فرملة العادم فى العربيات النصف نقل والنقل

كنت راكب امبارح فى القطر جنب واحد مسافر وأنا مينفعش أقعد ساكت كدا لازم ألاقى حد أتكلم معاه يسلينى
بعد ما اتكلمت معاه عرفت انه عنده عربية شيفورليه جامبو npr ومش عارف إيه اللى خلانا جبنا سيرة الفرامل
المهم لقيته بيقول لى لما ببقى محمل الفرامل مش بتعمل حاجة وبتبقى ضعيفة مع الحمولة العالية على السرعات العالية وبضطر استخدم ( الشوك ) على حد قوله على النظام دا

المهم هو شرح لى الفكرة وقال لى ان العربياته دى فيها حاجز فى الشكمان بيمنع طلوع العادم لو عايز توقف العربية بسرعة
بترفع رجلك من على دواسة الجاز خالص بالطبع لأنك هتوقف وبيبقى فيه دراع ورا الدركسيون زى دراع النور بتشده عليك بيشتغل نظام ( الشوك ) زى ما هو بيسميه أو نظام فرملة العادم

يعنى اللى بيحصل إن لما هو بيعمل السد فى الشكمان بيزود الضغط جوا غرفة الاحتراق فيجى صباب العادم يفتح ويكون وقتها البستون طالع لفوق عشان يفضى نواتج الاحتراق يفاجأ بضغط قادم عليه من صباب العادم وطبعا العربية بتبقى متعشقة على الغيار

ودى بتبقى فرملة موتور برضه بس أقوى وأشد من الفرملة العادية
للعلم أول ما بتزود جاز تانى النظام دا بيفصل نفسه أوتو
هل العربيات الملاكى بتاعتنا مزودة بأنظمة شبيهة وأحنا منعرفش ؟؟ أوتكون بتستخدم بنظام أوتوماتيكى وأحنا منعرفش ؟؟

انا كنت قريت في الموضوع ده من فترة وهقولك على اللى توصلت له

عندنا في العربيات بتاعتنا ( مواتير بنزين ) فرملة الموتور engine brake بتبقى بسبب انك بتقفل المنفذ بتاع الهوا تماما ( بوابة الانجكشن او باب الكربراتير ) في الحالة دى الموتور عاوز يشفط هوا عشان يفضل يدور

الفكرة بالظبط زي ما تكون بتشفط جامد من ماسورة ضخمة وفجأة بقت انبوبة رفيعة جدا او اتسدت ! ، فالموتور يبذل جهد جامد جدا عشان يحاول يسحب الهوا وفي نفس الوقت مفيش بنزين بيتحرق ، فده اللى يعمل الافيكت بتاع فرملة الموتور اللى احنا عارفينها ..


في المواتير الديزل الوضع مختلف لأن مفيش بوابة اصلا ونظام حقن الوقود مختلف تماما والهوا بيدخل بطريقة مختلفة تماما بدون دخول في تفاصيل ( معرفهاش بالظبط ) ، فمفيش اصلا فرملة موتور عادية ، وعشان كدة اتعملله exhaust brake و jake brake كبدائل للوضع اللى في مواتير البنزين ولان كمان موتور الديزل في الغالب معرض لاحمال اكتر ومواقف مفاجأة اكتر والعربية بتستهلك نظام الفرامل بمعدل كبير جدا ..



exhaust brake فرملة العادم لو خدت بالك هتلاقي انه عنده زي البوابة كدة بتاعت الانجكشن او باب الكربراتير بالظبط بس في الشكمان ، فلما يفعل الفرملة دى ، كأنه شال رجله من ع البنزين في العربية العادية وقفل بوابة السحب ، بس هنا بيقفل بوابة العادم ان صح التعبير
فنفس الافيكت يحصل بس بالعكس ، الموتور بيحاول ينفخ حاجة لبرة بأقصى ما عنده وانت قفلتها في وشه ، فيحصل الدروب المفاجئ في القدرة ..




