الموضوع: هل فى ميجان اعلى فئه بانوراما من غير مثبت سرعه

المشاركة الأصلية كتبت بواسطة Marlboro011

ارجوكم الرد السريع على الاستفسارات دى هل فى ميجان ٢٠٠٦ اعلى فئه بانوراما من غير مثبت سرعه النهارده كنت بشوف واحدهوممكن اشتريها بكره على حسب ردودتكو العربيه راشه حزام كامل عريض من غير معجون للنضافه بس وكمان فيها شويه حاجات كده منها فتحه السقف بتتفتح ببكره من الداخل البكره بتاعت فتحه السقف دى مهزوزه ولو ضغضت عليها هاتدخل لجوا هل دى بتتغير ولا بتتلزق -- وكمان الازاز اللى قدام عاوز اغيره فاغسره فين وبكام--- وفيها الفرد الاصليه بتاعت رينو عاوز اغيرهم بجنت ١٧ سبور بكام ---- اه وزرار الامان بتاع الهاند واقع لما احتاج اشد الهاند احد صابعى مكان الزرار واشده عاوز اركب زرار فين وبكام ---- بالنسبه للفوانيس عادى بس عاوز اركب زينون وياريت لدات --- والمفتاح بتاع المرايات الضم واقع --- واكيد لمبه الايرباج منوره بس صاحب العربيه قالى انا عامل الايرباج اوف وممكن اخليلك اللمبه تطفى دلوقتى حالا لكن بصراحه العربيه تعتبر فبريكا ومافيهاش اعطال سوقتها وجريت بيها جرى عجبتنى وفيتيسها تمام ومحستش بفرق بينها وبين الاسكودا ---- ارجو الافاده باسرع وجهه جزاكم الله خير

على حد معلوماتي أن مفيش بانوراما بدون مثبت...........بس ميمنعش أن ساعات كان فيه عربيات شاذة شوية عن المعتاد بتتباع..........يعني تلاقي فيها أوبشن ناقص أو أوبشن زيادة عن العادي بتاع الفئة.

موضوع البكرة بتاعة فتحة السقف مش فاهمة

الأزاز اللى قدام فى التوكيل هيعمل بالمصنعية فى حدود 2000 و لو دكتور جريش هيعمل فى حدود 400

الجنط حسب نوعه و صناعته.........بس أعتقد فى حدود 3500 و أنت طالع غير الكاوتش.

زرار الأمان بتاع الهاند أعتقد صعب تلاقيه لوحده........ممكن تدور على هاند كاملة أستيراد و معنديش فكرة عن السعر.

الزينون أنواع و أشكال كتير و كله سعره بيختلف حسب الصناعة.........و إن كان أغلب اللى فى السوق صيني.

مفتاح المرايات برضه معتقدش هتلاقيه بيتباع لوحده غير إستيراد و معرفش سعره.

لمبة الأيرباج ممكن تكون منورة علشان صاحب العربية طافي الأيرباج الجانبي بتاع اللى بيركب جنبه.............عاوز تتأكد هتطفي العربية و تروح على باب الراكب الأمامي مش السواق و هتلاقي فى جنب الباب فى التابلوه زرار..........لو لقيته على وضع off اعمله on و دور العربية و جرب.....لو طفت يبقى مفيش مشكلة فى الأيرباج..........لو فضلت منورة يبقى فيه مشكلة.

لو لقيته على وضع on اصلاً و اللمبة كانت منورة يبقى برضه فيه مشكلة.

من كلامك على العربية أنا حاسس أن العربية شقيانة شوية..........الحاجات اللى بتقولها مع أن كلها رفايع بس مشوفتهاش قبل كده فى ميجان بصراحة.