الموضوع: لو فأيدك تهاجر لأى دولة هتهاجر فين ؟ من غير مبالغة

طبعا زى ما واضح من عنوان الموضوع
بما أن الحياة فى مصر أصبحت زى حياة عود الكبريت فى علبته الضيقة
الشوارع كلها مطبات - الزحمه و السواقة الهمجيه - مفيش حارات أصلا عشان الناس تلتزم بيها - يتهئ لى 70% من العربيات الموجودة بالطرق متهالكه و سبب كل الحوادث و موديلات سبعينات و تمانينات - المايا نازلة من الحنفيات ملوثة و فيها ديدان و صدا من المواسير - الجو مبقاش صحى - ريحة الهوا تقرف - العماير مبنيه من غير أساس و كل يوم عمارة تقع - مساحات الشقق بقيت زى زحمه المواصلات - السرقة بأسم الشطارة - الأستغلال الصفة الرئيسية فى التجارة - التعليم المجانى مش مجانى و يا ريته بيخرج ناس عندها عقل إلا الأشخاص إلى ثقفت نفسها - التعليم الخاص ممكن تكون المدرسة بألاف و فى نفس الوقت المجارى ضاربه فى الحوش - المدرس فى التعليم المجانى زيه زى المدرس فى التعليم الخاص نفس المبدأ و نفس العقلية - الجامعات المصريه زى جامعة أسكندريه مثلا بقيت عبارة عن صندوق زباله كبير - الجامعات الخاصه الغش فيها و البرشام شغال زى السكر و بيخرج ناس مش فاهمه حاجة - الشغل مش لأى حد

من النهايه كدة
فى رأيكم
أية أفضل دولة ممكن تسافر فيها و تعيش طول حياتك مفيهاش الكلام دة كله - أو جزء كبير منه مش موجود ؟
طبعا دة هيكون بناءا على توافر مهنتك هناك - لغاتك يعنى لو بتعرف تتكلم عربى بس يبقى أدامك الدول العربيه لكن لو معاك لغات تانيه يبقى ممكن تختار أكتر من دولة أوروبيه

مش عايزين مبالغة و واحد يقول أنا هسافر أيطاليا و هوا أصلا مش بيعرف يتكلم أيطالى

الموضوع للأحلام فقط (لأن لو كل واحد فأيده يسافر من مصر كانت مصر بقيت صحرا من زمان)