الـ jake brake بقى دى نوع تانى فكرتها ببساطة ان الموتور في الوضع العادى في شوط الضغط بيضغط الشحنة المكونة من هوا وديزل واول ما يوصل البستم لأعلى نقطة ، الهوا اللى انضغط بيشتغل كأنه سوستة بتنزل البستم تانى لتحت في شوط القدرة ( فكر فيها كأنك بتضغط حقنة واول ما تسيب ، بترد تانى لبرة )

اللى بيحصل بقى لما تشغل الفرملة jake ان ضغط الهوا بدل ما يتساب يضغط على البستم ، بيتم تسريبه لخارج الموتور فجأة ! ، فالموتور يبقى تعب نفسه في الضغط ، وبعدين ضيع شوط القدرة ، فالموتور يهدي جامد ويقف ... ( كأنك ضغطت الحقنة وفجأة سبت صباعك اللى قافلها من تحت ، فمفيش قدرة مرتدة هترجعها لورا زي الاول ..
عيب الـ jake brake انها بتعمل صوت خلخلة هوا مزعج جدا ممكن يصحى منطقة بحالها ولكنها فعالة جدا حسب ما قريت ..

يعنى صحيح كلام السواق دا فى حكاية (الشوك ) يبقى هو اسمها الجاك مش الشوك :)

بس لأول مرة آخد بالى من حكاية قفل بوابة الهواء دى فعلا انت اول ما هترفع رجلك من على الدواسة البوابة هتتقفل أو هتبقى مفتوحة بسيط خالص عشان الموتور لما يهدى ميبطلش أو ممكن تكون بتتقفل ولما الموتور يوصل لأنه يهدى خالص تفتح بسيط أوتوماتيك
شكرا للتوضيح

احب اضيف حاجة..
السواق اللى قاللك شوك هو قصده choke اى صمام خانق (زى شفاط الكربراتير فى العربيات القديمة) و التشوك دة موجود فى نظام العادم فى العربيات الجامبو و على فكرة فى بعض سيارات النقل التقيل ممكن exhaust brake يستخدم فى اطفاء المحرك تماما

ال jake brake منتشر فى التريللات الامريكانى زى Mack و Kenworth و فعلاً زى ما استاذ عمرو قاللك عيبه صوته المزعج

و فيه حاجة كمان بتستخدم فى فرملة النقل التقيل و الاوتوبيسات اسمها Retarder
و دة جزء راكب على الجيربوكس و فكرته شبه قربة الفتيس الاوتو الا انه بيخلى ريش طرمبة واصلة بعمود نقل الحركة تضغط زيت فى اتجاه ريش ثابته لا تقبل الحركة و بالتالى يبذل عمود نقل الحركة مجهود عالى و يفقد طاقة و العربية سرعتها تقل
ال Retarder موجود فى اوتوبيسات النقل العام الحديثة فى القاهرة, و هتسمع منه صوت صفارة ملحوظة و السواق بيبتدى يهدى عشان يقف

شكرا يا هندسة على الأضافة


يعنى دلوقت اللى بيحصل فى العربية الجامبو إنه بيقفل صمامات العادم نفسها ولا بيبخليها تسرب ضغط الموتور

اقتباس:

---

المشاركة الأصلية كتبت بواسطة mohammedaladel

شكرا يا هندسة على الأضافة


يعنى دلوقت اللى بيحصل فى العربية الجامبو إنه بيقفل صمامات العادم نفسها ولا بيبخليها تسرب ضغط الموتور

---

العفو,

مش صمام العادم اللى فى المحرك
فيه صمام تانى فى ماسورة العادم بالظبط شبه بوابة الهواء فى العربيات البنزين (قرص حديد مدور راكب على اكس) , لما السواق يشغله بيقفل بشكل جزئى و يعاكس حركة العادم و يهدى العربية

شكرا جدا يا رجاله والله المعلومات دى قيمه جدا