الموضوع: كيف اشتري سيارة من المصنع مباشرة ؟؟

بعد التحيه ،
حضرتك مينفعش انك تشترى مباشره من اى مصنع فى الخارج ... لان المصانع و الشركات الام لا تتعامل مع افراد ...
لكن ممكن عادى جدا انك تشترى من اى وكيل معتمد بالخارج ... ثم تشحن العربيه الى مصر ... و تجمركها و ترخصها ملاكى عادى بشرط ان تكون المالك الاول لها و موديلها لا يتعدى السنتين ...

و لكن بصفه عامه لو حسبتها حتلاقى انك تقريبا حتدفع نفس الفلوس لو اشتريها من الوكيل بمصر مع عدم وجود ضمان و وجع دماغ فى الشحن و الجمارك ... لان المستورد الوكيل بياخد اسعار منخفضه من المصنع و ايضا بياخد اسعار خاصه من شركات الشحن بحكم انه بيتعمامل فى كميات كبيره.... الخ ...

بخصوص السيارات التى تجمع فى مصر ... استيرادها و دفع جماركها اغلى كثيرا من سعرها المحلى ...
المثال على ذلك النيسان الصنى مو 2006 اليابانى الاوتوماتيك كانت ب 125 الف ... اول ما اتجمعت فى مصر 2007 بقت زيرو ب 97 الف ...
تحياتى ...

شكرا جزيلا على الاجابة مع احترامي لحضرتك لكن التجار عايزين وقفة جمدة عن الجشع الواضح الكبير جدا في سرقة الناس
تويوتا راف 4 من المصنع 23000 الف دولار (دا لعربية واحدة شوف انت بقا لما تشتري جملة) يعني تقريبا 150000 جنيه في حين ان سعرها في مصر 385000 الف جنيه يعني الفرق حوالي 235000 جنيه !!!!! عندك تفسير غير انه سرقة ؟؟؟
ومينفعش نستسلم ونبقا عارفين اننا بنتسرق ونسكت ،،،، لكن ايامهم جية .
عموما شكرا جزيلا علي ردك ولو كان عندك اي مواقع عن الوكلاء دول اديني معلومات عنهم.

يا باشا فرق السعر الكبير ده علشان الجمارك
الراف فور دي اكتر من 1600 سي سي يعني جماركها تقريبا 160 % من سعرها
يعني لو سعرها 150 الف + 240 الف تمن الجمرك
يطلع تمنها 410 الف
سعرها في التوكيل 385 الف علشان بيشيل منها اوبشنز بتغلي السعر والجمارك عليها كتير
ده حتى الاير باج عليه جمارك
فهمت ليه في فرق جامد

اولا : بالنسبه لمكان الموضوع اعتقد انه يبقى احسن لو اتنقل الى قسم المنتدى العام للسيارات و لذلك انصح حضرتك تراسل الاداره و تطلب منهم نقله.

ثانيا : بخصوص المشكله بتاعه السعر دى لو حللناها سنجد ان هناك طرفين مسؤولين عنها :
- الطرف الاول و هو مساهم فى المشكله بنصيب الاسد و هو الحكومه وده بسبب الجمارك و الرسوم الباهظة اللى بتفرضها على السيارات و اللى احيانا تصل لأكتر من ضعف سعر السياره و حتى مع ذلك المستورد بيضطر يشيل منها حاجات علشان يقلل الجمارك و طبعا الطرف ده صعب جدا التأثير عليه لتخفيض الرسوم و الضرائب.
-الطرف التانى هو التوكيلات او الموزعين و اللى بيضيفوا مبالغ اضافيه (اوفربرايس) بحجه التسليم الفورى والتى أصبحت ظاهره الان فى معظم السيارات عامه و السيارات اللى عليها اقبال بصفه خاصه و اللى بيزود احيانا على تمن السياره مبالغ تبدأ من ٣ الاف جنيه و ممكن تصل الى ٣٠ الف جنيه و الطرف ده يمكن التأثير عليه لو زاد الوعى و الناس امتنعت عن الشراء و استغلالها من جهه التجار بالطريقه دى

الى مغلى السيارات فى مصر الجمارك و ضريبه المبيعات ...
ارباح مستوردى السيارات فى مصر الان اجمالى من اول الوكيل/المستورد مرورا بالموزع و المعارض فى فقط رنج 7 الاف فى العربيات الى رنجها 125/150 الف ....
حضرتك لو تحسب اى عربيه سعرها بأروبا + جماركها ... حتلاقيها اغلى 5/6 الاف عن السعر الذى تباع به فى مصر ... نظرا لان الوكيل او المستورد بياخد خصم كميه ...
و ده كلام مؤكد خصوصا بعد سماح الجمارك بدخول السيارات من اى بلد غير بلد المنشأ و لاى مستورد معه بطاقه استيراديه غير الوكيل الاصلى و هو ما يسمى بسوق الخليجى ... مما ادى الى مزاحمه الوكيل الرئيسى و بالتالى تقليل هامش الربح و المنافسه الشديده ...
تحياتى ...