الموضوع: تقرير عن تركيب مساعدين شيرى qq

[justify]السلام عليكم ورحمة الله وبركاته[/justify][justify][/justify][justify]
بإختصار شديد أنا معايا شيري qq مو 2004 والحمدلله رب العالمين العربية ممتازة جدااا وحلال كل جنيه دفعته فيها ... يعني دى شهادة حق عن تجربة ... ندخل ف الموضوع وهو إن حالة العفشة أصبحت سيئة جداااا وبعد الكشف عليها لقيت لازم أغير جوز المساعدين الأمامي لإنهم ضربوا زيت خلاص ومش نافعين نهائيااا ... طبعاً بعد رحلة قصيرة من النزول للتوفيقية والسؤال بالتليفون فى محلات كتير ف التوفيقية والمعادى وشارع دمشق ربنا وفقني لمحل إسمه "العسكرى" وهكتب بياناته فى أخر التقرير وجبت من هناك جوز مساعدين أمامي صينى بـ 350 جنيه ... ولقيت الجوز الخلفى kyb ياباني بـ 250 جنيه وانا ناوي أغير الخلفى قريب إن شاء الله ..
والحمدلله ركبتهم عند واحد عفشجي ف المنطقة والقصة كلها لم تستغرق ساعة على بعضها والمصنعية كانت 40 جنيه بالظبط ... والحمدلله بعد التجربة حسيت بفرق كبير وثبات أحسن بكتير طبعااا ولكن مش هيظهر الأداء الحقيقي للمساعدين غير بعد 4 مشاوير ع الأقل ... تم التركيب بتاريخ اليوم 1 فبراير 2013 .
أما عن محل "العسكري" بصراحة ناس زي الفل وأسعارهم من الأخر وأفضل من أبو عوف كمان ... بالمناسبة أبو عوف مكانش عنده المساعدين وقال أفوت عليه فى خلال اسبوعين تلاتة !!!!!!
عنوان وتليفون المحل : 14/16 سوق التوفيقية - المول التجارى - الدور الثالث .. تليفون 25780371 - 01001059479 - 01143991991
أسعار لبعض القطع الأخرى اللى سألت عنها : غطاء قربة مياه 15 جنيه - سير كاتينة (تقسيمة) 80 جنيه - تيل فرامل أمامي 50 و 55 جنيه - تيل خلفى أصلى 100 جنيه - طقم دبرياج 350 جنيه[/justify]
دى صورة المساعدين الأمامي قبل التركيب وطبعا من غير السوست لإنك مش هتغير السوست غير لو كانت مكسورة أو فيها لحامات مثلا ... لكن بخلاف ذلك عمرك ما هتحتاج تغير السوست

مبروك

المشاركة الأصلية كتبت بواسطة dr/ p.k.sh

مبروك

الله يبارك فيك ^__^

الف مبروك يا باشا ..

الله يبارك فيكم جميعاااا

المشاركة الأصلية كتبت بواسطة madalovmada

الف مبروك يا باشا - واستفسار صغير شغل الميكانيكا بتعمله عند مين غير التوكيل
وسكان العربية عند مين برضه غير التوكيل

الله يبارك فيك .. بصراحة موضوع الميكانيكا ده هو اللى كنت سألت عليه هنا ف المنتدى من فترة وأحد الأخوة نصحني بواحد اسمه عماد الميكانيكي ف فيصل ... بس لحد دلوقتي محصلتش فرصة إنى أفوت عليه لإني عاوز أغير سير التقسيمة أو الكاتينة وخايف اى حد مش بيفهم يركبه غلط ... إنما موضوع السكان بالكومبيوتر بسيط جداااا وتقدر تعمله عند اى كهربائي عنده جهاز كشف أعطال طالما موديل العربية موجود ع الجهاز عنده .. فى كهربائي اعرفه ف شارع المطبعة ف فيصل عنده جهاز الاعطال ده وكنت عملت عنده شغل قبل كده بعربية بونتو وصلح أعطالها بالكومبيوتر .. اسمه الشيخ مصطفى وهتلاقيه ف نهاية شارع المطبعة من فيصل قبل ما تحصل الدائري

الف مبروك على المساعدين بس كان عندى استفسار عن معدل استهلاك البنزين ؟ انا معايا موديل 2006 بتعمل 200 فى الصفيحه جوه البلد بس حاسس انها كده بتاكل بنزين

المشاركة الأصلية كتبت بواسطة michael rafik

الف مبروك على المساعدين بس كان عندى استفسار عن معدل استهلاك البنزين ؟ انا معايا موديل 2006 بتعمل 200 فى الصفيحه جوه البلد بس حاسس انها كده بتاكل بنزين

هو انا اللى معايا 850 سى سى ... بتعمل جوه البلد بين 11 و 12 كيلو ف اللتر يعني ف الصفيحة بتعمل حوالى 220 كيلو ... بالنسبالي المعدل ده ممتاز جدااا خصوصا إن مشواري اليومي بتاع الشغل زحام شديد ... يعني شارع القصر العيني وكوبري الجامعة وكمان شارع الجامعة وكلها ما شاء الله واقفة ع طووووول ... متهيألي ف السريع هتعمل معدل أحسن من كده بكتير بس لسه مجربتهاش ع السريع
بالمناسبة أنا والدي معاه qq برضو مو 2006 والموتور 1100 سى سى ... المعدل بتاعها نفس الرقم اللى إنتا قولته تقريبا