الموضوع: لمن يسألون عن GPS Trackers

سألت عليه من فترة فالمنصورة واللي عرفته كالتالي...

سعره 1100 وتركيب 50

بتحط فيه شريحة محمول وتشترك في عرض رسايل وتشحنه

بيتم برمجته بوصلة الكمبيوتر عشان تحط له 3 ارقام يبعت عليهم الرسايل... واحد فيهم بيكون هو الرئيسي وده بيبعت عليه باستمرار رسالة كل اما العربية تشتغل فيها احداثيات مكان العربية ولو انت موبايلك اندرويد بمجرد الضغط على الاحداثيات بيفتح لك مكان العربية على جوجل مابس... بخصوص الرقمين التانيين دول بيكون فيه زرار فالعربية ده لو لا قدر الله اتثبتت بالعربية بتضغط عليه يبعت رسالة استغاثة فيها بيانات بمكان العربية

فيه اكواد جايه معاه بتبعت بيها رسالة نصية قصيرة للشريحة اللي في الجهاز وعلى حسب الكود الجهاز يتعامل... مثلا لو العربية مع المدام او اخوك او صاحبك... ممكن تبعت كود للجهاز من الرقم المتسجل عليه فيرد عليك برسالة فيها مكان العربية والسرعه الحالية... ممكن مثلا تبعت كود تطلب منه قطع الكهربا عن كمبيوتر العربية فده يسبب تعطيلها... وهكذا على حسب امكانيات الجهاز وتركيبه

فيه بطارية داخلية تدوم في حدود 48 ساعة لو كابل البطارية اتفصل

وبالتالي هو غالبا يساعدك على استعادة سيارتك في حال لا قدر الله تم سرقتها... واعرف شخصيا واحد عنده سيراتو اتسرقت وعرف يوصل لها في خلال 3 ساعات كانت مرمية في اطراف المحلة الكبرى في منطقة مهجورة ومتغطية... واغلب الحرامية بيعملوا كده... بيقلبوا الحاجات الخفيفة... بطارية استبن عده كاسيت وبعدين بيرموا العربية يوم او اتنين في مكان مهجور وهي متغطيه عشان يضمنوا ان مفيش فيها حاجة الاول وبعد كده يقطعوها

أنا مش بابيعهم ولا انا وسيط لأي محل... بس دي معلومات جمعتها من كذا شخص وجبيت اشارككم فيها... وأي استفسار انا في الخدمة... أنا باستخدم جي بي اس من 2006 وعندي فكرة كويسة عنه

المشاركة الأصلية كتبت بواسطة abuhusam

شكراً جزيلآ على المعلومات القيمة.. وأستذنك في استفسارين رفيعين! أولاً هو بيبعت رسالة بالإحداثيات كل أد إيه؟ هل ممكن يتبرمج بحيث طول ما أنا في العربية ما يبعتش رسايل واوقف عمل الجهاز؟ على الأقل علشان احتمالات السخونة والأعطال أو إنه يهنج من التشغيل المستمر.. ولما أكون هاسيل العربية في مكان لوقت طويل أرجع أشغل الجهاز فيبعت رسايل كل نصف ساعة مثلاً أو أي فترة أنا أحددها؟ أنا باسأل السؤال ده علشان لو المدى الزمني بين الرسائل كبير (يوم أو نصف يوم ثلاً) ممكن العربية تتاخد ويروحوا أي مكان ويفتشوا لغاية ما يلاقوا الجهاز أو يفصلوا البطارية ويعملوا اللي هما عايزينه في العربية قبل ما أنا أعرف أحدد المكان.
السؤال الرفيع التاني: لو انا شغلت كود يبطل العربية أو يفصل الكهرباء عنها بمجرد ما تتاخد.. هل وصلات الجهاز ممكن العثور عليها بسهولة بحيث يتمكنوا من التوصل إليها وفصل الجهاز وبالتالي تشغيل دائرة الكهرباء والسير بالعربية؟ ولا مكان الجهاز وتوصيلاته بتبقى مخفية ومسارها ومصدر الكهرباء ليها غير ظاهر بحيث على ما يقعدوا يبحثوا ويفتشوا عنه أكون بلغت عنهم وحصلتهم في أقرب مكان؟
معلش اعذرني على الإطالة بس زي ما حضرتك عارف كل ما بيبقى فيه تقدم في الحماية العصابات كمان بتدرسه وتفكر إزاي تواجهه وتتعامل معاه.. وشكراً مقدماً...

الجهاذ اللى اعرفة بيكون فية اكتر من 20 امر ... ممكن تختار اللى يناسب او اللى تحتاجة ... زى ان الجهاذ ممكن تخلية يبعتلك رسالة لو العربية دارت او اتفتحت او السرعة زادت عن الحد اللى انت محدده له + الاوبشن الاساسى وهو عند الضغط على زرار صغير تحدد مكانة انت اثناء التركيب ليكون فى متناول يديك فيرسل رسالت استغاثة ل 5 ارقام موبايل انت تحددهم .. وكمان انت اللى تكتب الرسالة بايدك وتحددها على اليوزر بتاعك على الويب سايت ... وتبعتلة رسالة من موبايلك او اى موبايل تانى تفصل ترمبت البنزين عن العربية ... للحفاظ على العربية وليس السارق ... وممكن تشوف العربية على خرائط الويب سايت باليوزر بتاعك وتعرف حالتها اية لو واقفة او مع اخوك اوصديق او زوجتك ... واخيرا فية ميكروفون مزروع فى العربية ماحدش يعرف طريقة غيرك كمان تقدر تسمع كل مايدور بالعربية ....
والاهم ان الجهاذ بيكون فى مكان مخفى جدا ... حتى لو وصل الية الحرامى وفصلة سيؤدى ذلك الى توقف السيارة تماما ..... اتمنى اكون افادتك