السلام عليكم إخوانى الأعزاء
انا عايش فى جدة و معايا مازدا3 2008
بشتكى من شوية حجات و بصراحة الناس هنا مش بيفهموا فى العربيات زى عندنا فى مصر
فقلت أسألكم و ان شاء الله هلاقى الإجابة

هية تيبترونك و طبعا انتوا عارفين انها 4 سرعات بس
الشكوى الاولى انى بحس ان صوت الموتور عالى , كانها محتاجة تنقل نقلة كمان
بالتفصيل بقول , اول م بدور و تكون العربية باردة , صوتها بيبقى عالى و فيه رعشة فى الصالون
و بعد م تسخن تهدى شوية بس برضه لسه فيه رعشة
لازم انقل على d عشان الرعشة تهدى
لو دست بنزين صوت الموتور برضه مش مريح بالنسبالى و خصوصا انى ركبت واحدة تانية و لقيت صوتها اهدى بكتير
لما بتكون سخنة و جايب n مش بسمع صوت الموتور تقريبا

عند 120كم/الساعة بحس ان العربية صوتها على اوى كأنها محتاجة نقلة كمان ( فاهمين الاحساس اللى اقصده )

دلوقتى .. هقولكم شوية معلومات يمكن تساعدكم فى الرد عليا

اولا : انا مش عارف بالتحديد اللى قبلى غيرلها زيت فتيس ولا لأ , و الناس هنا بتخوفنى شوية من تغييره برة التوكيل , انا ناوى ان شاء الله اغيره فى التوكيل , و برضه قلقان , بيقوله ممكن الفيتيس يبوظ لو مكنش الزيت اتغير قبل كدة
مع العلم ان العربية عاملة 123 الف - و بكرر - معرفش اللى قبلى عمل معاها ايه احتمال يكون غيره قبل كدة و احتمال لأ . هل ده ممكن يكون ليه التأثير اللى وصفته ( من حيث صوت الموتور)
ثانيا :اما بالنسبة للرعشة ,انا قريت مشاركة قيمة جدا لزميل , كان بيشتكى من قاعدة الموتور ( هل هية دى كراسى الماكينة )
عموما , ممكن يكون عندى كرسى ماكينة تعبان شوية , و هوة اليمين برضه زى م كان زميلى بيشتكى - و ممكن يكون ده ليه علاقة بالرعشة, انما هل ممكن يؤدى برضه لصوت الموتور اللى بشتكى منه ؟
ثالثا: هل ممكن يكون العيب من الشكمان ..
الصنيعية هنا مش شاطرين زى مصر و مش عايز اروح لواحد يشتغلنى ..
رابعا : انا رحت كشفت فى التوكيل كشف كامل شامل , بصراحة حسيت انهم مش محترفين اوى انما الخلاصة انهم مطلعوش عيوب محددة فى الجير او الموتور او التكييف , انما قالولى على كراسى الماكينة و علبة الدركسيون و طبعا طلبوا منى عمل صيانة ال120 الف اللى انا معرفش هية عبارة عن ايه
انا عموما غيرت زيت موتور و فلتر و حطيط احسن زيت فى السعودية موبيل1 و زودت زيت الدركيسون لحد م اكشف عليه و اشوف العيب من العلبة ولا من الخراطيم و غيرت فلتر هوا و غيرت سير الموتور الخارجى ( مش السير الداخلى اللى هوة جنزير )
و مغير اربع عجلات و مغير طرمبة بنزين اصلية

دى كانت الشكوى الاولى و الاهم .. و ربنا يخليكوا ليا يا ولاد بلدى ...
اه معلش نسيت معلومة ممكن تكون مهمة ...
تقريبا و الله اعلم ان العربية دى صاحبها غيرلها موتور قبل كدة .. و دى معلومة مش اكيدة اوى ..
اصل هنا صعب انك تتاكد من اى حاجة ..