الموضوع: حكايتى مع الكمين ( محدش يلبس اسود )

كالعاده طبعا فبلدنا مبنعرفش نفرق مابين الناس المحترمه والغير محترمه والأختلافات والتيارات و ال.......... الكلام اللى ملوش لازمه ده
انا بكتبلكوا الموضوع ده من الغردقه فمأموريه فشغلى وانا مكتئب جدا ومضايق فعلا من اللى حصل معايا
ندخل فالموضوع :
راجع من شغلى بليل الساعه 1 ونص ( شركه مقاولات عشان محدش يفهم غلط )
من التجمع الخامس الى شارع بورسعيد فأحمد ماهر
خلصت الدائرى ونزلت نزله القلعه ومشيت لحد مدخل الأباجيه اللى بيدخل على السيده عائشه
لقيت الكمين الثابت بتاع الأباجيه واقف ( بقاله اكتر من 20 سنه بيقف )

ومن حظى السىء للأسف هتعرفو ليه لاحقا
(كنت لابس تشيرت اسود على جاكت اسود على بنطلون جينز على حته سيفتى سودا ) والعربيه كلها طبعا فاميه اسود وهى سودا وشكلها هتبقى ليله سودا عليا وعلى اللى جابونى
كله عدى قدامى عادى جه عندى انا وقالى الأمين رخص سعادتك قولت تمام عادى
هوب لقيت الظابط وامين معاه اسبرنت ناحيه العربيه وقاله خد منه الرخص ووفتشولى العربيه قولت عادى
نزلت كنت انا ومعايا 2 مهندسين زمايلى فالشغل واحد زراعى والتانى كهربا والعبد الفقير اللى هو انا محاسب و كانو فسكتى فبوصلهم عادى
المهم البطايق ادينهالهم
العربيه مسكوها 3 قعدوا يفتشوها لدرجه انهم شالو الكنبه الخلفيه قولت كل ده عااااااااادى
علما انى مبشربش حتى السيجاره بس مش مشكله
كل ده عاااااااااااااااااااااااا ااااااااااااااااااااااااا ااااااااااادى

اللى جاى بقى الظابط قالى بتشتغل فين ؟؟
وراجع منين ؟؟؟
ورايح فين ؟؟
ومفيم العربيه ليه كده كلها ومش مثبوت على الرخصه ؟؟
وطبعا رديت على اسئلته بكل ثقه
الا فموضوع الفاميه ده عشان عارف انه غلط فمنتقطش خااااااااالص

والأخر قام قايل للأمين اللى معاه فتشلى الأستاذ
ومسكوا شنطه اللاب والورق اللى كانت معايا وفتشوها حته حته وورقه ورقه
وجه الباشا فعز التلج راح مفتشنى التفتيش اللى هوا واقلع الجاكت والكلام الأهبل بتاعهم ده

خلص الحوار ده كله والأخر ادونى الرخص وهو بيدهالى الظابط قالى خلى بالك متلبس اللبس ده تانى ( على اساس هو اللى يحدد البس ايه وملبسش ايه ) عشان متتفهمش غلط واحنا اسفين

طب افهم اسفين على ايه بالظبط
تفتيشى الشخصى بالطريقه دى ؟؟؟

ولا على بهدله العربيه وتفتيشها بالهبل اللى كنتوا بتعملوه ؟؟؟

ولا على شنتطى الشخصيه اللى اتفتحت واتبهدل الورق والباسبور وشغل الشركه اللى انا تعبان وسهران فيه ؟

ولا بعد ماشوفتوا البطايق واتأكدوا اننا مهندسين ومحاسبين فشركه محترمه ؟؟؟

ولا على وقتنا اللى راح واحنا كنا فعرض ساعه راحه عشان نروح مأموريه تانى يوم فالغردقه هنسافرلها الساعه 5 الفجر ؟؟

مش عارف بصراحه كنت بتكلم مع زاميلى اللى كانوا معايا وبنتناقش مع ناس تانيه فى اللى شايف انه عادى مفيش مشكله وفى اللى جاب المشكله على لبسى الشخصى !!!!!!!!!!!!!! وفى اللى مصدقش ان بعد ماشافوا البطايق والرخص وورقنا واتأكدوا من وظايفنا يعملوا كده

بس بجد اكتر حاجه هونت عليا الليله الزفت دى الغردقه وماادراك مالغردقه