الموضوع: عاجل, اريد الكشف عن مازدا 3 معروضة للبيع (بلاش سمارت)

السلام عليكم يا شباب,

اختصارا للكلام لأنى كنت عمال اكتبلكوا رغى كتير و اللاب عمل ريستارت لوحدو, قلت مش مكتبلوكو اصدعكوا.

انا كان ليا استفسارات زمان عن المازدا و كنت بفكر اجيبها بس كنت خايف من قطع الغيار, و عموما اعدت النظر فى الموضوع لأنى كنت بفكر فى الجيتا و السيفيك 2007, بس لقيت المازدا هتدينى احتياجاتى و بسعر اقل بكتير منهم, احتياجاتى تتلخص فى سيارة شيك و ثابتة (و ديه من اهم احتياجاتى) امان و فرامل جيدة و عزل حلو و موضوع العزل ده بالذات الدايقنى فى السيفيك, و قلة مشاكل بشكل عام.

دلوقتى قدامى عربيتين مازدا 3:

الأولى بتاعت صديق مقرب لى, 2007 سوداء بيز لاين فابريقة بالكامل يعيبها عدادها عالى شوية فوق ال 120000 ك يعنى لو خدتها و قعدت معايا سنة ولا سنة و نصف هتقفل 150000ك و انا بحب اغير كتير فاعتقد هتتعبنى فى البيع (و انا مبحاولش العب فى عدادات او اخبى حاجة) و كمان انا زهقت من اللون الاسود بخرابيشه و ترابه و لان اخر 3 عربيات ليا سود و عربية مراتى سوده مع العلم ان حالة العربية العامة جيدا جدا (موتور و عفشة و صالون مجرد زقزقة بسيطة جوه الصالون).

الثانية بتاعت صاحب واحد صاحبى, 2008 نبيتى بيز لاين و تزيد طارة مالتى و فوجات (بحب اللون ده فى المازدا) رشة جنبين نضافة (فى بابين فابريقة و الكابوت و السقف و الشنطة فابريقة) عداد 82000 ك, الحالة العامة حاسسها افضل من السوداء ومتحافظ عليها ما شاء الله, سقتها فى شارع داخلى و العربية هادية و صالونها شكلوا اجدد من السوداء و مفيش زقزقة, و العفشة مفيش دبدبة.

السودة متفقناش اوى على السعر بس ممكن 72000 او 73000 و اعتقد لو ليا ممكن تنزل, النبيتى قافش على 75000 ج مع العلم ان السوداء محتاجة تغيير كاوتش, لكن النبيتى كاوتشها و بطاريتها يعتبرو جداد. و اعتقد انها تستاهل فرق السعر بالنسبة للحالة العامة و العداد الأقل.

اهم حاجة فى الموضوع ده بأه, عاوز اكشف عند حد ثقة فى حدود مصر الجديدة – مدينة نصر – جسر السويس او الاربعين – الحرفيين. يهمنى فى الكشف الشاسيه و حالة الموتور و العافشة و الفتيس و افضل طبعا متخصص. انا عارف سمارت طبعا لكن السمعتو من الاخوة هنا ان كشفو ب 600 ج و ده سرقة علنى بالنسبة ليا.

منتظر اقتراحتكوا و ارائكم, مع العلم انى مفروض اكشف بكره ان شاء الله (مقدرتش امسك نفسى عن الرغى بردو).

المشاركة الأصلية كتبت بواسطة khaled_1263

بسم الله مشاء الله كل الخبره دى وكمان وعلى المستوى ده من الحظر
ربنا يوفقك

اخ خالد، الاتلسع من الشوربة باه، غير و أنا ببيع و بشترى ياما شوفت بلاوى و عربيات انصاص و عربيات فابريقة بالكامل و تلاقيها لحمة فرد شاسيه، و ألتجار نفسهم ياما بيلبسوا عربيات، و ان كان عندى نسبة من الخبرة الحمدلله بس فى الاخر الموضوع لغاية دلوقتى هواية و عشان كده لازم استعين بالمتخصصين. و ربنا بيسترها الحمد لله.

المشاركة الأصلية كتبت بواسطة kokowasfy

روح اى بنزينة اكشف بى 150 او 200 افضل

منا سايب ده كحل نهائى ان شاء الله لو ملقتش متخصص