حـيـاة دواخـل فـابـريـكـة
ساعات تبقي ماشي و صوت الكلاكسات عاملك صداع .. تحس إن الناس اللي في الشارع كلها عاملة مؤامرة عليك .. تقوم تقفل الإزاز .. و لو ركزت .. هتلاقي كل واحد فينا عربية بس فيها الف شباك .. بتفتح و تقفل فيهم زي ما انت عايز .. ممكن تعيش في أسرة مفككة و تحس إن كلمة أسرة بالنسبة لك ملهاش معني .. تقفل ازازها .. ممكن صحابك تلاقيهم بيقعوا واحد ورا التاني قصاد ماديات الحياة و بيبيعوك ببلاش .. تقفل ازاز الأصدقاء .. ممكن تحس إن بلدك بقت شوكة في ضهرك تقفل إزاز الإنتماء .. ممكن تبص في المرايا متعرفش انت باصص لمين و تطلع قفلت الإزاز اللي بينك و بين نفسك من غير ما تاخد بالك في زحمة الزراير .. و المشكلة إن إحنا -كعربيات- مش مهم تكون لسة بتشق طريقك أو واقف وراك إسم و توكيل كبير .. كلنا ماشيين في نفس الطريق .. ممكن تكون مخبط من كل حتة و لكن أصيل و متعملش دقات نقص .. و فيه مننا اللي شكل بس .. و في أول منحني يجيب كبالن .. فيه مننا اللي بيمشي ببنزين 80 .. و مع إنه بيقف عشانه طوابير بس حامد ربنا و شاكره .. و فيه اللي بيمشي ب 92 بيحاول يشبط في النضافة و لكن الفرق ما بينه و ما بين اللي تحتيه يادوب بريزة و الفرق ما بينه و بين اللي فوقيه جنيه بحاله .. و فيه اللي لو حط حاجة غير 95 يكركر .. فيه مننا اللي السي سي عنده عالي و سعة صدره بتخليه يستحمل طول المشوار .. و فيه مننا اللي "بيقرص" علي نفسه .. فا يبقي شايف المكان علي مرمي بصره .. يحاول يوصله يكتشف إنه حرق كل البنزين .. و فيه منا اللي من كتر ما بيقرص موتوره بيفوت .. ساعات نشد مع بعض .. و مش واخدين بالنا ان محدش كسب .. كتير مننا بيحب الطرق الملتوية و بيعمل غرز بين الناس و بيفتكر إنه كدة هيوصل و هما لأ .. و فيه اللي ميعرفش يمشي إلا في خط مستقيم .. و فيه اللي بيحب يخرم و يقصر و يجيب من الأخر .. و ايا كانت الطريقة اللي ماشي بيها .. مفيش أمان .. ممكن تتقلب .. أو تقع في حفرة .. أو تخش في عمود نور .. ممكن تحتاج نص .. و ممكن تقعد كتير أوي عشان تعدي أثار الحادثة .. و ممكن اما كل شئ يتصلح و تبصله تحس أنه عمره ما كان متكسر .. المشكلة إنك اما تقفل كل إزاز العربية .. بتتخنق .. مفيش منفذ للهوا .. هموت .. و لكن الخنقة تكون أهون عليك من إنك تفتح إزاز منهم تاني و ترجع للدوشة تاني .. حبيت تكون معزول .. تدوس علي زرار التكييف .. شغال لكن مش عامل حاجة .. الظروف المحيطة بيه أقوي منه .. مع الوقت .. ساعات تحس إنك قدمت .. مبقتش تلمع زي الأول و سحبك مبقاش قد كدة .. تحاول تسيب الطريق و تاخد طريق تاني تكتشف إن كوووووووول العربيات ماشية أصلاَ في طريق واحد .. طريق واحد مفيش غيره مهما تحاول ..أخره موقف كلنا لازم نقف فيه .. و أي عربية حتي لو موديل السنة دي .. متقدرش تجزملها بحاجة غير إنها في يوم من الأيام هتبقي حتة خردة مغطيها التراب ..