الموضوع: ساعدونى فى ضبط البوجيه

السلام عليكم
أخي الفاضل بأي طريقة كما قال لك الأخوة فوق حاول تضبط الخلوص صح
تمسك البوجيه و سنه لفوق و تحط الفلر بالرقم المناسب بين الجزء الأرضي المتني و الالكترود و تستخدم مثلا بنسة و تدق دقة خفيفة علي الأرضي هتلاقي بقي فيه تلامس بينه و بين الفلر و بين الفلر و الالكترود بكده يبقي اتظبط حسب الرقم

أخي الفاضل الصح في شرائك للبوجيهات انك تشتريها حسب كاتالوج العربية او المواقع المتخصصة للمصنعين اللي بتحدد نوع بوجيهاتها المناسب لكل سيارة و بنوع محركها و بيكون مضبوط في المصنع لو كوده صح
حضرتك معظم او يكاد يكون كل البوجيهات الواحد شمعه اللي في السوق مضبوطه علي 1.1مللي لكل الانواع و بيركبوها لمختلف السيارات
حضرتك صاحب محل قطع الغيار يقول براحته ما لو ركبت اي بوجيه للعربية هتشتغل لكن انهي نوع و بأي كود اللي يديك الكفاءة و الأداء المطلوب و المناسب و الصحيح للمحرك !!!

اختلاف فروق سن البوجيه من رقم لأخر بيؤثر علي قوة الشرارة و توقيتها .... كلما قلت المسافة بين سن البوجيه (الالكترود)و الجزء المتني اللي هو الأرضي كلما كانت الشرارة أقوي و توقيت حدوثها اسرع و تأثيرها علي مصدر الجهد العالي أقل ... السبب هو انك قللت المعاوقة الكهربية اللي بتقابل جهد الشرارة المسلط بين طرفي البوجيه
لأن الفكرة العلمية لدائرة الاشعال عموما هو مصدر رئيسي للجهد العالي (الموبينه الأساسية او الموبينه لكل بوجيه ..كل حسب تصميم المحرك) + توزيع ذلك الجهد لكل بوجيه حسب توقيت الاشعال المناسب لخليط الهواء بالبنزين و حدوث الضغط علي البستم + بوجيه تحدث شرارة بين طرفيه في وقت محدد دقيق
و هنا البوجيه هو النقطة الوحيده اللي بتستخدم هذا الجهد العالي الذي يصل الي 10 الاف فولت لبعض الانواع في إحداث تفريغ كهربي لهذا الجهد مع الأرضي لمعاوقة الهواء بين طرفي البوجيه اي بين الالكترود و الأرضي

بمعني ابسط الاشعال هو فكرة مصغرة للبرق اللي بيحصل في الهواء الجوي