اشتري تمليك ولا ايجار قديم
السلام عليكم ورحمة الله وبركاته
يا جماعة الخير انا واقع في حيرة ارجو من اصحاب الخبرات انهم يفيدوني فيها
دلوقتي انا معايا مبلغ 180 الف جنيه والمتاح دلوقتي قدامي ان اشتري شقة ايجار قديم ب 40 الف وايجار 250 جنيه شهريا
او ان اشتري نفس الشقة دي في نفس العمارة ب 120 الف جنيه
طبعا الشقة على الطوب الاحمر يعني لسة عاوزة توضيب في رينج 30 الف
في ناس تقولي اشتريها تمليك احسن وريح دماغك وتحس انها بتاعتك ومستقر فيها وميبقاش فيها قلق الايجار القديم والكلام ده حتى لما تحب تبيعها بعد كدة بعد كم سنة تجيبلك مبلغ كويس
وانا تفكيري في حاجة تانية، طيب ما اشتريها ايجار قديم واصرف على تشطيبها كويس خصوصا اني مش من هواه كل يوم انقل في شقة والكلام ده وبرضه ويتبقى معايا مبلغ اقدر اجيب بيه عربية مستعملة كويسة في حدود 40 الف مثلا بما ان عندي اسرة وطفلين بدل بهدلة ومصاريف المواصلات، وبرضه هيتبقى مبلغ كويس اقدر اعينه على جنب لأي ظرف او اشتري بيه شهادات استمثار في البنك اعينها بعيد عن ايدي المخرومة
ده تفكري ووجهة نظري
ولو انا اشتريت الشقة دي تمليك مش هيتبقى معايا حاجة او ممكن يتبقى في حدود 20 الف او اقل
طيب الصح ايه، هل فعلا الايجار القديم ليه مشاكل من اي نوع او قلق بخصوص عدم الاستقرار يعني صاحب الشقة يطالبني بيها في حالات معينة او فيها اي نوع من عدم الامان مستقبلا؟ يعني ياريت حد يشرحلي ايه هي عيوب ومساوئ الايجار القديم حسب القانون
وسؤال تاني، لو انا مثلا اشتريت الشقة دي ايجار قديم وصرفت عليها في التشطيب وخلافه، لو حبيت اسيبها هل هسترد الفلوس الي دفعتها فيها في الاول بخلاف التوضيب والتشطيبات الي عملتها ولا الفلوس الي انا صرفتها دي فيها تعتبر مرمية في الارض وملهاش اي مكسب او منفعة لو حبيت اسيبها مستقبلا؟ برضه ياريت حد يوضحلي النقطة دي