الموضوع: كيفية البدء فى الصلاة بشكل عملى و بدون فذلكة

السلام عليكم و رحمة الله و بركاته

أحبائى فى الله حبيت أشارك معاكم طريقة إستخدمتها للمواظبة على الصلاة أول ما ربنا هدانى و قررت السير فى الطريق إلى الله....."اللهم أمتنا على الطريق إليك"

فى الأول لازم تظبط مخك اللى لخبطته الحياة الدنيا و متعها الزائف و تفتكر أد أية كنت بتسهر الليالى علشان تذاكر للثانوية العامة و كنت بتطبق باليوميين أو فى الجامعة و أنت سهران علشان تلحق تلم المناهج فى ليلة الإمتحان.....((الموضوع مكنش سهل بس كنت خايف على مستقبلك))

طيب ما الحياة الدنيا دى عبارة عن إمتحان و لية نتيجتين بردو يا جنة يا نار و فى الحقيقة اللى إنت نسيها أو مجتش فى مخيلتك أن هو ده مستقبلك الحقيقى

من الأخر لازم تاخد القرار و تقول أنا مسلم و لازم أجدد تذكير نفسى و إرتباطى بالله و أبتدى أصلى و تذكر حديث الرسول عليه الصلاة و السلام "العهدُ الَّذِي بينَنَا و بينَهُمْ الصلاةُ، فمَنْ تركَهَا فقدْ كفرَ" حديث صحيح

بعد ما خدت القرار فى الأول الموضوع هيكون صعب فحضرتك فى الأول تاخد مع نفسك عهد أنك مش هتنام غير لما تصلى الصلوات الخمسة مهما كنت تعبان و حتى لو صليتهم كلهم قضاء بس هتصليهم و تربس دماغك و طلع العرق الصعيدى ((لو رجليك وجعتك و لقيت نفسك هتكسل صلى واقف لحد ما تتعب و بعدين أقعد و حاول تقرء قصار السور))

ثانيا مع الوقت هتتعود تبتدى تركز مع الأذان و تلتزم بصلاة العشاء فى جماعة أو حاضر مثلا بعد زحمة الشغل و الدراسة و بعدين تبتدى تصلى الصبح قبل ما تنزل الشغل و هكذا و بالتدريج ربنا هيساعدك فوق ما تتخيل و هتلاقى نفسك مواظب على الصلوات كلها بإنتظام بأذن الله

يقول ربنا جل فى علاه فى سورة مريم - الآية 76...وَيَزِيدُ اللَّهُ الَّذِينَ اهْتَدَوْا هُدًى

و لازم تبقى فاهم إن الجزاء من جنس العمل و إن الموضوع مش سهل لكن الموضوع يستحق أكتر بكتير من شغلك اللى بتسهر عليه أو إمتحان الثانوية اللى طاحن نفسك مذاكره علشانه

يقول ربنا جل فى علاه فى سورة طه - الآية 132...وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا

بعد ما ربنا يكرمك و تواظب على الصلوات أبتدى زود حسناتك و زود الجزاء و واظبط على الصلوات فى الجامع و بالتدريج بردو يعنى فى الأول العشاء و بعدين زود كمان صلاة المغرب و هكذا لحد ما ربنا يكرمك بصلاة الفجر حاضر فى الجامع و دى ليها مزاق خاص لا يوصف و راحة نفسية مش هتلاقى زيها فى الدنيا و بعدين صلى السنن و هكذا و تذكر الألف ميل بيبدء بخطوة

يا رب الطريقة دى تساعدكم و ربنا يهدينا و يهديكم جميعا

جزاك الله خيرا