تجربتى مع بنزين 80 وتعديل فيشة الاوكتان

**Dr Kento** · 07-02-2013 11:49 PM

السلام عليكم انا هقولكم تجربتى بخصوص تعديل فيشة الاوكتان و تفويل بنزين 80
1 انا كنت شغال على 92 دايما وكانت الامور تمام بس حبيت اجرب
2 فولت نص التانك بنزين 80 وكان فيه طبعا بنزين 92 قبل كدا المهم العربيه مفرقتش كتير فى السحب انا حسيت انها افضل بس كان فيه كركرة خفيفه
3 قلت خلاص اكمل تفويل 80 بعد كدا لما نص التنك فضى كملت تفويل 80 وقريت فى المنتدى الجميل عن تعديل فيشة الاوكتان ودى ملقتش النتايه بتاعتها بس اخويه عمل فكره معايه قمت جايب سلوك في نهايتها طرف عامل زى النتايه بس صغيره قوى وقمت جايب 3 سلوك وربطتهم فى بعض وحطيت كل واحده فى دكر من التلاته وجريت بالعربيه جريت تمام من غير كركره والسحب تقريبا مفرقشى كتير بس حسيت صوت الموتور على سنه ودا من اول ما فلوت 80 المهم
4 فولت 80 تانى والدنيا تمام بس شغلت التكييف لقيت العربيه عامله زى البطه ودا مكنتش بحس بيه فى 92 والسحب كان سئ جدا وانا بحب الجرى موووووووت
ايه رأيكم اكمل 80 اوفر ولا ارجع 92 افضل

**tefa22m** · 08-02-2013 12:22 AM

اولا :- مبروك على التعديل
ثانيا :- لو مشاويرك كتير بالعربيه يبقى ال80 هايوفر و ممكن مع الوقت العربيه تتعود مع مراعاه تغير فلتر البنزين بالاصلى و قبل ميعاده و حاول كل 5000 او 7000 تفول 90 و تحط معاه منظف رشاشات كويس

**Timo N** · 08-02-2013 04:22 AM

بالنسبة لموضوع منظف دورة البتزين هو بيتحط كل تفويلة ولا كل 30000ك؟

**tefa22m** · 08-02-2013 07:25 PM

المشاركة الأصلية كتبت بواسطة timo n

بالنسبة لموضوع منظف دورة البتزين هو بيتحط كل تفويلة ولا كل 30000ك؟

بالكتر اوى كل 10.000

**golden_web_2007** · 08-02-2013 10:28 PM

لو حسبت الاستهلاك و لقيته زيادة اوى ارجع 92 تانى افضل ..

انا بعد تعديل الفيشة زاد عندى الاستهلاك جداً لدرجة انه التنك كله كان بيعمل 280 كيلو بالعافية

رجعت 92 تانى ظبط ..

**Dr Kento** · 09-02-2013 04:41 PM

انا الصفيحة معاية عملت 160 كيلو مع تشغيل التكييف لفترات قليلة ولسه هحكم عليه تانى عموما تنصحونى بمنظف رشاشات نوعه ايه ومنتظر الرد

**golden_web_2007** · 09-02-2013 11:59 PM

منظف الرشاشات ده حوار مالهوش لزمة ..

نظفها بالألتراسونيك و بس

**Dr Kento** · 10-02-2013 11:37 PM

المشاركة الأصلية كتبت بواسطة golden_web_2007

منظف الرشاشات ده حوار مالهوش لزمة ..

نظفها بالألتراسونيك و بس

معلش ياباشا اصل ثقافتى على قدى الالتراسونيك دا اللى هوا ايه ؟

**mahmoudysf** · 10-02-2013 11:54 PM

المشاركة الأصلية كتبت بواسطة Dr Kento

معلش ياباشا اصل ثقافتى على قدى الالتراسونيك دا اللى هوا ايه ؟

جهاز لتنضيف الرشاشات
موجود في بعض المراكز
ورايي لو الرشاشا مفيهاش مشاكل بلاش موضوع الالتراسونيك لانه مكلف
وبالنسب لمنظف الرشاشات ودورة البنزين عنوما stp بيتباع في الهايبر ماركت واون ذا رن