قدر الله وماشاء فعل
النهاردة كنت هتعرض لعملية تثبيت بس الحمد لله فشلت
والاغرب من كدة انها في وضح النهاااار بس على طريق اسماعيلية بعد المركز الطبي

والدي اتصل بيا قالي روح على بنك ( .... ) واسحب الفلوس اللي باعتها ووديها لعمك في الاسماعيلية
وقد كان فعلا
الساعة 10 الصبح كنت خارج من البنك ومتجه للاسماعيلية
وعند الملف اللي عند المركز الطبي العالمي لقيت شيروكي عيون موديل 2005 تقريبا سودا ومفيمة الازاز كله ( طبعا من غير نمر ) وانا كنت ماشي تقريبا 90 لاني كنت بلعب في الموبيل بتاعي
وفجأة لقيت العربية بتكسر عليا جامد وازاز اتفتح وطلع منه واحد لابس قناع ومعاه مسدس .. كل ده ومفيش حد ماشي قدامنا تقريبا مع ان النهاردة الخميس

والناس اللي ماشيين ورانا شايفين المنظر ومهديين السرعة جامد

طبعا من الخضة دي معرفتش اعمل اي حاجة لاني كنت تقريباً (مشلول ) ومكنتش مصدق ان ده يحصلي

العربية الشيروكي كانت قدامي بحوالي 4 متر وفجأة اتصرفت ودوست كيك داون لمدة ثواني السرعة بقت 120 ولما قربت اكتر من الشيروكي سواق الشيروكي شافني بقرب بسرعة راح عامل هو كمان كيك داون وطبعا كيك داون الشيروكي مجرم وصله تقريبا 140 بردو في ثواني

وفي نفس اللحظات لقيت الشيروكي بعد عني تقريبا 20 متر والراجل عمال يشاورلي اني اقف

طبعا لما لقيت الوضع ده روحت دايس فرامل جامد وهو كان لسة حارق ومكمل على سرعة عالية

في ثانية وصلت لسرعة 50 مثلا وفجأة جيه في بالي اني احاول اتصرف بسرعة حتى لو هيحصل خساير في العربية بس المهم انفد بالمبلغ لانه كان كبير

بصيت في المرايا لقيت الناس اللي ورا بعيدين تماماً عني روحت جيت على اقصى الشمال وشادد الهاند بريك ولفيت في نص الطريق والعربية للاسف الرفرف الخلفي اتخبط في السور الجانبي وبعد مالعربية لفت وبقيت ماشي عكس وقفت على دواسة البنزين عشان العربية تطير

بجد شكرا بروتون على العربية المحترمة دي وصلت لسرعة 100 في ثواني معرفش ازاي وماشي على اقصى اليمين ( اللي هو بقى شمال بالنسبة ليا ) وطبعا الشيروكي فص ملح وداب لانه مش هيلحق يعمل حاجة ولا يلف ويحصلني

الناس اللي جاي في وشهم وقفو في وسط الطريق وقعدو يقلبو نور ومن الخضة معرفتش اقفلهم وفضلت دايس دايس بنزين لحد ماهديت شوية وفكرت واتطمنت ان مفيش شيروكي ورايا روحت واقف على جنب ( طبعا كل ده وانا ماشي عكس ) لقيت ولاد الحلال وقفو على جنب كتير وقعدو يجرو على العربية وجايبين مية ومعرفش ايه وبيتطمنو عليا لانهم شايفين الشيروكي كانت بتكسر عليا جامد ازاي بس مكانوش يعرفوا انها محاولة تثبيت

الناس كتر خيرها فضلت معايا شوية لحد ماهديت ورجعت خدت يو تيرن ورجعت على القاهرة لاني مكنتش متطمن اني امشي تاني في طريقي

وطبعا ادور على حد عشان ابلغ عن اللي حصل ولا وجود للشرطة اصلا

الخلاصة :

تقريبا في حد كان واقف قدام البنك وقطرني لانه شاف معايا شنطة كبيرة شك انها تكون فلوس
او ممكن تكون صدفة مع البلطجية انهم يجو يثبتوني وبالمرة يلاقو مبلغ كبير

والحمد لله على كل حال ومش مهم اللي جرا في العربية المهم اني سليم

والغريب ان مفيش طلقة انضربت من المسدس ده شكله كان مسدس مية

نصيحة لوجه الله اللي ناوي يسحب فلوس من بنك يتأكد تماماً ان مفيش حد وراه او قاطره .. وزيادة ضمان انه يبقى في شارع زحمة

وربنا يستر طريقكم