يا جماعه عندي استفسار بخصوص فتيس ميجان 2005 ..محتاج مشورتكم ضروووووري

**elrity** · 02-03-2013 10:33 PM

السلام عليكم يا شباب
انا معايا ميجان 2005 ..عملت معايا حركة غريبه جدا كنت بسمع رجرجه وخبط من تحت رجلي ناحيه اليمين شويه ..بتجي وبتروح ..وبعدها العربيه كتبت CHECK GEAR BOX وبقت بتدي اولاني بس وتفصل النقله على التاني والتالت ..
وديتها لخالد الزيني ف الرحاب قالي الكمبيوتر مطلع العيب سولنيد فالف على الرغم من اني مغيرة شهر 5 اللي فات ..ولما قلتله كده قالي يبقى محتاجه عمرة فتيس تتعمل في توكيل المقطم وتتكلف من 6000-7000 جنيه
وطبعا انا مودتهاش لاني مستكتر المبلغ وف نفس الوقت جربت العربيه وهي بارده لقيتها بتنقل اولاني وتاني وتالت عادي بس اول ما الفتيس يسخن يدوب اولاني وتفصل النقله عالتاني والتالت..
انا طبعا عندي امل يكون العيب اهيف من عمرة الفتيس لان كده والله حرام العربيه يدوب عامله 104000 ازاي فتيس يحتاج عمرة عالعداد ده ..
يا ترى حد عدي عليه العيب ده او سمع عنه .. احسن انا بلف حولين نفسي وراكن العربيه تحت البيت بقالها شهرين ..
وياريت لو حد عنده مقترحات في ورش ارخص من المراكز المعتمده وف نفس الوقت كويسسين ياريت يفيدني
وجزاكم الله خيرا

**elmo7amed** · 03-03-2013 12:16 AM

اولا ربنا معاك

بس حضرتك ممكن تروح التوكيل وهما هناك يعملو التشخيص السليم وتعرف العربيه محتاجه ايه وممكن ان شاءالله السبب يكون بسيط

**Ahmed Selim** · 03-03-2013 07:57 AM

روح التوكيل اعرف السبب و أتأكد كلام خالد الزيني صح و لا لا

السولونيد انت مغيره جديد و لا مستعمل ؟ و هل ماركة محترمة و لا ماركة مجهولة ؟

الفتيس الاستيراد لسه واحد سأل عليه قدامي امبارح في الحرفيين و اتقاله ٥ آلاف بدون فصال

**elrity** · 04-03-2013 03:23 PM

شكرا لاهتمامكم ..
بس يا باشمهندسين انا مغير السولونيد عند خالد الزيني شهر 5..والمفروض انه مركز معتمد
وبالنسبه للفتيس الاستيراد انا اخاف اجيب فتيس استيراد يكون متبهدل او يعمل مشكله سولونيد بعد ما اشتريه لاني كلمت مهندس محيي اللي ف توكيل المقطم قالي ان ممكن التوكيل يجيبلي فتيس استيراد ويضمنهولي شهر قلتله طيب افرض بعد الشهر جابت سولونيد تاني ..قالي ده وارد بس منقدرش نعمل اكتر من كده ..وقالي عمرة الفتيس في التوكيل بيبقي معاها ضمان 6 شهور ..المشكله اني عايز قبل ما اعمل اي حاجه ابقي عارف انا بتكلم في ايه وبكام لان العربيه جثة يعني هأخدها على ونش فلازم ابقى عارف انا رايح فين وهدفع كام..
في ناس قالولي ان في ورشه في صقر قريش اسمها رامي ومحمد تخصص فتيس يا ترى في حد سمع عن الورشه دي؟؟ولو في بديل ياريت حد يشور عليا ..وجزاكم الله خير

**gefoo** · 04-03-2013 03:34 PM

هاتلك فتيس استيراد احسن وخللى القديم عندك عشان لو احتجت حاجه منه

**MohammedAladel** · 04-03-2013 04:02 PM

بس أتمنى أنك تعرف مشكلة الفتيس الأول

**amr_mabd** · 05-03-2013 01:22 AM

جرب تغير زيت الفتيس أنا كانت بتعمل معايه كده و غيرتلها زيت و أختفت المشكله تمامأ و لو عاوز مكنيكي شاطر روح لطارق في الهرم شاطر جدأ و بيفهم و خبره 10سنين في التوكيل

**abdo_2812** · 05-03-2013 01:51 AM

أنا أعرف ميكانيكي كويس جدا - دايماً بيشتغل في عربيتي - وكان شغال في التوكيل وكان بيشتغل في عمرات الفتيس في التوكيل فيما أعلم يعني، لو عاوز تروحله يشخصلك العيب ماشي وطبعا لو عاوز تعمل أي حاجة في الفتيس أو الموتور أو العفشة عنده هو شاطر جدا وأمين ماشاء الله ده غير انه حافظ العربية كويس وعنده جهاز الأعطال بتاعها
هو اسمه عم أبو العلا وحالياً هو في ورشة في شبرا مصر في ش معمل الألبان اسمها المصطفى
لو حابب تروحله بلغني وأنا أوصيه عليك

**medohai510** · 08-03-2013 12:44 AM

عادل في صقر قريش بيعمل عمرات فتيس كويس
وممكن رجب للفتيس الأوتوماتيك في شارع أحمد سعيد بعد شارع رمسيس ومحمد رجب أخوه بعده بشوية في شارع علي الشمال تخص فتيس أوتوماتك