طلب مساعدة ضروري لو سمحتم

**shadowgazer** · 12-02-2013 02:32 AM

لو سمحتم كان عندي اربع مشاكل في العربية نيسان صني 2013 اوتوماتيك كنت عاوز اسال عليهم:
اولا :صوت صفارة زي التريلات بدء يظهر مع الفرامل - انا واحد قالي دي صاجة تيل الفرامل - هل لازم اصلحها بسرعة ولا ممكن استنى اسبوعين عقبال ما اروح اصلحها . وتكلفة تصليحها كام - مع العلم العربية لسه في الضمان

ثانيا :استهلاك البنزين : انا استهلاك البنزين تقريبا 9.9 كم في اللتر - نص المشاوير في البلد هل ده طبيعي؟

ثالثا: الكمبيوتر : العداد بتاع متوسط الاستهلاك اعتقد انه كان كل مدة (3 دقايق ) بيغير متوسط الاستهلاك لكن حاليا هو كل ثانية بيتغير يعني طول ما انا جايب عداد متوسط الاستهلاك قاعد يتغير كل ثانية

رابعا :انا خبطت باب العربية والفانوس الخلفي اتكسر - العربية عليها تامين شامل - تصليحهم يكلفني قد ايه ؟
ومعلش سؤال خامس : اعمل الحاجت دي كلها فين قين احسن توكيل ؟

**saint2011** · 12-02-2013 02:50 AM

الزميل العزيز شوف يا سيدى لا تقلق :

1-تغيير صاجة التيل الخلفى يتم تركيبها مجانا فى التوكيل بدون أى فلوس فى الضمان يعنى
2-أستهلاك البنزين فى وسط البلد متوسط 9.9 ده ممتاز وعادى ولسه هيقل بعد ال 5000 كم
3-الكومبيوتر عادى وبعدين حضرتك مركز معاه ليه ؟؟؟؟؟ ممكن تراجع المتوسط مع كل تفويلة مثلا أو مشوار سفر غير كده لا
4-حضرتك تصلحهم فى التوكيل مادام حضرتك مأمن على العربية مفيش مشكلة
5-أحسن توكيل أتو أيجيبت أبو رواش أو السبع بزهراء المعادى

ولك تحياتى

**Dr'AhmZZong** · 12-02-2013 02:52 AM

موضوع الصوت بتاع الفرامل ده : ليه علاج في التوكيل انه بيغير صاجة التيل الخلفي في الضمان و بدون أي تكاليف ..

و بالنسبة لمشاكل الاستهلاك اظن العربية لسة بيتلين و بعد أول 5000 كيلو كله بيظبط إن شاء الله ..

احسن توكيل هو أوتوا اجيبت ناس محترمة ..

بالنسبة لتكلفة التصليح معنديش فكرة عنها ..

تحياتي .......

**د. علاء ابراهيم** · 12-02-2013 03:53 AM

المشاركة الأصلية كتبت بواسطة shadowgazer

الف شكر saint2011 , dr'ahmzzong
ربنا يخليكوا لينا وللمنتدى
بس معلش سؤال ممكن استنى على تصليح الفرامل لان انا مشغول جدا الاسبوعين دول ولا ضروري اصلحه بسرعة

الاعضاء قالو المفيد
استنى ما تقلقش
بس ا\كر المشكلة دى فى الصيانة و زن
و فى الاغلب هيركبولكالصاجة دى بعدها فى صيانة قادمة عشان بتيجى بالطلب

**canner** · 12-02-2013 10:24 PM

انا مدينى وقت من شهر و نص لشهرين عمال ما الحاجة ما تيجى و مهندس الاستقبال قاللى مافيش مشاكل من الانتظار

**Sehsss** · 12-02-2013 11:56 PM

عادي ممكن تصبر لحد ما تروح الصيانة، ما تقلقش

**ahmed_hanafi** · 13-02-2013 07:44 AM

كلم الصيانة واطلب منهم يجزولك الصاجة

**ehab_hamed** · 16-02-2013 11:29 PM

انا حجاوب على السؤال الرابع اللى هو :
" رابعا :انا خبطت باب العربية والفانوس الخلفي اتكسر - العربية عليها تامين شامل - تصليحهم يكلفني قد ايه ؟ "

تصليحهم مش حيكلف حاجه طالما العربية متامن عليها تامين شامل، ولكن بعض شركات التأمين بتاخد مبلغ على كل عملية اصلاح بيبقى فى حدود 200 جنيه. وده حسب الشركة اللى أنت مأمن عندها.
ولازم تبلغ التامين قبل ما تصلح طبعاً لأنهم بيبعتوا حد يصور الخبطه اللى فى العربية، وبعدين تروح التوكيل تجيب مقايسه لتكلفة عملية الأصلاح دى حتتكلف كام. وبعدين تبعته لشركة التامين وتاخد عليه موافقه وتبدأ الأصلاح.
فيه شركات تأمين بقى لازم انت تدفع تكلفة الأصلاح، وبعدين شركة التامين ترجعلك الفلوس اللى دفعتها دى تانى. وفيه شركات تأمين هى اللى بتدفع على طول لمركز الصيانة اللى عملت عنده الأصلاح.

بس نصيحه ما تعملش اى حاجه تبع التأمين غير فى التوكيل حتى لو انت اللى حتدفع فلوس الأصلاح الأول وبعدين تستردها من التأمين، لأن الورش اللى بره مش بتبقى حلوه لو حتضطر ترش الجزء اللى اتخبط ده، وساعات برضه بيركبوا فوانيس مش أصلى (وده حصل معايا فى عربيتى القديمة) فالأحسن أنك تتعامل مع التوكيل على طول.
وشكـــرا