اخيرا ... استلمت اليارس ... باركولى
اليوم حصلى حاجات يا جماعة والله غريبة جدا من اول ما استلمتها .....
اول حاجة المندوب اللى كان هايطلع معايا علشان نرخص (وده طبعا كان يوم السيرك العالمى )... قللى خلينى انا اسوق علشان كنا متاخريين وانا عارف انك هاتمشى براحة علشان طبعا العربية لسه جديدة وانت هتبقى لسه مش واخد عليها وكده يعنى قلت مفيش مشكلة... واحنا رايحيين وكان بيكلم فى الموبايل وفجاة عربية وقفت امامنا دون سابق انذار فى نص الطريق على الكورنيش ويدوب لحق ضرب فرامل ولحق العربية على اخر لحظة يدوب والله.. المسافة تعدى ورقة ده لو عرفت كمان .. مش عايز اقولكم قلبى انا وهوه وقع فى رجلية لدرجة ان الراجل قالى تعالى سوق انا خلاص..
الحمد لله ربنا ستر والعربية تمام..(دى عينة من النا س اللى بتسوق..)
رحنا للمرور مش عايز اقولكم يوم ولا فى الاحلام..بجد لو حبيت تعذب شخص
ابعته المرور المهم المندوب خد منى 550 جنية وده كان ترخيص سنة واحدة طبعا بالاكراميات اما التفاصيل مش عارفها....
المهم الحمد لله استلمت الرخصة وكان لازم اروح البنك علشان يتطلع على الاصل
وكانت المفاجاة .... رقم الشاسيه فى الرخصة خطا.. تخيلوا
ودى كانت اخر المفاجات ... مندوب المعرض قالى مفيش مشكلة ان شاء الله دى حاجة بسيطة ان شاء الله نروح المرور يوم السبت ويغيروا الرقم اللى حصل فية خطا و نطلع رخصة بالرقم الصحيح.. وده كانت نهاية اليوم....
ايه رايكم يا شباب....؟