الموضوع: أحدثكم من بلد ( أطيب شعب )

السلام عليكم جميعاً رجال سكودا الكرام..أخوكم يحدثكم من بلد ( أطيب شعب ) أسوان..بجد أنا مشوفتش ناس طيبه لهذه الدرجة ومسالمين لأبعد الحدود.

- مبدئياً أنا معروف إني راجل اللي في قلبي علي لساني..ومحبش أكون زعلان من حد و أنافقه وأبين له إن الحياه وردي ومفيش حاجة...ومن هذا المنطلق فأنا زعلان من إدارة نايل موتورز..بمعني أدق..زعلان من اللي عمل evaluation للناس المؤثرة في المنتدي علي مر السنوات السابقة حتي هذه اللحظة.
فكم هو محزن..إن رغم المجهود اللي الواحد بيعمله في المنتدي..وربنا يعلم علي قد ما ربنا بيقدر بحاول أفيد الناس بأي معلومة.أي مساعدة..بشارك هنا وهنا...وفي النهاية يخذلني من قيم الأداء للأعضاء وميكتبش اسمي مع الناس !!.. سبحان الله العظيم. مع العلم إن والله ما بتفرق معايا إلا معنوياً مش أكتر..لأن الأجر والثواب عند الله..بس مفيش مانع من إن الواحد يحس بتقدير علي قد تعبه فقط...وهذه لا يعني علي الإطلاق إستكثار التقييم علي السادة الأعضاء المذكورين..فهم جميعاً يستحقوا أكثر من ذلك..وفقهم الله وإيانا.
وتحية خاصة لعم صبحي وحقيقي إنت تستاهل يا باشا والله.. دائماً إلي الأمام :)

أنا آسف علي المقدمة التقيلة دي بس عشان مبحبش أشيل من أي حد..

نيجي للمهم..

- الحمد لله رب العالمين ان ربنا وفقني في إختيار سيارة مناسبة مثل الأوكتافيا للخدمات الشاقة.وكل مدي العربية دي بتزيد فعلاً في نظري..مش بس عشان هي فضل ونعمة من المولي عزوجل .لكن كمان لأنها عمرها ما بتخذل صاحبها واللي بيعوزه منها بيلاقيه.

إمبارح عزمت علي السفر لأسوان عشان عندي متطلبات كده للشغل مع التجار.بدأت الرحلة الساعة 4 الفجر.ولمدة 9 ساعات..أقصي سرعة مشيت عليها 140 طول مفيش غير حتة صغيره بتاع 5 كيلو كده مشيت عليها 200 كم / س لتجربة نعومة الكاوتش الجديد علي الأسفلت.

تقييمي للكاوتش بسم الله ما شاء الله لا قوة إلا بالله...فعلاً فرق كبير بينه وبين الكونتينينتال الأصلي كمان بتاع العربية.صوته منخفض جداً ومش ناشف في المطبات وحسيت إن قدرته علي إمتصاص الصدمة مع المساعد والسوستة أفضل بنسبة 30% مثلاً.ولكن عيبه الوحيد..إنه في الـ traction control ناعم..بمعني إنك لو طلعت بدوسة بنزين جامدة الـ traction بيشتغل مدة أطول من الكونتينينتال حوالي 3 ثواني..

الغريب بقي هو إستهلاك الوقود..الإستهلاك أوفر من الرحلة السابقة حوالي 0.5 لتر..معرفش هل ده له علاقة من قريب أو من بعيد بالإطارات ولا لا.

حبيت أوصل لأفضل النتائج من أداء التكييف علي الطرق السريعة..لأن طبعاً صعب مشغلش التكييف في مشوار زي ده لأن كل ما أجرب أفتح الشباك ألاقي صاروخ هواء في ودني...فبعد التجارب..أفضل وضع يديك أفضل النتائج.....تكون درجة الحرارة علي 19.والزرار بتاع Auto بيبقي في مرحلتين..Auto high و Auto low .. خليه علي Auto low. والزرار بتاع تدوير الهواء بردو تظبطه علي وضع Auto. وده يخلي عملية تنقية الهواء وتدويرها أحسن..

طبعاً كان الوسواس القهري واكل دماغي بعد الحركة الدنيئة اللي عملها توكيل كارتك في الفتيس بسبب أويل سيل الزيت..فكنت مرعوب يكون حاجة حصلت في النقلات أو في الفتيس بوجه عام..لكن الحمد لله..العربية علي أي سرعة زي الساعة..لا رعشة ولا رجة ولا رزعة.

تم تجربة كفائة الفرامل وكانت النتيجة الحمد لله من سرعة 100-0 كم/س زمن الفرملة للوقوف التام 3.1 ثانيه..وأعتقد ده رقم ممتاز :)

وطبعاً أداء الموتور هو هو مثل سابق التقارير علماً بأنه داخل عي 89000 كم.يمكن بس في نقطة مش فاكر قولتها في التقرير اللي فات ولا لا..إن صوت الموتور إنخفض جداً بعد تغيير الزيت إلي كاسترول.

أدعولي بقه ربنا يسترها في طريق العودة إن شاء الله همسك الطريق 9 بالليل. أشوفكم علي خير :)