تقرير صيانه ال 1000 كيلو للالتو 2013 و استخدام سياره اسبوع كامل

تم بتاريخ اليوم عمل صيانه ال 1000 و الحمدلله
العربيه كان عدادها عامل 970 كيلو
تاريخ استلام السياره من المعرض 14-2-2013
تاريخ صيانه ال 1000 كيلو 23-2-2013

الملاحظات اللي اتاخدت مني في الاستقبال كانت كالأتي

ا- لمبه الصالون
استلمت العربيه لمبه الصالون شغاله و فوق كده كمان اشتغل حاجات مكنتش شغال زي ان لما احط المفتاح في الكونتاكت و الباب مفتوح يكون في صفاره متقطعه كده زي بتاعه الحزام في العربيات التانيه
و كمان لو شلت المفتاح من الكونتاكت و فيه نور مفتوح حتي لو نور العدادات بس يحصر صوت صفاره مستمره (بسبب الموضوع ده انه مكنش موجود في الماروتي و كنت علي طريق مصر الاسكندريه بالنهار و مولع النور عشان الشبوره و لما وصلت عشان كنا بالنهار مختش بالي و سبتها علي كده 8 ساعات متولع فييها النور العالي لحد ما البطاريه فضيت خالص و العربيه مكنش فيها كهرباء نهائي )


2- صوت تزيق او صفاره في الدبرياج
تم معالجه الموضوع و تشحيم السلك و الدنيا بقت تمام

3- المارشدير رخم و فيه عضه
الموضوع اتحسن كتير

4- البابين الامامين كانوا تقال في قفلهم
تم ظبطهم و بقوا بيقفلوا علي طول

5- علامه التشك انجن انها منوره
حطوها و شيكوا عليها و حلوا الموضوع



ما تم عمله في صيانه ال 1000 في فرع ابو رواش
اولا انا وصلت الساعه 9 و نص بدون حجز و بدون كتاب الضمان و العربيه دخلت علي طول بدون انتظار يعني الحاجز كان زي اللي مش حاجز ده بياخد رقم من علي البوابه و هوا داخل و انا برده خت رقم
مهندس الاستقبال خد المشاكل اللي عندي و بص علي العربيه و دخلت الورشه
تم تغيير الزيت بزيت موبيل 1 التخليقي و اتحاسبت علي 3 لتر زيت
تم تغير فلتر الزبت و اللي كان راكب في العربيه كان نوعه بولاتور و اللي ركبوه في الصيانه نوعه سوزوكي و تمنه 40 جنيه
تم حل المشاكل السابق ذكرها
تم غسيل محرك السياره كيماوي و العربيه بالكامل من الخارج
تم تربيط العفشه و التأكد من جميع سوائل السياره و المصابيح


العربيه كانت واقفه خلصانه في الباركينج مغسوله الساعه 12
استلمتها الساعه 1 الا ربع عشان كان الكل في فتره الراحه


دفعت 365 جنيه شامل 50 جنيه غسيل محرك السياره اللي مش هكرره تاني

صوت الماتور اهدي بعد تغيير الزيت



سألت علي الاكسسوارات


كاسيت سي دي بمدخل يو ايس بي بلاك فوليم مصري فيه بلوتوث للمكالمات و شكله شيك الصراجه عامل 880 بالتركيب
كاسيت بلاك نفس السابق ما عدا البلوتوث ب 660 بالتركيب
السنتر فقط و من غير ريموت ب 265 بالتركيب و ضمان سنه و نوعه اونو
السنتر بالأنزار بالريموت ب 650 بالتركيب و ضمان سنه برده و نوعه اونو
او باكدج شامل السابق بالكاسيت العادي ابو 660 مع فرش للسياره و كان عندهم واحد جلد اسود بخياطه احمر و عليها علامه سوزوكي كان جامد و كمان غطاء للسياره ضد المياه ب 1700 جنيه بالتركيب


الخدمه مش بطاله بس طبعا صيانه السياره بره اوفر بكتير
بس الي حد ما انا مرضي من الخدمه


الي اللقاء في صيانه ال 5000 في التوكيل ان شاء الله



و انا راجع النهارده علي المحور كانت العربيه عامل 1015
قلت كده بقي التليين خلص و نجرب العربيه
وصلت لسرعه 110 بسهوله جدا بدون احساس
الثبات في المستقيم كان تمام
الفرامل من لمسه
مزودتش عن كده عشان الطريق مكنش يسمح و من نفسي رجعت لسرعه ال 90 تاني و التزمت بيها بس مينعش ان كل فتره لما يكون الطريق فاضي اني اقرص عليها شويه عشان متاخدش علي الراحه بقي و كمان مبقتش بحب الجري بالعربيات منه توفيرا للبنزين و تجنبا لكوارث الحوادث ربنا يحفظنا جميعا

