الموضوع: رابطة مالكى استرا ( j )

المشاركة الأصلية كتبت بواسطة K.Ossama

شوف يا سيدى...
١- الرجة موجودة من وقت لآخر وكذلك الكركرة بس اقل من الرجة كمان. الاتنين بيقلوا مع البنزين النظيف وبيزيدوا مع العكس. إنما النتشة غير موجودة.
٢- البلوتوث أظن تليفون بس. ان ماعنديش لأنى كوزمو ٢٠١٣.
٣- التكييف جيد جداً (اليابانى أسرع شوية منه) ولا يؤثر على اداء العربية تماماً.
٤- الشكل الجديد مش قبل ٢٠١٧ ان شاء الله.
٥- انا بعمل الصيانة كل ١٠ آلاف (١٥-٢٥-٣٥-...)
٦- مصاريف الصيانة عليك يا باشا.
٧- فيه جهازين معتمدين من التوكيل وتركيبهم لا يؤثر على الضمان؛ شاشة ٧ بوصة touchscreen وبتشغل صور وأغاني وأفلام وGPS. أسعارهم 4200 و5200.
أنا مركب الأول.
تحياتي

+1

وجهة نظري كالآتي

أولا .. ربنا يقدرلك إللي فيه الخير .. :)

ثانيا .. ده تقرير تفصيلي كنت عامله عن عربيتي ..

http://www.nilemotors.net/Nile/460817-j-40000-a.html

ثالثا .. لو عاوز عربية إحتماليات المشاكل فيها قليلية جدا .. إعتمادية عالية .. وتريح دماغك .. تكييف لا غبار عليه .. سعر إعادة بيع رائع .. بس عربية مملة .. صحابي أمريكان بيسموها Boring car .. ممكن تزهق منها بسرعة .. صاج تحميله ضعيفة .. خامات على قدها .. روح للكورورلا ..

لو عاوز عربية شياكة .. تقفيل وماتيريال على أعلى مستوى .. فيها معظم الكماليات .. تبقى قاعد فيها متزهقش .. إضاءات تابلوه وإضاءات العربية شيك جدا .. إستابيليتي عالية .. صاج محمل وعربية راسية .. بس إحتمالات عيوب غريبة تحصل .. وتكييف مش رهيب ممكن يكون عادي .. وسعر إعادة بيع نص نص .. وميكانيكا وكهربا معقدة شويتين .. وطلعة بطيئة نسبيا .. روح للأسترا ..

وأخيرا . إجابات أسئلتك ..

١- هل مشاكل الفتيس والرجة والنتشة والكركرة والحاجات اللي قريت عنها دي موجودة في ٢٠١٥ كمان؟

لأ .. وفيه سوفتوير حلها تماما في الموديلات القديمة

٢- البلوتوث في الكوزمو بيستخدم بس في التليفون؟ ما ينفعش استخدمه عشان اشغل ملفات صوت على الموبايل؟

فيه جهاز بيركب كامل بيشغلك القصة ديه .. أنا مركبه .. حتشوفه في التعليقات في تقريري

٣- هل فعلا التكييف ضعيف نسبيا وبيأثر على السحب بشكل ملحوظ؟

التكييف كويس جدا .. لكن بيأثر عالسحب

٤- حد يعرف الشكل هيتغير امتى ان شاء الله؟ موديل ٢٠١٦ ولا موديل ٢٠١٧؟

مش عارف ... بس قرب على حد علمي ممكن 2017

٥- بالنسبة للصيانة، لما سألت قالولي كل ٥٠٠٠ او ٤ شهور، هل ده صحيح؟ أنا استخدامي قليل وحاسس ان صيانة كل ٤ شهور كتير.

أنا بأعمل الصيانة كل 10000

٦- أثناء فترة الضمان، بأدفع مصاريف الصيانة ولا ده داخل في الضمان؟

لا مش داخل الضمان

٧- لو حبيت أركب كاسيت تاني عشان البلوتوث او الجي بي اس والشاشة التاتش وكدة، بس عاوز أعرف دي حاجة يوصى بيها ولا لا؟ ولو مفيهاش مشكلة أجيبه منين وأركبه فين عشان الضمان؟ وحد عنده فكرة عن الأنواع او الأسعار؟

الجهاز بيركب 7 بوصة .. رائع جدا .. بيديك كل حاجة .. وحتى الكاميرا الخلفية .. مافيش لعب في الضفيرة .. مبيخرجش من الضمان لأنه بيركب على فيش علطول .. فيه منع نوعين نوع عالي ب 5200 كان آخر حاجة .. ونوع أقل ب 4200 أظن الأقل ده مافيهوش كاميرا خلفية ..

أتمنى أكون جاوبت على أسئلتك