الموضوع: ملاك فيات سيينا من فضلكم النصيحة ..

أولا بسم الله الرحمن الرحيم
زى ما العنوان بيقول كدة وزى ما انا مؤمن ان التجربة خير دليل يبقى اصحاب وملاك الفيات السيينا هم أكفأ ناس ترد على اى استفسارات بخصوص العربية دى (أهل مكة أدرى بشعابها )
نيجى بقى للمهم علشان خلاص والله انا قربت اتجنن من موضوع العربيات ده
بقالى 6 شهور فى موضوع العربيات ده وانى عاوز اشترى عربية ومش عارف اخد قرار
ولفيت على منتديات الدنيا اقرا مقارنات و اشوف تجارب ناس ومشاكل وحلول
المهم اخر قرار ليا فكرت اشترى السيينا
طبعا قبل اى حاجة دخلت هنا قسم الفيات وقريت معظم موضوعات السيينا وبالذات موضوع الاستاذ نور الاسكندرانى ومشواره ورحلة عذابه مع السيينا وكل اللى شافه من قرف الميكانيكية و الصنايعية واعضاء كتير افاضل زى اساذ محمد و ميسو والبوب

وطالب منكم النصيحة بخصوص السيينا بس الاول تعرفونى وبعدين تقرروا اذا كانت السيينا تنفعنى او لأ
انا فى السواقة ما اعرفش غير بنزين و دبرياج وليا تجربة مع عربية فيات ريتمو عملت بيها حادثة على كوبرى اكتوبر ومن ساعتها وانا بعيد عن السواقة و العربيات

المبلغ الموجود معايا دلوقتى 36 الف ومش معايا غيرهم جنيه

ماليش خبرة فى صيانة العربيات لا ميكانيكا ولا كهربا يعنى كل اللى عندى معلومات بسيطة

انا طويل 190 سم و جسمى مليان ومش برتاح فى اى عربية يعنى مش عاوز يكون الدريكسيون لازق فى رجلى

بشتغل 12 ساعة من 10 الصبح ل 10 بليل فا معنديش وقت انى الف ورا العربية وادوخ على ميكانيكية او صنايعية وبالمناسبة انا من شبرا مصر وفيه جنب البيت ميكانيكى و كهربائى وسمكرى فى شارع واحد بس علىى قدهم يعنى و مش بشوف عندهم عربيات مثلا احدث من اللانوس

فهل يا ترى اولا المبلغ اللى معايا يجيب سيينا نضيفة و مش عاوزة شغل ومصاريف وقرف زى بتاعة استاذ نور اللى واضح انه كان واخدها من ورا شحات يعنى انا مش عاوز اشترى بالمبلغ كله العربية علشان لو فيها حاجة لقدر الله اقدر اصرف عليها

ولو ينفع يبقى انهى موديل وانهى فئة 1400 ولا 1600
وهل فى ميكانيكى و كهربائى فى شبرا ينفعوا للعربية دى ولو لأ فين اقرب مركز صيانة محترم للعربية دى

وايه اخبار السوق دلوقتى يعنى انزل السوق واشترى من هناك ولا من على كونتاكت وما شابه

مستنى ردودكم الكريمة واى سؤال انا تحت امركم

اسمحلى ادخل بوجهة نظرى
جرب انك فعلا تركبها وتشوف هاتناسبك طولك وحجمك واستخداماتك ومريحاك "مشاركة الزميله magic girl"
تمام
تدور على عربية مناسبه ليك 1400 CC عادى او بلس او 1600 CC
طبعا السؤال ايه الفرق بين العادى والبلس
الاختلافات :
- التقفيل الداخلى للابواب
العادى ظهور جزء من عظم الباب مع فرش الباب
البلس فرش الباب يغطى الباب بالكامل
- شكل التابلوه فى جزء الخاص بالتكييف اسفل الكاسيت
- مسند اليد بالابواب الامامية متصل بجزء مفتاح الزجاج الكهرباء "بلس" منفصل فى العادى
- سبولير خلفى على الشنطه "كماليات"
-عتب لبطن العربية
- كشاف شبورة "كماليات"
- مسند راس للكنبه الخلفى "كماليات"

نيجى لاختبارات السيينا المناسبه للشراء اهم الحاجات :
-كشف كمبيوتر على اليونت كنترول والحساسات هام جدا جدا جدا.
-البارومه "خلف العتب ,فى الرفارف بين الكارتيرات, فواصل التقاء الزجاج الامامى او الخلفى فى السقف,داخل الابواب اسفل المفصلات من الداخل - داخل الحوض حولين البطارية والكشافات والاشارات.... الخ.
-دورة التبريد مياة عادية ام ماء تبريد + معدل نقص المياة + تواجد ثروموستات كوعة دورة التبريدام لغاها؟.
-وش السلندر هل تم تغييرة؟ .
-علبة الدريكسيون + طرمبة الباور " تسريب اسفل الدريكسيون ولازم كشف من اسفل السيارة ومن ناحية خزنة زيت الباور".
-التكييف سخن وبارد ولازم تجربه "المقولة المشهورة ناقص شحن".
-المساعدين والسوست والمصدات لكل منهم "اختبار المطبات وسماع الاصوات والاحتكاك".
- غيارات الفتيس ولازم تجربه هل توجد عضه فى بعض الغيارات؟.

طبعا ممكن اكون نسيت بعض الحاجات

"السرفيس الاول بعد الشراء"
ان شاء الله بعد ما ربنا يوفقك