مشكلة ضعف سحب و عزم و حلها
السلام عليكم
من ساعة ما نزلت العربية و عملت صيانة ال 120 ألف و أنا كنت بلاحظ شوية حاجات غريبة.......بعضهم حصل مرتين أو تلاتة و أختفى و بعضهم كان مستمر.
الأول حسيت بضعف فى السحب.......و ساعات لما أكبس بنزين و أسقط نقلة ألاقي العربية ولا كأنك دايس بنزين براحتك على الأخر مش بتسقط نقلة.
قولنا نصبر عليها شوية علشان كان فيها نص تانك بنزين بقاله 3 سنين و نحط بنزين و منظف و نشوف............مفيش فرق حصل.
و ساعات تاني كنت بلاقي تقريباً نفس اللى بيحصل فى حالة الكويلات البايظة بس من غير هزة فى العربية و من غير رسايل خالص...........و برضه حصلت مرتين أو تلاتة و أختفت.
و من أول يوم كان فيه صوت زي صوت فيبر بيخبط فى حديد بيحصل على 3 rpm بس.
رحت يوم الخميس فرنش موتورز فى الرحاب علشان أشحن فريون و بالمرة يشوفوا الموضوع ده
طلع معايا مهندس جرب و معرفش.......رجعنا الورشة و أخدنا مهندس تاني جرب و فى الأخر....شحنوا الفريون و طبلوا العربية تبات يومين علشان يفكوا وش الموتور و يشوفوا الشواكيش و الكامات.
طبعاً قولتلهم هبقى أجيلكم تاني بعدين.
أمبارح أخدت العربية و أنا فى الشغل و رحت على طارق الميكانيكي فى الهرم......هو اللى عملي صيانة ال 120 ألف........طلعنا جربنا و سمعته الصوت و خليته يسوق يجرب.....أول تعليق كان على ضعف السحب و العزم.
سيبت العربية مشيت علشان الشغل و بعد 3 ساعات كلمته قالي تعالى أستلم العربية.
رحت أستلمت العربية على الساعة 7 و جربت و العربية الحمد لله بقت أحسن من الأول.
المشكلة كانت أن ترس الديفازر كان معلق من كتر الركنة.......فكه و ظبطه و ركب.........و أخد 50 جم فى الليلة دي........ده اللى أنا قدرت أفهمه منه.
و كنت بكلم الوحش فرحات بك الكبير في الموضوع ده......و قالي أن ترس الديفازر هو عبارة عن ترسين مش ترس واحد......بيعشقوا مع بعض و بيدخل بينهم زيت....هو اللى بيخليهم يبعدوا أو يقربوا من بعض.......و دي معلومة جديدة عليا.
عندي ملف صوت كنت مسجل الصوت اللى بيحصل عليه بس مش عارف هتعرفوا تسمعوه ولا لأ
https://docs.google.com/file/d/0BwHa...it?usp=sharing
أعتقد بيفتح بأكتر من برنامج بس اللى متأكد منه كويك تايم...........أو أى حاجة بتشغل ملفات بصيغة m4a
الصوت بيظهر عند الثانية 2 و بيكمل لأخر الفيديو........هو مش واضح قوي برضه علشان كنت بسجل من جوة العربية لأنه مش بيظهر غير والعربية ماشية......لو واقفة ورفعت ال rpm ل 3 مش بيظهر.