الف مبروك صيانة الـ1000 يا ابو اسلام عقبال صيانة الـ100 الف اهي ديه التقارير و الا فلا
و واضح ان فيه تحسن في الخدمة زي ما احد المسئوليين بلغني انه هيكون فيه شغل تاني و اتمني تشارك بالكلام ده في تقييم التوكيل و الفرع في الموضوع المثبت بالقسم

بس مقولتليش المشكلة بتاعت التشيك انجن كانت ايه ؟ و القطع ايه نظامها ؟؟

تقرير ممتاز
وربنا يبارك ليك فى العربية ويديك خيرها ويكفيك شرها وأسلم قرار إنت أخدته إنك متجريش بالعربية ودا عين العقل ( فى التأنى السلامة وفى العجلة الندامة ) .
بس أنا شايف إن أسعار الإكسسورات فى التوكيل مبالغ فيها زيادة عن اللزوم وخصوصاً السنتر والإنذار

اقتباس:

---

المشاركة الأصلية كتبت بواسطة amr axel

الف مبروك صيانة الـ1000 يا ابو اسلام عقبال صيانة الـ100 الف اهي ديه التقارير و الا فلا
و واضح ان فيه تحسن في الخدمة زي ما احد المسئوليين بلغني انه هيكون فيه شغل تاني و اتمني تشارك بالكلام ده في تقييم التوكيل و الفرع في الموضوع المثبت بالقسم

بس مقولتليش المشكلة بتاعت التشيك انجن كانت ايه ؟ و القطع ايه نظامها ؟؟

---

التشك انجن مش فاكر و الله الراجل قال ايه بس هوا كان قال انها مش هتظهر تاني فلو نورت هروح انفخهم

بالنسبه لقطع الغيار و الله ما نسيت يا باشا انا سئلت و قالولي ان اسعار قطع الغيار بتكون في منفذ البيع و ان النهارده اجازه فمفيش حد أسئله
الراجل بتاع الاستقبال هوا اللي قالي كده

اقتباس:

---

المشاركة الأصلية كتبت بواسطة lidosasa

تقرير ممتاز
وربنا يبارك ليك فى العربية ويديك خيرها ويكفيك شرها وأسلم قرار إنت أخدته إنك متجريش بالعربية ودا عين العقل ( فى التأنى السلامة وفى العجلة الندامة ) .
بس أنا شايف إن أسعار الإكسسورات فى التوكيل مبالغ فيها زيادة عن اللزوم وخصوصاً السنتر والإنذار

---

اه الأسعار جوه الطاق طاقين بالظبط
بس الفكره في ضمان الكهرباء
بس لو حسبناها فرط
يعني سنتر و انزار بالتركيب و الشاي هيعمله 350 جنيه
كاسيت سي دي فيه مدخل يو اس بي هيعمله 550 جنيه
غطاء ووتر بروف هيعمله 140 جنيه
كسوه جلد للكراسي هتكون في رنج ال 300 جنيه غير اجره السروجي و كمان مش هتكون اللي متفصله للكراسي
يبقي الاجمالي 1340
يعني الفرق بين الباكدج و بين بره التوكيل 360 جنيه شايفه الصراحه انه فرق مش مستاهل قدام الحفاظ علي الضمان لو واحد ناوي يكمل الصيانه في التوكيل و يريح دماغه

اه الخدمه كانت كويسه و مخادوش وقت طويل بالنسبه للناس زي ما كانت بتقول انها بتروح 8 و بتمشي 3 او 4

سئلت في التوكيل موظف الاستقبال اذا كان ينفع اجيب انا الزيت و هما يحطوه يعني عشان اجيب النوع اللي انا عايزه قالوا مفيش مشاكل هات اي نوع و احنا نحطهولك

الف مبروك الصيانة
ربنا يبارك ..

