المشاركة الأصلية كتبت بواسطة msobhy
والله حضرتك انا فضلت فى حيرتك ديه أكتر من سنه ونصف
ونفس الاختيارين بالظبط
واللى توصلت ليه كالتالى
1- شكل خارجى - الفيكترا تكسب بإكتساح (رأى شخصى)
2- قوة موتور - الفيكترا تكسب بإكتساح خاصه لو الايكوتك
3- قوة الصاج - الفيكترا تكسب بإكتساح
4- التسارع - الاتنين شبه متساويين فى البدايه - لكن فى النهايه الفيكترا تكسب - لكن لو هاتجيب ال 2000 سى سى - يبقى مفيش وجه مقارنه من اساسه
5- الثبات على السرعات العاليه والمناورات - الفيكترا تكسب بإكتساااااااااااااااااااا اااااااح
6- الحالات الشاذه اللى ممكن تلاقيها - النوبيرا تكسب بإكتساح - وهاتلاقى اللى معاه فيكترا سليمه بيستهبل رسمى فى السعر
7-أعادة تظبيط وصيانه للسياره فى حالة انها تكون متبهدله - النوبيرا تكسب بإكتساح - وتقريبا شبه مستحيل انك تظبط فيكترا متبهدله - تحافظ عليها أه - تشدها لا يا بابا لا
8-شكل الصالون الداخلى - الاتنين زى الزفت - وان كنت بميل شويه ناحية النوبيرا
9- سهولة الصيانات - النوبيرا تكسب بإكتساح وأى بقال هايشتغلك فيها
10- قطع الغيار - النوبيرا تكسب بإكتساح بالنسبه للسعر تقريبا التلت - لكن فى العمر الافتراضى الاوبل تكسب طبعا
11- المصنعيات - الاوبل ضعف النوبيرا بالمستريح
12 - توافر أماكن الصيانه للعربيتين - النوبيرا تكسب بإكتساح - وبالنسبه للفيكترا اجبارى لازم هاتروح لناس فاهمه مش أى كلام - وعليه ممكن تلاقى نفسك ساكن فى الهرم وبتروح صقر قريش علشان تركب مسمار (حقيقه علميه)
13- مدى الاعتماديه - مش عارف اقولها ازاى - لكن طول ما الاوبل سليم بيبقى شغال زى الفل - لكن مصيبته انه مش بيعمل اعطال بسيطه - بمعنى أصح العربيه لما بتفتح بقها أعمل حسابك دايما على 5000 جنيه احتياطى معاك - لأن فى الاغلب العربيه بتوقف تماما - أما النوبيرا بنت حلال ولو زعقت فيها ولا كشرت لها شويه بتمشى معاك شهرين ثلاثه لغاية لما ربنا يفرجها عليك - وفى الاغلب كبيرك 1000 جنيه فى المشاكل العاديه
14- استهلاك البنزين أعتقد ان الاتنين واحد - لكن موتور الايكوتك موفر جدا بشهادة ناس كتير - حتى فى ال 2000 سى سى
15- اعادة البيع - الاتنين زفت لكن النوبيرا تكسب وأسهل فى بيعها من الفيكترا حتى لو كانت عربيتك شاذه - الحاله الوحيده اللى تبيع بيها الفيكترا وتجيب سعرها انك تعمل حسابك انك تبيعها فى خلال 6 شهور - انا بعت اللانوس فى يوم واحد فقط
16-عوامل الامان - والمصحف ما انا رادد
17- الاستخاره - ثم الاستخاره - ثم الاستخاره وربنا يوفقك - لأنى بعد الاستخاره اشتريت النترا - لكن لو رجع بيه القرار والعربيتين قدامى والاتنين بحاله شااااااااااذه خاصه الفيكترا - بدون تفكير هاجيب الفيكترا عن شرط انها تكون b2 مش b1 وهاتبقى 1600 ايكوتك ويوم ما هاخدها - هاعملها تعديل الكنترول بتاعها ومات على كده الكلام
بالمناسبه انا لما كنت بدور - كنت بدور على موديل 2002 - 2003 فقط ولازم تكون العربيه فبريكه بره وجوه - والاهم ان صالونها يكون فابريكه
وبمناسبة الصالون - تكييف الفيكترا تعباااااااااااااااااااااا ااااااااااااااااااان
أسألكم الدعاء