نفسك تسكن فى مكان صحراوى ؟ فكرت فى المميزات و العيوب ؟ قولنا وجهة نظرك
من فتره كدة فكرت كتير فى الأماكن إلى أحنا عايشين فيها كأسرة
لقينا أنها كلها فى وسط أسكندريه
و بالرغم من كدة أشترينا أراضى برضه فى قلب أسكندريه
طبعا أنا كنت معترضة جدا على فكرة أننا نكرر نفس الفكرة لأسباب كتيرة زى الزحمه
لكن طبعا بالنسبه للخدمات زى المايا و الكهربا إلى بيقطعوا فى كل المحافظات لكن الحمد لله أفضل من الصحرا بكتير
و بالنسبه للمحلات و الأحتياجات عمتا بتكون فى نفس الشارع
لكن لما جيت أفكر كدة لقيت أن فيه أراضى كتيرة أكيد ليها مستقبل بس هتكون واسعة برضة
و دى بتبتدى من أول طريق أسكندريه مطروح عند العجمى و سيدى كرير و برج العرب و أبو تلات و بعض الأماكن الصحراوية دى و الجميل أن فيه منها كتير على البحر و بحيرة مريوط
لكن طبعا فيه عقبات كتيرة جدا لما فكرت فيها كدة أننا لو عيشنا فيها هتواجهنا
أولا المايا أكيد مش هتكون نضيفة (فالحل تخزين المايا)
ثانيا الكهربا بدل ما بتقطع ساعتين فى اليوم هتقطع 12 ساعة فى اليوم (علينا وعلى المواتير و مولدات الكهربا)
ثالثا المحلات و لو حد عايز يشترى ولاعة حتى للبوتاجاز هيطخ مشوار منيل (يتجاب بالزيادة و تتخزن)
رابعا الأمن فى الوقت الحالى (مالهاش حل بصراحة غير رشاش ألى على شوية تعديلات فى السور لو فيلا)
خامسا المستشفيات و مظنش أن دى أحتياجاتها كتير بس لما بيحصل طوارئ بتبقى مهمه جدا
سادسا الحيوانات زى الكلاب المسعورة و الحشرات الصحراوية و التعابين (متوفرة كتير ولا لأ مش عارفة)
بالنسبه للخدمات طبعا المدن تكسب
بالنسبه للهدوء طبعا الصحرا تكسب
بالنسبه للطرق طبعا الصحرا تكسب
بالنسبه للمنظر الطبيعى طبعا الصحرا تكسب
الفكرة بقى
الأفضل بالنسبالكم
تشترى أرض أو شقة فى مدينه أفضل
ولا تشترى أرض فى الصحرا واسعة و تبنى الفيلا بتاعتك بمزاجك
مع العلم أنها هتكون نفس التكلفة أو أقل كمان
عمتا أنا عايزة أعرف وجهة نظركم بخصوص الكلام دة
