اول حاجه جرب دراع النور والفوجات ... ههههههههه
طبعا تاخد معاك سمكرى يبصلك عليها
ولو تعرف تاخد كمان ميكانيكى خير وبركه
ولو تعرف ترفعها فى اى بنزينه وتشيك عليها من تحت مرشحه زيت من اى حته - يبقى عداك العيب
ولو هتجربها بنفسك من غير مساعده يبقى افحص كل ملى ومتتكسفش ( تنح) وخد وقتك واوعى صاحبها يستعجلك عيش حياتك معاها وانت لسه على البر - ولازم تشوفها الصبح وابعد عن تقييم بليل وقسم جهدك على تقييم خارجى وتقييم داخلى وتقييم بالتجربه
هتلف حوليها وتقيم فوانيسها واكصدامتها وصاجها واخد تنيات ومردود ولا لأ فى فروق الوان ول لأ -تفتح الابواب الاربعه وتسيبهم يقفلو براحه وتشوفهم بيقفلو فى مجراهم ولا معاكسين والشنطه كذلك والكبوت كذلك
تفتح الكابوت وتبص على كل حته فيه سواء بطنه او ما يحتويه تحته من موتور وريداتير وقواعد وضفاير وخلافه الى اخر مكونات صدر العربيه واهم حاجه الشنب وتفتح الشنطه وتبص عليها من جوه وبالمره تراجع على الاستبن والكوريك وبالمره امن ع الطفايه والمثلث ..ههههه عادى براحتك
بعد كده تركب وقبل ما تدور تشوف وتراجع الصالون والتابلوه من اى اثار سوء استخدام او كسور او حروق طفية سجاير مثلا او حاجه مفارقه مثلا - وتستهدى بالله وتدور وعينك على العدادات وتحفظ ارقامها عشان لما تمشى تعرف ان كانت شغاله ولا فى واحد مهيس وطبعا ( بديهى) تشوف العداد عامل كام كيلو - وتدور التكييف وتشغل الكاسيت وحاول تشيك على السماعات كلها شغاله يمكن يكون فى بطانة باب اتحلت وخد فرده سماعه فى سكته وتراجع على الازاز الكهربا والمرايات بمواتيرها - وتسمى الله وتطلع الاول من غير ماتدوس بنزين شوف وحس بتحركها كسلانه ولا فايقه
ولو استأذنت صاحبها واخدتها لفايه تشوف ال ار بى ام بينقل على كام - وبيوصل لكام مع سرعات زى 100 ولو عرفت 120 - يعنى بينحر ولا بينقل مستريح وصوته هادى ولا لأ - فى رعشه معاك وبتحدف ولا الطاره متماسكه ( ممكن يكون ترصيص وممكن يكون الجنوط ) تراجع عليها يمكن واخدا خبطه فى رصيف فى خمسايه - وياسلام لوتفتح بيها و كيكايه فى الخباثه كده تشوف استجابتها وودنك واحساسك مع العفشه وتاخد دوران قاسى شويه ( وانت على الهادى خالص) وتسمع صوت الكبالن
ولو تعرف تبلطج على صاحبها و تركب فى عربيه وراه وتخليه يطلع قدامك وانت تمشى وراه تراجع يمكن مشيسه ولا حاجه ( الاحتياط واجب) ما انت هتعمل كل حاجه بنفسك لو مجبتش حد معاك - ارفع شعار الرذاله هى الحل
بس ياسيدى كفايه عشان منتقلش على حد - فى الف حاجه ممكن تشيك عليها فى العربيه
وبعد ما تطمن على كل حاجه سليمه وشغاله وبعد ما تتأكد ان مرارة صاحبها لسه متفقعتش اعتذر وقوله انا اتفقت مع ناس تانيه وسيبه وامشى .... هههههههههههه
والف مبروك مقدما
المفضلات