طب بالمناسبه بقي الصيانه الجايه علي 10 ولا 5 ؟؟ ولو 5 حيبقي ايه ظروفها ؟؟

الصيانات بتكون كل 5000 كيلو
الصيانات 5000 و 15000 و 25000 و 35000 و 45000 و .............. بتكون تشك بس علي العربيه انها تمام و انها مفيهاش مشاكل و تقريبا مصنعيتها ب 65 جنيه
الصيانات 10000 و 20000 و 30000 و 40000 و ............. ديه اللي بيكون فيها تغير قطع غيار بتاعه الصيانه الدوريه

اقتباس:

---

المشاركة الأصلية كتبت بواسطة islamahmed1990

سئلت في التوكيل موظف الاستقبال اذا كان ينفع اجيب انا الزيت و هما يحطوه يعني عشان اجيب النوع اللي انا عايزه قالوا مفيش مشاكل هات اي نوع و احنا نحطهولك

---

دي حاجة ممتازه فعلا....
تحياتي

Sent from my SE Arc S using Forum Runner

سؤال بس يا جماعه لملاك الألتو
هوا الانذار ان الباب مفتوح بالصوت بتاع الصفاره ده بيكون شغال علي باب واحد اللي هوا بتاع السواق و لا علي البابين اللي قدام

الف مبروك الصيانة

بس في كمان 100 جنيه انت مش حاسبها .. لأن أقل فرش جلد في قماش برة انهاردة بيعمل 400 جنيه مش 300 زي ما نت حسبته .. يبقى كدة الفرق بين الباكدج وبين برة 250 بس .. وده مش كتير

من الوصف بتاعك بصراحة أنا شايف ان مودرن موتورز اتحسنوا كتير جدا عن الأول ..

طيب خد عندك كمان
لما بستلم العربيه من المهندس
و فتحنا الكابوت اللي مفروض انهم غسلوا الماتور
كان فيه حته لسه مش نضيفه علي قربه المياه الخضرا و حته مداريه من الماتور
شاورت للمهندس عليها من غير ما اتكلم
صمم ان العربيه ترجع تتغسل تاني

اقتباس:

---

المشاركة الأصلية كتبت بواسطة islamahmed1990

التشك انجن مش فاكر و الله الراجل قال ايه بس هوا كان قال انها مش هتظهر تاني فلو نورت هروح انفخهم

بالنسبه لقطع الغيار و الله ما نسيت يا باشا انا سئلت و قالولي ان اسعار قطع الغيار بتكون في منفذ البيع و ان النهارده اجازه فمفيش حد أسئله
الراجل بتاع الاستقبال هوا اللي قالي كده

---

تمام يا باشا

ما شاء الله واضح ان فعلا فيه تحسن في التوكيل يا مسهل يا رب اذن الناس صدقوا في كلامهم معايا عن التحسن

- بخصوص الاسعار انذار و سنتر برة 300 بالتركيب
- فرش تفصيل يحافظ ع الفرش الاصلي حوالي 600 ج لو كسوة هتعملها حوالي 300-400 ج
- هيديونت نضيف فليكن سوني 500 هيعمله حوالي 550 ج + سماعتين بيضاوي خلفي + سماعتين قدام بدل الستوك نظرا لضعفهم
- الغطا ووتر بروف في حدود 80 ج

يعني حوالي 1550 ج من غير السماعات انا شايف ان الفرق مش كبير فعلا و بكده التوكيل احسن ع الاقل عشان الضمان
بس الناس مكنش عاجبها سنتر و انذار التوكيل و لا حتي الهيد يونت كذا واحد بيتكلم عن الردائة و الله اعلم لأني مشوفتش
و كمان بيقولك تقدر تجيب الزيتواضح ان فيه تقدم في التوكيل فعلا

الف مبروك ع العربية وربنا يكفيك شرها و يديك خيرها
حلو حوار ان اللى حجز زى اللى مش حجز
انا رايح اعمل صيانة ان شاء الله ل30 الف و ربنا يسهل

مبروك على الربية مرة تانية :)

مبروك يا اسلام صيانه ماشاءا لله
من كلامك واضح فعلا ان خدمة اتضبطت كتير بس منعرفش دة فى فرع دة بس
ولا فى كله عامتاا شايف انك تتباع مع توكيل ديما فى عربيه دي احسن
يعنى معتقدش انها زي ماروتى وربنا يبارلك فيها ياباشا تحياتى..

الف مبروك يا اسلام على الصيانة بس اذاى مختش كتابة الصيانة معاك هما مش لازم يملوء شهادة الضمان ويسجلوها

هاخده معايا المره الجايه و هيملوه هما و ياخدوا كوبون صيانه الالف