تقرير تركيب 4 فرد كاوتش جديد gt اندونيسي للماروتي
السلام عليكم
من فترة ومن أول ما أشتريت العربية من حوالى 5 شهور الكاوتش كان قديم فردتين هانكوك إنتاج 2008 وفردتين أصلى جوديير مع العلم إن العربية موديل 2007 وكانت عاملة 52 ألف كيلو وقتها .
وطبعاً الكاوتش كده جاب أخره ورحت لواحد بتاع كاوتش قالى لازم تغييرهم قلت ليه لسه شاريها وجايب أخرى مفيش فلوس سألنى إنت بتسافر أو بتجرى بسرعة قلت ليه لاء مش بسافر نهائى وأخرى 50 كيلو جوه المدينة . قالى ممكن يمشى معاك وربنا يسترها .
ونزلت موضوع فى المنتدى ومعظم الأعضاء فعلاً نصحنى بتغيير الكاوتش
توكلت على الله من أسبوع ونزلت أسأل ولآن الماروتى لسه مش منتشرة كتير فى دمنهور كان فيه صعوبة إنى آلاقى مقاس الكاوتش سألت فى فرعين بريدجستون مكنش عندهم .
وبعدين ربنا هدانى لواحد جنب بيتى لقيت عنده نوع إسمه G T أندونيسى وسألت عليه ناس كتير شكرت فيه.
توكلت على الله وأشنريت 4 فرد الفردة ب 300 جنيه ودى صورتهم وأتأكدت إنهم إنتاج جديد فى أواخر 2012
http://store2.up-00.com/Nov12/vWw96523.jpg
وأخدتهم وطلعت على طول على واحد ممتاز متخصص فى الكاوتش بتعامل معاه وفكهم وغسل الجنوط وشحم الكاوتش ورصصت ومليت الأربع فرد نيتروجين ودى صورة لفردة خلفية بعد التركيب
http://store2.up-00.com/Nov12/2Rj96523.jpg
أما بقى الآربعة القدام فكانوا اكنهم حجر مش كاوتش ناشفين خالص ( كتر خيرهم عملوا اللى عليهم وزيادة ) مشيت بيهم بعد ما أشتريت العربية حوالى 1500 كيلو
طبعاً الفرق كبير وواضح وكأنى كنت راكب العربية حافية والكاوتش فعلاً ممتاز ونوعه كويس ومحبتش اعمل تقرير بالموضوع غير بعد ما مشيت بيهم اسبوع عشان يبقى تقرير شامل وبالتجربة .
