الموضوع: يعنى دا يرضى مين يعنى

السلام عليكم

راجع انبارح ومعايا اولاد اختى كنت فى مشوار المهم حظى الواقف ماشى من الطريق بتاع ميدان الشون والاقى شوية من الناس بتاعة التيار الشعبى موقفين الطريق 5 عيال يا جدعان وربنا ومش حد هيعدى , راجل كبير يقوله يا ابنى احنا تعبانين وعاوزين نروح نشوف بيوتنا ومصالحنا يقوله مالناش دعوة لازم نسقط النظام ,الراجل يقوله نظام ايه اللى تسقطه يا ابن الكلب انت وهو روح شوفلك شغلانة وبطلوا قلة ادب وبلطجة على مخاليق ربنا . لقيت لك واحد منه مطلع مطواة وفردها على الراجل ويقوله انت شكلك اخوان وبينده على اتنين واقفين بعيد كدا ,انا قومت نازله من العربية وسحبت الراجل من ايده ولقيت واحد منهم بيشتم وبيقل أدبه عليا والله لولا خوفى عالعيال كنت مسكت فيهم لكن سبته ورجعت عالعربية بعد ما دخلت الراجل عربيته ولقيت واد منهم بيزعق وبيقول الراجل يجيلنا هنا , وهو لقيت واد بتاع ميكروباص مطلع له سيف وراح ضارب الواد فى رجليه شرحها ولقيت العيال الباقية طلعت جريت والطريق اتفتح .

اروح البيت الاقى الصفحة بتاع اخبار المحلة تبع واحد من التيار الشعبى كاتبين ان الاخوان اتهجموا على الثوار واصابوا واحد بالسيوف . الكلام دا كان قدامى يا جدعان ومحدش بيعوز يصدق

يرضى دا مين يعنى يا عالم اللى بيحصل فى البلد دا والناس بجد ذنبها ايه وقف المصالح وقلة الادب والبلطجة اليومية من الثوار الجدد دول , فى شرع مين دا ان يكون الارهاب دا مباح ومتاح تحت اى بند من البنود .فى شرع مين تضرب واحد عشان مختلف معاك فى الرأى وفى شرع مين تحرق عسكرى امن مركزى وتهاجم منشآت وتعلن استقلال محافظة كل يوم .

اللى يقول اخوان يقول انا مش محتاج ادافع عن نفسى من انى شخص غير مسيس بس ما تقلبش الحقايق وتزور فى الحقيقة اللى الناس شايفاها وفى الاخر تطالب الناس تحترمك وتقول انك بتجيب حقهم وانت اول ناس بتعطل مصالحهم وبتهددهم بالبلطجة وقلة الادب.

ولا حول ولا قوة الا بالله

أولا هى فعلا غلطة منى انى حطيته هنا هى غلطة غير مقصودة ولو ان هناك للاسف فى شوية اعضاء بيدخلوا يغلطوا ويقلوا أدبهم فالواحد بيقول يبعد عن الجدال اللى مالوش داعى .

بالنسبة للموضوع بتاعنا دا .انا مش عارف ازاى فى ناس بتدافع عن الاشكال دى وبتمدحهم بشرف الثورية والوطنية والواحد فيهم اول ما يلاقى وسطة يمسك فيها ولما يلاقى رشوة ياخدها واهو كلنا عارفينهم والمهم مثلا انا لو واحد معايا واحد تعبان فى عربيتى لو خبطت واحد منهم وفتح الطريق غصب عنهم هروح بيتى الاقى تهمة التعدى عالمتظاهرين السلمييين اوى , سلمية ايه ياجدعان بس اللى تخليك تولع فى عسكرى وتضرب اى واحد ملتحى او منتقبة تشوفها فى الشارع صدفة , سلمية ايه اللى تخليك تسرق مدرعة وتشرب فيها مخدرات ولا سلمية ايه اللى تخليك شغال اغتصاب فى اللى بتنزل معاك فى مظاهراتك ولا سلمية ايه تخليك تحرق مدرعة .
لما حرقوا مقر الاخوان فى المحلة عندى فوق المقر واحدة ست كبيرة عايشة لوحدها ولولا ستر ربنا جارها اللى فوقها لحقها قبل ما تموت من خنقة الدخان وفى الاخر يقلك الاخوان بيضربونا .
بذمتك مش نكتة لما تسمع واحد منهم يقلك الاخوان بيضربونا عشان روحنا نحرق مقرهم , ناهيك طبعا ان الواد دا مبرشم بس هى فعلا كدا ,انت رايح تحرق واحد ولا تحرق بيته منتظر منه يعملك ايه .

انا لو جنبى مقر اخوان وجه حد يحرقه والله هطلع الم عليهم شباب المنطقة والمهم وأولع فيهم بجاز . دا غير ان اى مظاهرة اشوفها لازم فيها تحرش سواء باللى مشاركات فيها ولا لو واحدة معدية فى الشارع . الناس مش عاوز تصدق انهم ماشيين ورا شوية حرامية ونصابين وكل واحد فى مدينته عارف عن بتوع النخبة المنتمين للمدينة بتاعته بلاوى ومصاايب بس محدش بيصدق وهيتقال عليك اخوان وبزرميط عشان انت بتقول كلمة حق .
ومحدش فى مصر عاوز يسمع كلمة الحق ولا حول ولا قوة الا بالله .
حسبنا الله ونعم الوكيل فى المخربين واللى بيساعدوهم على التخريب والله ينتقم منهم بقدرته .