السلام عليكم
أنا جبتها 1300للمدام موديل 2008 و عامله 21000كم لحد دلوقتى و عملت صيانه 5،10،20 ألف فى التوكيل و بعدين كسلت و لما باحتاج حاجه بسيطة باعملها بنفسى عند أى حد.
العربيه كويسه و حتى الآن مافيش مشاكل منها بإستثناء إنى ضبط الأبواب نتيجة لرزع الأولاد الغير آدمى فى الفتح و القفل. بالنسبه لإستهلاك البنزين هى عاديه يعنى جوة البلد حوالى 180-200 و على الطريق الطوالى 200-220 و إن كنت أعتقد إن دة قليل شويه بالنسبه للفئه دى
بالنسبة للتحمل فأنا رحت بيها الغردقه (حوالى 700 كم) بدون توقف إلا مرة واحدة للبنزين بدون مشاكل أو أى حركات نقص و بعدين رحت بيها مطروح (حوالى 650 كم ) برضه بدون توقف .
لحد دلوقتى الإستبن منزلش على الأرض و بالنسبه للثبات فهى لحد 140كم/ساعة مافيش مشاكل و معرفش بعد كدة لأن دى أقصى سرعه جبتها و بالنسبه لقطع الغيار فحتى الآن لم أتعرض لأسعار قطع الغيار بإستثناء الزجاج الخلفى كان واحد إبن حلال كسره و هى واقفه فغيرته برة التوكيل ب420 جنيه و مره كنت بربط العفشه و غيرت كاوتشه بحوالى 24 جنيه و ماعد ذلك ماحتاجتش أى قطع غيار
أنا باستخدمها مؤقتا دلوقتى لأنى بعت عربيتى و مستنى أول السنه أشترى عربيه جديدة و بالرغم من إن رجلى تقيله فى السواقه و الشوارع عندنا ما يعلم بيها إلا ربنا إلا إن العربيه ممتازه فى المطبات و إن كانت عفشتها ناشفة شويه بالنسبه لليابانى . و إستفسار أنا حاضر
تحياتى