهمجيه

بس لذيذه كانك داخل سباق او حاجه على ايه مش عارف بس اهو

بس لا تقارن بقطر شوارع نضيفه واخلاق

مع ان السواقه في قطر بقت مقرفه بردوا وزحام والناس مبتعديش اي حد انانيه

حاول تتأقلم معاهم في مصر

وسواقين الميكروباص الي يزنق عليك زنق عليه

بيخافوا على فكره لما بيلاقوا الواحد مجنون وبايعها

حاول تخلي معاك مهدئات في السياره (ح..ش ب.و) ههههههههههههههههههه

ومتنساش طبعا انك تربط حزام الامان

عشان محدش يستغلك

سمي بسم الله واستعيذ بالله من الغضب

ولما تيجي تطلع خصوصا انك جاي من قطر

ابعد عن فترة 12 الضهر لغاية 4 العصر

وربنا يحفظك

سلام

**دموع الثلج** · 29-07-2008 05:37 AM

انت غلطان لانك بكل بسا طه لو كنت سالت اى قطرى او مصرى نزل بعربيته هيقولك بلاش تنزل بعربيه

سعادتك سمعه مرور مصر المحروسه وسواقه المصريين مسمعه فى كل الدول العربيه ده احنا اشهر من النار على العلم فى همجيه المرور واللى راكبين عربيات الا من رحم ربى طبعا

وكفايه القرف اللى الواحد بيشوفه من بتوع الجمرك على الحدود يخليك تحرم تدخل البلد دى بعجله حتى

النصيحه بقى حضرتك تغمض عينك وتسد ودانك وتركب عربيتك وتعمل ذى ما كلنا بنعمل مقضينها غرز وتزنيق وبلطجه على بعض

كان نفسى اقولك نورت مصر بس مبقاش فيه مصر