الموضوع: نصائح بسيطه للحصول على صور احترافيه

صباح الخير
في الموضوع ده يا جماعه هتكلم على شوية ملاحظات بسيطه لو تم اخذها في الاعتبار هتلقوا النتيجه رائعه بصرف النظر عن نوع الكاميرا

١-خد وقت كافي قبل تصوير اي لقطه
فيه قاعده بتقول طالما عينك شايفه منظر معين حلو اكيد الصوره هتطلع جميله و احب ازود انك لازم تدرس المنظر الاول و تتخيله في دماغك من كذا وضع و كذا زاويه و بعدين تبتدي تصور

٢-قاعدة الاثلاث
كنت اتكلمت عنها قبل كده و الغرض منها الحصول على صوره غير تقليديه و هي ببساطه انك تبعد عن توسيط الكادر و خلي الشئ اللي بتصوره في تلت الكادر مثال لوبتصور منظر طبيعي خط الافق هو الفيصل ما بين تلت وتلتين الصوره و موضوع الصوره الرئيسي يكون تلتين الكادر الاسفل و السما ممكن تاخد التلت الاعلى او العكس لو شايف ان منظر السما هي الموضوع الرئيسي
و عند تصوير اي كائن حي برضه خليه في التلت اليمين او الشمال على حسب اتجاه العين اللي لازم نفتح لها مساحه

٣-الخطوط القياديه (leading lines)

و دي بصراحه قاعده ذهبيه و دور دايما على الخطوط قبل ما تاخد اللقطه و الخطوط ممكن تكون ممر او شارع او سور او موجه او مجموعه حاجات في الكادر لو تم تصويرها بزاويه معينه هتعمل خط جوه الكادر زي صورة العربيات اللي قدام الجامع اللي انا صورتها قتلقوا ان ترتيب العربيات من الزاويه دي عمل خط نهايته كان الجامع موضوع الصوره.
طب ليه بنهتم بالخطوط
عشان ببساطه هيا اللي بتدي البعد التالت و بتاخد عين المتلقي و تخليها تتجول في الصوره.
ً
٤-زوايا التصوير
فنفترض مثلا انك شفت مبنى و قررت انك تصوره الطبيعي انك قتقف قدامه و تاخد اللقطه طب ايه النتيجه
مهما كان جمال المبنى انت هنا صورت بطريقه تقليديه يادوب الواحد يتفرج و يقلب طب ايه المفروض كان يحصل؟
المفروض ان حضرتك الاول تلف حوالين المبنى و تجرب تبص عيه من كذا زاويه و ده مهم للحصول على صوره ثلاثية الابعاد للمبنى و بعين تجرب تاخد كذا لقطه من عدة زوايا و عدة ارتفعات اوعدك هتحصل على نتيجه مذهله
بالنسبه لتصوير الاشخلص
عمرك مثلا جيت تصور بنت جميله و لما جيت تتفرج على الصوره لقيتها قلبت على شيتا
الموضوع ده حصل معايا و كنت اقعد اتخانق مع الشخص و اقول له هيا الكاميرا هتجيب من بره؟
لحد مره ما اكتشفت ان ده عيب زوايا تصوير يعني عيب المصور
كل واحد ليه زاويه مثاليه للتصوير و لو عكستها هتشوف نتيجه سوده.
يعني مثلا الجنس الناعم بيسرحوا شعرهم على جنب معين و لو عكسوا شكلهم مش هيبقى حلو.
بالنسبه لتصوير الورود
اتهرينا صور للورد من فوق فحاول دايما تصور من الاجناب او من تحت الورده و قول لي رايك

٥-اختار الاوقات المناسبه للتصوير
الوقت الذهبي للتصوير بالنسبه لصور الطبيعه هو وقت الفجر و الشروق اللي بيجي بعد الفجر بنصف دقيقه فلازم تكون مستعد على الاخر
بعد كده وقت الغروب و ما قبله وبعده بنصف ساعه
بالنسبه للاشخاص قبل الغروب بساعه يعتبر احلى وقت و ممكن برضه بعد الشروق بساعه
غير كده الاضاءه بتبقى عاليه جدا و الصور حتى لو كويسه ما فيهاش الالوان الدافئه اللي في الاوقات المثاليه

٦-قاعده الاطار
اضافة اطار للكادر بتدي جمال غير عادي سواء لو تصوير طبيعه او اشخاص
تخيل صوره للبحر و السما ساعة الغروب اكيد صوره جميله جدا
طب ايه رايك لو في جنب الكادر نخله طبعا هتبقى رهيبه واحد يقول مافيش نخله قدامه ايه الحل؟
اي حاجه تنفع كاطار زي جزء من كشك خشب برضه شغال او جذع شجره كافي يضيف بعد للصوره و لمسه جماليه
لو بتصور شخص
طبعا لاحظتوا في تصوير الاشخاص عادة يحطوا جنب الشخص شجره او باب بلكونه مثلا صح؟
هو ده الاطار

٧-الاهتمام بالخلفيه
قبل ما تصور بص على الخلفيه اللي هتطلع في الكادر
هل هيا بتخدم الموضوع؟ اخبار الالوان فيها ايه؟ وهل متناسقه؟
طب لو مش مناسبه ممكن اغير الزاويه فالموضوع يكون احلى؟
ولا اخد الشخص اللي باصوره في مكان تاني احسن.

٨-الاهتمام بالظلال و الانعكسات
احرص على تصوير اللقطات اللي فيها ضل مبنى على الارض و عادة ده بيبقى من زاويه معينه او صورة شجر على الميه او انعكاس الاضاءات بجميع الوانها على المياه او انعكاس صورة الشمس على المياه ساعة الغروب و هكذا

ارجو يا جماعه ما كونتش تقلت عليكم و رجاء قراءة الموضوع عدة مرات للاستفاده