المشاركة الأصلية كتبت بواسطة ahmed_adham
هقولك أنا رأيي. لو الفكره في الجواز من سوريه هوه الاخلاق ففيه بنات مصريين كتير جدا عندهم أخلاق وتدين ومحترمين وعمرهم ما سلمو على ولد في حياتهم ولو انت شايف الصوره سوده وان البنات في مصر معندهمش اخلاق يبقى متزعلش مني انت شكلك بتتعامل مع نوع سيء من البنات هوه اللي مخليك واخد التصور ده.
لو الفكره فكره جمال. فأي بنت (والبني ادمين عموما) عماره عن خلطه بين الجمال والاخلاق والنسب ولما ترجح كفه الجمال تأكد انك هتاخد يا اما نسب وحش أو أخلاق سيئه وبالاخلاق هنا مش قصدي بس انها تكون كانت بتعرف رجاله والكلام ده لكن أقصد الطباع كمان. هتلاقيها عصبيه أو لسانها طويل أو بخيله أو مسرفه وطلباتها كتير.
نصيحتي. خد من الجمال النسبه المعقوله عشان الجمال ده تأثيره مداه قصير جدا مش هكون ببالغ لو قلتلك ممكن بعد شهر من الجواز متحسش بيه واللي هيعيش معاك طول العمر هوه أخلاقها وتدينها وطباعها وعلى رأي المثل يا واخد القرد على ماله بكره المال يروح ويفضل القرد على حاله.
واهتم بباقي الصفات زي النسب مثلا انها تكون بنت ناس محترمين وده بيبان من أول قعده أو بالكتير خلال الخطوبه. تأكد ان أهلها يكونو من النوع اللي هيقف في صفك لو بنتهم استهبلت عليك في يوم ويكون هدفهم تقويمها واستمرار المعيه بينكو مش هدمها لمجرد تعصب اعمى لبنتهم. واهتم بالاخلاق عشان تحترمك وتعلم أولادك كويس عشان هيه تأثيرها على ولادك هيكون أكتر منك لقرب الاطفال من امهم ولأنها بتقضي معاهم وقت أكتر.
وخد بالك الجواز من غير المصريه ليه مشاكل كتير هتلاقيها بتطاردك على مدى العمر ولو اتكلمنا على السوريين هتعمل ايه لما الازمه السوريه تنتهي واهلها يرجعو سوريا؟ هتلاقيها كل شويه بتقولك عايزه أزور أهلى وده حقها ومش بعيد تحاول تقنعك تروحو تعيشو في سوريا وبالتالي انت اللي تنفصل عن أهلك وهلم جرا. كان فيه واحد قريبنا زمان كان متجوز من جزائريه وكانت كل شويه تزن عليه تروح تزور اهلها وفي الاخر هربت وخدت معاها ابنها وهوه ساب شغله وسافر يدور عليها ودخل في مواويل ملهاش أخر. مش بالضروره كل اللي بيتجوزو غير مصريه بيحصلهم كده بس ده نوع من المشاكل لازم تحطها قدامك وانت بتحسب حسبتك.
بالتوفيق...