الموضوع: تقرير .. صيانة الـ 1000 وتركيب الباركنج سنسور في أوتوإيجيبت أبو رواش

السلام عليكم ورحمة الله وبركاته

أنا الحمد لله رحت يوم السبت 9/2/2013 عشان أعمل صيانة الـ 1000 في أوتو إيجيبت أبو رواش

لإلي ميعرفش الطريق .. وإنتا على المحور هتنزل نزلة القرية الزكية .. اول يمين خش فيه .. وافضل ماشي هتلاقيه على اليمين مباشرة :)

الطريق يوم السبت بيبقى رايق .. لكن المركز يوم السبت بيبقى زحمة شوية.

أول مبتخش بتركن العربية وتروح على الاستعلام تحجز مكان زي البنوك كدة. بتاخد رقم وبتستنى دورك.

بيقابلك المهندس وبيملى شوية ورق وبيسألك إنتا عايز تعمل إيه وبيشرحلك هيحصل إيه في الصيانة نفسها:

1 - الصيانة عبارة عن تغيير زيت وفلتر زيت. وتربيط عفشة وخلافه.

2 - أنا طلبت أركب باركنج سنسور وكمان أرشه بلون العربية

3 - التكلفة كانت كالآتي:

322 جنيه تكلفة الصيانة والمصنعية مجاناً
حوالي 503 للباركنج سنسور شامل التركيب والضرايب وتمنه نفسه والرش

وأخدت 5% خصم على كل الإجمالي (الحقيقة معرفش السبب بس واضح إن والدي هو السبب لأنه دخل لمدير المركز وقاله على شوية اقتراحات لتحسين الخدمة :D)

فدفعت كإجمالي 785 جنيه.

وبعد لما المهندس بيفهم منك مشاكل العربية إللي قابلتك وكل حاجة .. بياخد منك الرخصة ومفتاح العربية وبيديك الكوبون واحد باتيه و2 مشروبات ساخنة.

وبتستنى في مكان الانتظار وفيه الخدمات الآتية:
1 - إنترنت
2 - مكان للأطفال وفيه playstation بس مش كبير
3 - شاشات لتوضيح مكان عربيتك
4 - تليفزيون
5 - رؤية الورشة من خلال زجاج داخل مكان الانتظار لرؤية ما يحدث داخل الانتظار
6 - مصلى
7 - حمامات

فضلت مستني المدة إللي اتقالتلي على حسب كلام المهندس .. واستلمت العربية ولله الحمد في الوقت المحدد.

بخصوص الـباركنج سنسور:


1 - بيبقى 4 عدسات بيترشوا بلون العربية حسب طلبك وفي الأصل هو لونه أسود.

2 - بيتوزعوا على الاكصدام .. يمين وشمال .. و2 في الوسط

3 - الشاشة بتركب على المراية الوسطى من فوق في مكان متميز جداً عجبني .. وهي عبارة عن رقم و2 meter .. الرقم بيعبر عن المسافة إللي بينك وبين الجسم إللي بتقرب منه. وكل meter بيعبر عن مدى قربك منه وفي حالة الخطر بيحمر وبيزمر جامد. لو قربت من جسم على اليمين ال meter إللي على اليمين هو إللي بيشتغل .. وكذلك في حالة الشمال. لو في حالة إن في جسم في الوسط الإتنين بيشتغلوا. كل meter ليه درجات .. أخضر في حالة الأمان .. برتقالي في حالة الوضع المستقر .. أحمر في حالة وضع الخطر.

4 - بيشتغل مع الرجوع للخلف فقط طبعاً ولازم يكون الكونتاكت مفتوح

ده كان تقريري البسيط عن رحلتي اليوم .. بس للأسف ملحقتش أصورلكم الباركنج سنسور بعد التركيب .. بس أول مصوره هبعتهلكم علاطول إن شاء الله :)

الف مبروك على الصيانه و تركيب الباركنج سنسور و عقبال صيانه المليون كيلو

شكرا على التقرير الجميل الاكتر من رائع ده و ربنا يباركلك فيها

الف مبروك يا باشا ..

المشاركة الأصلية كتبت بواسطة miceg

الف مبروك عالبباركينج
وسؤالي الى ألاعضاء اللي فالتوبيك
هو هل ينفع يركب النيسان الشكل القديم
ولا لا يوجد مكان لتركيب الشاشة ؟؟؟؟؟؟؟؟؟

أعتقد والله أعلم ممكن ..

أنا شفت هناك عربيات نيسان الشكل القديم ومركبة باركنج سنسور .. بس مبصتش على الشاشة بتاعته.

على الفكرة الساشة صغيرة جداً .. وبتبقى في المكان إللي فوق المراية الوسطة والإزاز .. بالظبط عقلتين صباع أو أقل