الهجرة . الجنسية . الحياة الكريمة المستقرة ’ .. للنقاش
بسم الله الرحمن الرحيم
السلام عليكم ورحمة الله وبركاته
بصراحه ده موضوع كنت عايز اكتبة من زمان وكنت خايف انه لا يحظي بالقبول او المشاركة الجادة
أولاً : الهجــــرة
مين بيفكر في الهجرة فيكم من البلد دي . عن نفسي مفيش شغل مفيش خبره مفيش فلوس مفيش استقرار مفيش حياه كريمة آدمية . على الاقل
فكرت كتير اوي في الهجرة لآستراليا او فرنســآ أي كان البلد
فكرت هناك في الحياة الكريمة التعليم الهدوء الاستقرار
بس مكدبش عليكم بحثت ولاقيت الموضوع صعب شوية
ياريت اللي عنده اي معلمة يفيدنا بيها بخصوص هذا الشأن
اسهل طريق للهجرة واي بلد افضل وكيف الوصول الي الطريق للهجرة
ثانياً : الجنسيـــة
طيب لو موضوع الهجـــرة صعب شوية طيب ما في مسلمات من دول اجنبية يعني انا لو اتزوجت اجنبية مسلمىة او غير . مع الاخذ بالشروط وتعاليم الاسلام الحنيف
مش ممكن اخد جنسية البلد ولا في بلاد مش بتدي جنسية لمجرد زواجك منهم
بجد مش عارف الموضوع ده
ياريت لو حد عنده معلومة يفيدنا بيها ويشاركنا تبقي معلومة لينا كلنا
اي البلاد اللي بتدي جنسية لو اتزوجت منها
ثالثاَ : الحياة الكريمة الاستقــــرار
لا يختلف شخصين بيحبوا البلد دي على انها فيها الجمال في الاصحاب العشٍرة الجو الطييبة بين الناس < امال عايز تهاجر ليييه وواجع دماغانا معاك
صدقوني اكيد الموضوع صعب وصعب اوي كمان ممكن الاحباط يعمل اكتر من كدة
بس من الملل خلاص كل محولات الامل راحت مفيش مفيش مفيش
محتاجين تعليم كويس عيشة كويسه تحترم الادمية عيشة كريمة وظيفة كويسه
مش طالبين المستحيل
بس مش موجود .
ارجو التفاعل بجد عايز استفيد من تجاربكم وخبراتكم
واحد عاطــل عن ألامـــل
لا اله الا الله اهدى وصل عالنبي
انت قافل بابك بنفسك
الاعلام. ..بما فيه من مسلسلات وافلام ارتكب جريمة في حق الشعب المصري..واثر على عقول وقلوب اجيال...فاصبح الانسان لا يعرف الهدف الحقيقي من وجوده في الحياه...ولا يعرف الرجل دوره ولا تعرف المرأه دورها ووظيفتها...وتم صناعة اهداف وهمية واغراءات. ..كل هدفها هدم الاسرة وبالتالي المجتمع والدولة...وللاسف تجد الكثير سقط في هذا الفخ...فأصبحنا في زمان اختلت فيه المعايير والقيم.
ده بقلم واحد من دقيقتين عالفيس خدتهولك كوبي بيست.
حدد هدفك , انت سامع , حدد هدفك , انت فاهم , حدد وجهتك , ما حددتش , اطلع في الصحرا بعيد عن أي مؤثرات واعتكف على نفسك لغاية ما تحدد هدفك , اياك تهتم بالوسائل وانت الغاية عندك مش واضحة.
هتلاقي الاجابة الصحيحة بنفسك هتفلح ,
مستني حد يطبطب عليك ويديهالك , حياة عادية مملة في أحسن الأحوال.
لو صدقت الله لصدقك الله , هو مش عاوز يعذبك , بس انت اللي في ايدك الاختيار,
"أنا عند ظن عبدي بي فليظن عبدي بي ما شاء"
اللي انت بتدور عليه ده أصلا بيدور هو عليك وبيجري وراك يلحقك قبل الموت : ان الرزق والأجل يتسابقان فيسبق الرزق . مش هتموت ناقص أكلة , جنية , دولار , جوازة ....
اذا كنت فاكر الوضع بره أحسن , ولا الهوا, أنا لفيت شرق وغرب , السعادة ده شيء داخلي تماما.
ناس في باكستان عندهم سعادة وراحة لا توجد في أهل نيويورك.
أجساد مملوؤة بالمال والملل تتحرك في أبوظبي وقلوبها متوقفة ,
نفوس مملوؤة بالجد والأمل تطير في مصر وجيوبها مفلسة.
يجب أن أبين لك أنك تبحث عن الشيئين : السعادة والنجاح
أما النجاح فهو مثل أوروبا وأمريكا
وأما السعادة فأي بلد مسلم مملوء سعادة
وأخيرا , توجه الى مركز صيانتك الأصلي لأنه أعلم بمشكلة الجر والدريكسيون اللي عندك
ربنا ييسر لك الخير وييسرك للخير