الموضوع: تكلفة طقم شنبر

المشاركة الأصلية كتبت بواسطة emad81

الف شكر يا ادهم
طب انت مبتفكرش تبيع ليه ؟ ولا رأيك ال 127 افضل اكمل بيها احسن؟
انا كان عندى دخنة بسيطة وقلت اجرب زيت الشنبر وفعلا جبت نوع اسمه stp وحسيت بالفرق بس حطيته مع زيت شل متعدد 20-50 عشان قلت لو زيت تقيل هتغلبنى فى الدوارة وفعلا لقيت لون زيت زى ما هو فاتح ومفيش دخنة خالص وبعد 800 كيلو نقص حاجة لا تذكر يا ترى افضل احطه مع كل غيار ولا المرة الجاية احط زيت تقيل لوحده واشوف؟
وهل ليه عيوب ؟ لأن الميكانيكى بيقوللى بيبقى تقيل وهيفتح معاك فى حاجات تانية زى الشمايز ولا هو بيقول كده عشان يعمل عليا شغل؟
على فكرة انا قريت عن كيفية استعمال زيت شنبر abro قاللك انه بيتحط مرة وتمشى بيه مشوار والغيار اللى بعده متحطش هل ده صح؟
معلش على الأطالة

و الله يا عماد انا موضوع البيع دة مش في بالي خاااالص
لأن مفيش معايا أي مبلغ كويس اجيب حاجة أحسن
المبلغ إللي أقدر أجمعه لا يتعدي ال 3000 جنيه
فطبعا لو بعت ال 127 .... يا تري هجيب ايه
من ناحية تانية أنا بعشق العربية دي اوي و مقضية الغرض معايا
مع ان مشاويري كلها سفر من القاهرة إلي مدينة بدر و من القاهرة إلي المنوفية مرتين أو ثلاث مرات إسبوعيا حسب ظروف شغلي ... و الحمد لله العربية حلوة معايا ... مشكلتي فقط في نقص الزيت
طبعا انا بحلم إني أجيب موتور أكبر عشان أحس بفرق .... لأني لما عمرت الموتور من كام سنة ماحسيتش بفرق خالص في سرعة ...... هية هية نفس السرعة و نفس السحب مفيش فرق شاسع يعني
عشان كدة مش هصرف اي فلوس عالموتور القديم خلاص لأنها مصاريف مالهاش لازمة
طبعا في مصاريف تانية العربية أحيانا بتحتاجها زي طقم الكهربا و أي مصاريف علي العفشة و الكلام دة
أنما الموتور مش هصرف عليه ( من الأخر هخليه يجيب آخره ) و هوفر كل مليم للموتور الجديد أو الأستيراد

موضوع زيت الشنبر هو طبعا حل مؤقت و ليس دائم .... دي حاجة مفهاش كلام
و طبعا الزيت دة له أنواع زي STP أو الـــ ABRO و في انواع كتير و في انواع مضروبة (خفيفة مش ثقيلة)
طبعا الـــ ABRO هو الأفضل لأنه أمريكي الصنع و نفس سعر أي زيت شنبر من الأنواع التانية
انا بستعمل علي طول النوع الـــ ABRO الأمريكي مع كل غيار زيت
طبعا في ناس تقولك إستعمله كل غيارين و ناس تقولك إستعمله مرة واحدة و كدة
الخلاصة بالنسبة لمواتيرنا القديمة
الزيت دة إحنا بنستعمله عشان نخلي كثافة الزيت ثقيلة .... و بمجرد ماتخلص الفترة ال 3000 كيلو مثلا
تقوم تغير الزيت الجديد و تحط معاه علبة زيت شنبر ABRO جديدة ... , و يفضل كمان مع المواتير القديمة انك تستعمل أرخص زيت و يكون لفترة 3000 كيلو .... و يفضل تشوف ارخص زيت و أثقل زيت
لأن كلما زاد سعر الزيت كلما كان أخف في الكثافة و مش ثقيل

بالنسبة ليا انا شخصيا انا هجرب زيت إسمه كاسترول في منه زيت للمواتير و في منه زيت للديزل
اثقل نوع في زيوت كاسترول
دة للمواتير البنزين او الملاكي
SAE-40


و دة للمواتير الديزل
SAE-50


انا حاليا لسة حاطط زيت شل الأحمر .... الزيت حلو مش وحش لكن للأسف بينقص برده
اول ما أخلص ال 3000 كيلو هاحط زيت كاسترول بتاع الديزل لأنه أثقل في الكثافة و رخيص في السعر
في ناس بتقوللي استعمل زيت التعاون الأحمر (سوبر ستان) لكني بكره شركة التعاون دي اصلا هههه
لكني هجرب زيت الديزل بتاع كاسترول عشان انا زهقت من نقص الزيت